Հոկտեմբերի 24-ին Բելգրադում BEMUS երաժշտական փառատոնի շրջանակներում՝ տեղի ունեցավ Վոյևոդինայի սիմֆոնիկ նվագախմբի համերգը, որը ղեկավարում էր Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, իսկ որպես մենակատար փայլուն կատարումով հանդես եկավ երիտասարդ դաշնակահարուհի Եվա Գևորգյանը։
Ինչպես տեղեկացնում է Պրահայում Հայաստանի դեսպանությունը, համերգը նվիրված էր Հայաստանի և Սերբիայի միջև դիվանագիտական հարաբերությունների 30-ամյակին եւ անցկացվում էր Սերբիայում Հայաստանի դեսպանության հովանու ներքո։ Համերգին ներկա էր ՀՀ դեսպան Աշոտ Հովակիմյանը։
Երեկոյի ընթացքում հնչեցին Սերգեյ Ռախմանինովի Դաշնամուրի թիվ 3 կոնցերտը և Դմիտրի Շոստակովիչի 10-րդ սիմֆոնիան։
ՀՀ դեսպանի հրավերով՝ համերգին ներկա էին Սերբիայում Ֆրանսիայի և Ռումինիայի դեսպանները, խորհրդարանի անդամ Իվանա Ստամատովիչը, սերբ արվեստագետներ և լրագրողներ, սերբահայ համայնքի ներկայացուցիչներ:
Հոկտեմբերի 26-ին Սերգեյ Սմբատյանի ղեկավարությամբ Վոյևոդինայի սիմֆոնիկ նվագախումբը և Եվա Գևորգյանը ելույթ ունեցան նաև Նովի Սադում անցկացվող Nomus երաժշտական փառատոնի շրջանակներում կայացած համերգին, որին ներկա գտնվեց Պրահայում ՀՀ դեսպանության Բելգրադի գրասենյակի ղեկավար, խորհրդական Հայկ Խեմչյանը։
orer.eu
