Նոյեմբերի 23-ին, Բուլղարիայի մայրաքաղաք Սոֆիայում, Պանչո Վլադիգերովի անվան դահլիճում, տեղի ունեցավ դաշնակահար Արմեն-Լևոն Մանասերյանի մենահամերգը՝ նվիրված աշխարհահռչակ կոմպոզիտոր Արամ Խաչատրյանի 120-ամյակին:
Համերգը տեղի ունեցավ Բուլղարիայի Հանրապետությունում Հայաստանի Հանրապետության դեսպան Արմեն Եդիգարյանի բարձր հովանու ներքո և Հայկական Բարեգործական Ընդհանուր Միության՝ AGBU Սոֆիայի աջակցությամբ։ Համերգը կազմակերպված էր Եվրոպական բոլոր բարձր չափանիշներով՝ ՀԲԸՄ Սոֆիայի պատվավոր նախագահ, Սոնյա Ավագյան-Պետրոսյանի նախաձեռնությամբ:
Համերգին հնչեցին Արամ Խաչատրյանի դաշնամուրային Սոնատը, Սոնատինան, Պոեմը, Տոկատը, նաև Ալեքսանդր Դոլուխանյանի դաշնամուրային փոխադրումները Արամ Խաչատրյանի «Դիմակահանդես» բալետից:
Համերգի ավարտին, Արմեն-Լևոն Մանասերյանին, տիկին Սոնյա Ավագյան-Պետրոսյանի նախաձեռնությամբ շնորհվեց վկայական` Բուլղարիայի հայ համայնքի մշակութային գործունեության պահպանման և զարգացման գործում անձնական ներդրման համար, ինչպես նաև ՀԲԸՄ Սոֆիայի պատվավոր անդամի կոչում:
»
Ավելացնենք նաեւ, որ նոյեմբերին Արմեն-Լևոն Մանասերյանն արդեն իսկ կազմակերպել էր իր նոր՝ “Visible Music” ձայնասկավառակի շնորհանդեսը Գերմանիայի Բոնն քաղաքի լեգենդար “Շումանհաուս” դահլիճում: Ձայնասկավառակը թողարկվել է Իսպանական հանրաճանաչ “KNS Classical” label-ում, ձայնագրվել է Գերմանիայում:
Շնորհանդես-համերգին հնչեցին Պյոտր Իլյիչ Չայկովսկու “Տարվա Եղանակները”, Լյուդվիգ վան Բեթհովենի 32 Վարիացիաները, Ռոբերտ Շումանի “Արաբեսկներ” և Արամ Խաչատրյանի “Պոեմը”:
Համերգը յուրօրինակ էր նրանով, որ ուղեկցվում էր Արմեն-Լևոն Մանասերյանի 12 նկարազարդումներով, որոնք ոգեշնչված են Չայկովսկու երաժշտությամբ:
«Visible Music» նախագիծը Արմեն-Լևոն Մանասերյանի առաջին նախագիծը չէ, որը համատեղում է նկարազարդումները և դաշնամուրային երաժշտությունը։ Դաշնամուրային երաժշտությունը նկարազարդելու գաղափարը դաշնակահարի մոտ վաղուց է ծագել։ Ժառանգելով գեղարվեստական տաղանդը իր տատիկից՝ հայ անվանի նկարչուհի, Հայաստանի նկարիչների միության անդամ Աիդա Բոյաջյանից՝ դաշնակահարը զարգացրեց պրոֆեսիոնալ հոբբի՝ նկարչությունը։
Լուսանկրները` Կալոյան Ռուսև
Orer.eu
