2026 թվականի ապրիլի 20-ին Հաագայի Գերմանական եկեղեցում տեղի ունեցավ տպավորիչ ոգեկոչման համերգ՝ նվիրված Հայոց ցեղասպանության 111-րդ տարելիցին։ Համերգը կազմակերպել էր Նիդերլանդների Հայկական Կազմակերպությունների Ֆեդերացիան (FAON) և առաջին անգամ անցկացվեց Հաագայի քաղաքապետի՝ պարոն Յան վան Զանենի ներկայությամբ։
Մասնակիցների թվում էին՝ Հայաստանի Հանրապետության արտակարգ և լիազոր դեսպան Ն.Գ. պարոն Վիկտոր Բիյագովը, Նիդերլանդների խորհրդարանի անդամներ և նախկին անդամներ, Հայաստանի պատվավոր հյուպատոսը, Անտուան Բոդարը՝ Հռոմի Ֆրիզիական եկեղեցու ռեկտոր, Հաագայի քաղաքային խորհրդի անդամներ, Արտաքին գործերի նախարարության ներկայացուցիչներ, ինչպես նաև տարբեր կազմակերպությունների ներկայացուցիչներ, ներառյալ ազգային փոքրամասնություններ և նույն ճակատագիրը կիսող համայնքներ (արամեացիներ և հույներ)։
Ձեռնարկի ընթացքում ելույթներով հանդես եկան՝ Ն.Գ. պարոն Վիկտոր Բիյագովը, խորհրդարանի անդամ Անի Զալինյանը (GL/PvdA-PRO), Անտուան Բոդարը, և տիկին Մայա Հադդուն՝ Արամեական Մարդու Իրավունքների Շարժման (ABM) անունից։
FAON-ի անունից բացման խոսքով ելույթ ունեցավ տիկին Ինգա Դրոստը, որը մասնավորապես նշեց.
ա. Հայոց ցեղասպանության ճանաչումը Նիդերլանդների կառավարության կողմից հանդիսանում է մեր երեք հիմնական թեմաներից առաջինը՝ այս 111-րդ տարելիցի և մեր հանրագրի շրջանակում մենք (և Նիդերլանդների խորհրդարանը) շարունակելու ենք պաշտպանել այս պահանջը, մինչև այն իրականացվի (բնականաբար՝ վերջնական նպատակ ունենալով նաև Թուրքիայի կողմից ճանաչումը)։
բ. Երիտասարդների կրթությունը՝ ընդհանուր ցեղասպանությունների վերաբերյալ կրթության զարգացման միջոցով։ FAON-ն արդեն փորձ ունի միջնակարգ կրթության ոլորտում կիրառված ուսումնական փաթեթի միջոցով, և մենք ունենք նաև մի շարք առաջարկներ խորհրդարանի համար այս շաբաթ նախատեսված քննարկման վերաբերյալ, այդ թվում՝ Հոլոքոստի կրթության խնդիրների շուրջ։
գ. Հուշարձան Հաագայում – ցանկացած աջակցություն ողջունելի է։ Հատկապես Հաագայում՝ որպես միջազգային իրավունքի և դատարանների կենտրոն, կարևոր է հիշեցնել անպատժելիության հետևանքների մասին։ Նախկինում նման առաջարկը մերժվել է, սակայն զարգացող իրազեկվածության պայմաններում նոր նախաձեռնությունը, ամենայն հավանականությամբ, կստանա բավարար աջակցություն։
Երաժշտական ծրագիրը ներկայացրեց տաղանդավոր Հակոբյան եռյակը (Ադամ՝ դաշնամուր, Քրիստիան՝ թավջութակ, Էմանուել՝ ջութակ), որոնք վերջերս հանդես էին եկել «Podium Klassiek» հեռուստածրագրում։
Ոգեկոչման համերգը բացեց «Աբովյան» հայկական մշակութային միության մանկապատանեկան երգչախումբը տիկին Սվետլանա Աղաջանյանի գլխավորությամբ։
Հիշողության, խորհրդածության և միասնականության երեկոն վարեց տիկին Ժակլին Կեչիյանը։ (Jacqueline Kecciyan)
Համերգի տեսագրությունն այստեղ՝ https://www.facebook.com/abovian.centre/videos/2206420240200461
orer.eu
