«Քրիստոնյաների նահատակության ողբերգական պատմությունն սկսեց հայասպանությունով». Կարդինալ Կուրտ Կոխ

  • 29.04.2023
  • 0
  • 297 Views

Ապրիլի 27-ին Հռոմի Ս․ Բարդուղիմեոս տաճարում տեղի ունեցավ Հայոց ցեղասպանության 108-րդ տարելիցի ոգեկոչման պաշտոնական արարողությունը, որը նախագահում էր Վատիկանի Քրիստոնեական միասնության խթանման քահանայապետական գերատեսչության ղեկավար կարդինալ Կուրտ Կոխը՝ Հռոմում քրիստոնյա բոլոր համայնքների ղեկավարների ներկայությամբ։

Միջոցառմանը, որը համատեղ կազմակերպել էին Սուրբ Աթոռում և Իտալիայում ՀՀ դեսպանությունները, հայ առաքելական Ս․ եկեղեցու ներկայացուցչությունը և Քահանայապետական Լևոնյան վարժարանը, մասնակցել են Սուրբ Աթոռի պաշտոնյաներ, օտարերկրյա դեսպաններ ու դիվանագետներ, հասարակական, լրագրողական շրջանակների և հայ համայնքի ներկայացուցիչներ։

Իրենց համատեղ խոսքում Իտալիայում և Սուրբ Աթոռում ՀՀ դեսպաններ Ծովինար Համբարձումյանը և Կարեն Նազարյանը ներկայացրել են Օսմանյան կայսրությունում տեղի ունեցած Հայոց ցեղասպանության միջազգային ճանաչման կարևորությունը, զուգահեռներ անցկացրել այսօր տարածաշրջանում ադրբեջանական կողմի էթնիկ զտման ու ցեղասպան քաղաքականության շարունակական փորձերի հետ։ Դեսպանները կոչ են ուղղել մարդկության հանդեպ այդ չարիքի դեմ համատեղ պայքարը շարունակելու անհրաժեշտության մասին ու ներկայացրել նաև Հայաստանի կողմից ՄԱԿ-ում կանխարգելման օրակարգի առաջ մղման ուղղությամբ ձեռնարկված քայլերը։

Արարողության ընթացքում կարդինալ Կոխը մասնավորապես նշել է, որ «Քրիստոնյաների այսքան մեծ նահատակության ողբերգական պատմությունն սկսեց հայասպանությունով՝ XX դարի սկզբին հայ ժողովրդի ցեղասպանությունով։ Այս սարսափելի իրադարձությունը մեզ հիշեցնում է այն, ինչը քրիստոնեական հավատքում արժանի է կոչվել մարտիրոսություն։ ․․․ Քրիստոնյա հայերը, որոնք դաժանաբար հալածվեցին ու ենթարկվեցին ծանր նահատակության, նաև ցույց տվեցին, որ այդօրինակ մարտիրոսության միջով կարելի է անցնել, եթե այն ուղեկցվում է քրիստոնեական հավատքի խոստումի հանդեպ վստահությամբ։ ․․․ Աստծո փրկարար սիրուն ենք հանձնում սպանված հայ քրիստոնյաներին և նրանց դիմում որպես բարեխոսների՝ խնդրելով, որ իրենց աղոթքներով ուղեկցեն մեզ մեր հավատքի վկայության հարցում ու հատկապես աջակցեն աշխարհում բազմաթիվ քրիստոնյաների, որոնք այսօր ենթարկվում են հալածանքների և ստիպված եմ կրել մարտիրոսությունը»։ ․․․ երախտագիտություն ենք հայտնում հայ ժողովրդին իր հավատքի վկայության և քրիստոնյա մարտիրոսության հանդեպ հիմնարար վերաբերմունքի համար»։

Միջոցառումն իր լայն արձագանքն է գտել տեղական մամուլում։

https://www.vaticannews.va/…/metz-yeghern-koch…

https://www.vaticannews.va/…/hy-preghiera-ecumenica…

https://www.chiesa-cattolica.it/metz-yeghern-il-cardinale…

https://www.kerknet.be/…/armeni%C3%ABrs-nagorno…

https://www.agensir.it/…/pace-roma-domani-nella-la…/

Ի տեղեկություն․ Հռոմի Ս. Բարդուղիմեոս տաճարը կարևոր նշանակություն ունի հայության համար, քանի որ այնտեղ են պահպանվում Դեր Զորի անապատներից բերված հայ նահատակների մասունքները, ինչպես նաև Մարդինի հայ արքեպիսկոպոս՝ երանելի Իգնացի Մալոյեանի ձեռագիր նամակը։ Ժամանակին այդ հինավուրց տաճարի ծիրանավորն է եղել նաև կարդինալ Աղաջանյանը։

Ապրիլի 24-ին դեսպան Կարեն Նազարյանը մասնակցեց Հռոմի Ս. Նիկողայոս հայ կաթողիկե եկեղեցում Հայոց ցեղասպանության 108-րդ տարելիցի ոգեկոչման առիթով մատուցված Ս․ պատարագին, որից հետո տեղի ունեցավ ծաղկեպսակի զետեղման արարողություն Քահանայապետական Լևոնյան հայ վարժարանի բակում տեղադրված Ցեղասպանության սրբադասված նահատակներին նվիրված խաչքարի մոտ։ Ներկա էին նաև Իտալիայում ՀՀ դեսպանը, Լևոնյան վարժարանի, Հայ առաքելական Ս․ եկեղեցու, Մխիթարյան և Անարատ հղության հայ քույրերի միաբանությունների և հայ համայնքի ներկայացուցիչները։

orer.eu

Մեր գործընկերները

ՕՐԵՐ ԵՎՐՈՊԱԿԱՆ ԱՄՍԱԳԻՐ
Մենք սոց․ ցանցերում