Երկրորդ համաշխարհային պատերազմում ֆաշիզմի դեմ տարած հաղթանակի 80-ամյակի կապակցությամբ 2025 թվականի մայիսի 8-ին «Ուրարտու» հայ-չեխական ասոցիացիան Սազավայի քաղաքապետարանի ղեկավարության հետ համատեղ կազմակերպել էր միջոցառում՝ նվիրված այդ մարտերում զոհված զինվորների հիշատակին։
Միջոցառումը տեղի է ունեցել Ժար նադ Սազավու մարզի Սազավա գյուղում, որտեղ գտնվում է Սազավա գյուղի պաշտպանության համար զոհված 18-ամյա հայ զինծառայող Արշավիր Դավիդյանի գերեզմանը։ Միջոցառմանը ներկա էին Չեխիայում ՀՀ դեսպան Աշոտ Հովակիմյանը, դեսպանատան աշխատակիցներ, «Ուրարտու» հայ-չեխական ասոցիացիայի նախագահ Ալեքսանդր Սարգսյանը, Վիսոչինայի մարզի հայ փոքրամասնության ներկայացուցիչներ և հյուրեր։
Միջոցառումը սկսվեց Յիհլավայի «Խաչքար» հուշարձանից, որտեղ ՀՀ դեսպան Աշոտ Հովակիմյանը ծաղիկներ դրեց հուշարձանին, ապա մասնակիցները շարժվեցին դեպի Սազավա, որտեղ նրանց միացավ Սազավա գյուղի գյուղապետ Ֆրանտիշեկ Լեդվինկան, տարածքային ծառայության զինծառայողներ և տեղի բնակիչներ։
Մասնակիցները ծաղկեպսակներ դրեցին զինվորի շիրիմին, որից հետո ելույթ ունեցան Սազավայի գյուղապետ Ֆրանտիշեկ Լեդվինկան, ՀՀ դեսպան Աշոտ Հովակիմյանը և «Ուրարտու» հայ-չեխական ասոցիացիայի նախագահ Ալեքսանդր Սարգսյանը։
Երկրորդ համաշխարհային պատերազմի զոհերի հուշարձանին ծաղկեպսակներ դնելուց հետո մասնակիցներն այցելեցին տեղի գերեզմանատուն, որտեղ ծաղիկներ դրեցին 1945 թվականի մայիսի 5-ին ֆաշիստների կողմից սպանված Ստանիսլավ Հանայի գերեզմանին։
Հայ-չեխական «Ուրարտու» ասոցիացիան խորին շնորհակալություն է հայտնում Սազավայի բնակիչներին և ղեկավարությանը Չեխոսլովակիան ֆաշիզմից ազատագրած զինվորների հիշատակը հարգելու և պահպանելու համար։
Սեփ. թղթ.
