Հունաստանում ՀՀ դեսպանության նախաձեռնությամբ Աթենքում տեղի ունեցավ համերգ՝ նվիրված Սբ․ Ներսես Շնորհալու մահվան 850-րդ տարելիցին
Նոյեմբերի 22-ին Աթենքի գերմանական ավետարանական եկեղեցում տեղի ունեցավ միջնադարյան մեծ մտածող, բանաստեղծ, աստվածաբան, 12-րդ դարի հայոց կաթողիկոս Սուրբ Ներսես Շնորհալու մահվան 850-րդ տարելիցին նվիրված երգեհոնային երաժշտության համերգ, որին ներկա էին Հունաստանում հավատարմագրված դիվանագետներ, քաղաքական գործիչներ, մտավորականներ, հոգևոր դասի, հունահայ համայնքի ներկայացուցիչներ։
Այս առանձնահատուկ տարելիցը նշելու համար Հունաստանում ՀՀ արտակարգ և լիազոր դեսպան Տիգրան Մկրտչյանի նախաձեռնությամբ հատուկ հրավերով և ՀՀ կրթության, գիտության, մշակույթի և սպորտի նախարարության աջակցությամբ Հայաստանից Աթենք էին ժամանել Նելլի Քալաշյանը (սոպրանո) և Կարինե Հովհաննիսյանը (երգեհոն)։
Միջոցառումը բացվեց միասնական տերունական աղոթքով՝ հունահայ թեմի առաջնորդական տեղապահ Տեր Խորեն Վարդապետ Առաքելյանի, Հունաստանի հայ Կաթողիկե եկեղեցու գերապայծառ Հովսեփ Բեզազյանի և հայ Ավետարանական եկեղեցու վերապատվելի Վիգեն Չոլակյանի կատարմամբ։
Հունաստանում ՀՀ արտակարգ և լիազոր դեսպան Տիգրան Մկրտչյանը հանդես եկավ ողջույնի խոսքով, որտեղ ներկայացրեց, որ դեռևս 2021 թ․ նոյեմբերին ՅՈՒՆԵՍԿՕ-ի գլխավոր համաժողովի 41-րդ նստաշրջանի ժամանակ, Հայաստանի կողմից ներկայացված Ս. Ներսես Շնորհալի հայրապետի մահվան 850-րդ տարելիցը ներառվել է ՅՈՒՆԵՍԿՕ-ի Հռչակավոր մարդկանց և կարևոր իրադարձությունների հոբելյանների օրացույցում՝ 2022-2023 թթ. երկամյակի համար։
Հայաստանի հայտին աջակցել են Հունաստանը, Կիպրոսը, Իտալիան և Սիրիան, և այս, Հունաստանում նմանատիպ երկրորդ, միջոցառման միջոցով ոչ միայն Հայաստանը մշակութային դիվանագիտության միջոցով ներկայացնում է հայկական մշակույթը և հայկական մշակութային ներդրումը արևմտյան քաղաքակրթական արժեհամակարգում, այլ նաև այսպիսով երախտագիտություն է արտահայտում այդ նախաձեռնությանը աջակցություն հայտնած երկրներին, առաջին հերթին՝ Հունաստանին։
Դեսպանն ընդգծեց Սբ․ Ներսես Շնորհալու ջանքերը ուղղափառ, կաթոլիկ և սիրիական եկեղեցիների միավորման ուղղությամբ՝ կարևորելով Շնորհալու սրբադասված լինելը կաթոլիկ եկեղեցու կողմից։
Այնուհետև Տիգրան Մկրտչյանը նշեց, որ այս նախաձեռնությունը ներկայացնում է Սբ․ Ներսես Շնորհալու հոգևոր երաժշտական ժառանգությունը, որի մի մասը երգեհոնի համար փոխադրված է կատարվում, ինչը յուրովի և այլ հարթության վրա է ներկայացնում Ներսես Շնորհալու և միջնադարյան այլ հայ աստվածաբանների ստեղծագործությունները։
«Ծրագրում մենք ներառել ենք միջնադարյան այլ հայ աստվածաբանների ստեղծագործություններ նույնպես, այդ թվում Սբ․ Գրիգոր Նարեկացու, Խաչատուր Տարոնացու, Գրիգոր Պահլավունու, Մխիթար Այրիվանեցու։ Ներառել ենք վաղ ժամանակակից և ժամանակակից հայ հոգևոր երաժշտություն, մասնավորապես Սիմեոն Երևանցու՝ Կոմիտաս վարդապետի մշակմամբ, Մակար Եկմալյանի և Խորեն Մեյխանեջյանի ստեղծագործությունները։ Այս անուններն առանձնահատուկ շեշտադրմամբ եմ արտաբերում, քանի որ այսօր առավել քան երբևէ հայկական մշակույթի դեմ ուղղված սպառնալիքները բազմապատկվել են և խիստ անհրաժեշտ է այն առավել ակտիվորեն տարածել և ներկայացնել, ինչպիսի փորձ է այսօրվա նախաձեռնությունը» – նշեց դեսպան Տիգրան Մկրտչյանը։
Բացի հայ ստեղծագործողների աշխատանքներից, հնչեցին նաև Յոհան Սեբաստիան Բախի և Ջովաննի Բատիստա Պերգոլեզիի ստեղծագործություններից։
Սիջոցառման մասին տեսահոլովակը կարող եք դիտել այստեղ՝
Սբ․ Ներսես Շնորհալու մահվան 850-րդ տարելիցին նվիրված երգեհոնային երաժշտության համերգ – YouTube
