Յաջակցութիւն Արցախի՝ «Եւրոպացիները յանուն Արցախի» հարթակին նախաձեռնութեամբ, 27-28 Յունուարին եւրոպական տասնչորս երկիրներու առաւել քան 50 քաղաքներու մէջ տեղի ունեցան տարբեր նախաձեռնութիւններ, որոնց կը մասնակցին Եւրոպայի հայութիւնը եւ տասնեակներով եւրոպական կազմակերպութիւններ, որոնք իրենց կառավարութիւններուն եւ համաեւրոպական ղեկավար կառոյցներուն իրենց պահանջը եւ յորդորը կը ներկայացնեն: Այս մասին փոխանցում է ԱՄՆ Ասպարեզ օրաթերթը։
Արցախի Հանրապետութեան Ազգային ժողովի «Ազատ Հայրենիք-ՔՄԴ», «Հայ Յեղափոխական Դաշնակցութիւն», «Արցախի Արդարութիւն» եւ «Արցախի ժողովրդավարական կուսակցութիւն» խմբակցութիւնները մասնակցողներուն յղեցին հետեւեալ ուղերձը.
«Այն ամէնը, ինչ տեղի ունեցաւ Արցախում 2020թ. 44օրեայ պատերազմի ընթացքում եւ 2023թ. Սեպտեմբերի 19ին Ադրբեջանի եւ Թուրքիայի համագործակցութեամբ, ունի մէկ անուանում՝ Օսմանեան կայսրութեան ժամանակներից սկիզբ առած թուրքական յանցաւոր ծրագրերի շարունակութիւն: 100 տարի առաջ հայ ժողովրդին ցեղասպանութեան ենթարկելու գործողութիւնները կրկնուեցին մեր օրերում, բայց մէկ, չնչին տարբերութեամբ՝ առաջատար դեր վերապահելով Ադրբեջանին:
«Հազարամեայ պատմութիւն ունեցող հայկական Արցախը, որ մշտապէս դիմակայել է տարբեր հրոսակախմբերի ասպատակութիւնների, 21րդ դարում, միջազգային իրաւունքի անտեսման պայմաններում դէմ յանդիման կանգնեց ադրբեջանա-թուրքական ուժերի կողմից 2020թ. Սեպտեմբերին պարտադրուած պատերազմին, բազում զրկանքներ կրեց 9ամսեայ համընդհանուր շրջափակման օրերին եւ հրէշաւոր ահաբեկչութեան ճանապարհով 2023թ. Սեպտեմբերին ենթարկուեց էթնիկ (ցեղային) զտման: Իրականացուող ցեղասպանութեան ու դրա սպառնալիքի ներքոյ 120 հազար արցախցի հայեր ստիպուած էին հեռանալ իրենց բնօրրանից՝ թողնելով նախնիների հարուստ պատմա-մշակութային ժառանգութիւնը, քրիստոնէական սրբավայրերը եւ սեփական օջախները:
«Հայերի հանդէպ Ադրբեջանի իշխանութիւնների ցեղասպանական քաղաքականութիւնը, ատելութիւնն ու թշնամանքը տասնամեակներ շարունակ իր արտացոլումն է գտել Սումգայիթից մինչեւ Մարաղա՝ հայաշատ բնակավայրերում տեղի ունեցած ջարդերի, ոճրագործութիւնների միջոցով: Եւ այն իրողութիւնը, որ Արցախի ռազմաքաղաքական ղեկավարները շարունակում են գերեվարուած մնալ Բաքուի բանտերում, հաստատում է այդ երկրի պաշտօնական շրջանակների կողմից հակահայկական քաղաքականութիւնը շարունակելու մտադրութիւնները:
«Եւրոպայի 14 երկրների 50ից աւելի քաղաքներում յաջակցութիւն Արցախի նախատեսուող միջոցառումները, վերը նկարագրուած աղէտալի պայմաններում յոյս ներշնչող բացառիկ ազդակներ են: «Եւրոպացիները՝ յանուն Արցախ»ջ հարթակի կողմից կազմակերպուած հերթական միջոցառումը միաւորել է Եւրոպայում ապրող մեր այն հայրենակիցներին, ում համար Արցախը տարիներ ի վեր եղել է ոգեշնչման աղբիւր, հարիւրաւոր կազմակերպութիւնների, որոնք տարիներ շարունակ աշխատել են Արցախի միջազգային հեղինակութիւնը բարձր պահելու եւ տեսանելի դարձնելու ուղղութեամբ:
«Արցախի Հանրապետութեան Ազգային ժողովի խմբակցութիւնները, արտայայտելով ծանր ու բարդ իրավիճակում յայտնուած արցախահայութեան տրամադրութիւնները, բռնատեղահանուած ժողովրդի անունից երախտագիտութիւն են յայտնում այն հոգատարութեան եւ աջակցելու պատրաստակամութեան համար, որ ցուցաբերում են հարիւրաւոր եւրոպական կազմակերպութիւննէր՝ Արցախին օժանդակելու նպատակի շուրջ օրակարգ ձեւաւորելու մեծածաւալ աշխատանքի միջոցով:
«Մենք շնորհակալ ենք նաեւ եւրոպացի մեր բոլոր բարեկամներին, ովքեր տեւական ժամանակ պաշտպանել են Արցախի ժողովրդի ինքնորոշման եւ ինքնիշխան պետութիւն կառուցելու մեր իրաւունքը:
«Մեծ եռանդով միանում ենք արդարացիօրէն ցանկագրուած այն յորդորներին ու պահանջներին, որոնք ուղղուել են ձեր նստավայր երկրների կառավարութիւններին ու համաեւրոպական ղեկավար կառոյցներին:
«Խորապէս համոզուած ենք, որ համազգային համախմբումը եւ նրա սահմանների ընդլայնումը, Հայրենիքում պահանջուած ու սպասուող աշխատանքի իրականացման հետ մէկտեղ կարող են ստեղծել այն նախադրեալները, որոնք անհրաժեշտ են մեր գլխաւոր խնդրի՝ անվտանգութեան միջազգային երաշխիքներով Արցախի ժողովրդի հաւաքական վերադարձն իրականացնելու համար:
«Յաջողութիւն ենք մաղթում բոլորիս՝ պատմական այդ առաքելութեան իրականացման ճանապարհին»:
orer.eu
