Գերմանիայի Դաշնային նախագահ Ֆրանկ-Վալտեր Շտայնմայերը օրերս «Դաշնային արժանիքների խաչ» պատվո շքանշան շնորհեց VeMo Halle կազմակերպության համահիմնադիր, AWO SPI կազմակերպության նվիրյալ աշխատակցուհի, հայազգի Սաթենիկ Ռոթին։ Սաթենիկ Ռոթը այդ պատվին արժանացել է միգրանտների հետ կատարած իր անխոնջ աշխատանքի եւ ինտեգրացիոն ոլորտում ցուցաբերած մեծ ծառայությունների համար։
Միգրանտների եւ փախստականների հանդեպ ունեցած նրա բացառիկ նվիրվածությունը, ինչպես նաեւ զարգացման քաղաքականության ոլորտում տարված աշխատանքը բարձր գնահատվել է երկրի ղեկավարի կողմից։
Ինչպես ՕՐԵՐ-ի հետ զրույցում նշեց տիկին Սաթենիկը, պարգեւատրումը լիովին անակնկալ է եղել եւ այդ մասին իմացել է նամակի միջոցով։ «Ես շատ էի զարմացել, որ ինձ են ընտրել»,- խոստովանեց նա։ Ի դեպ, նման բարձր պարգեւների են արժանացել նաեւ Սաքսոնիա-Անհալտ երկրամասի տարբեր բնագավառների եւս 10 աշխատակիցներ։
Սաթենիկ Ռոթը արդեն 29 տարի անդամակցում է գերմանական սոցիալ-դեմոկրատական կուսակցությանը, եւ տարիներ առաջ հանդիպել էր նախագահ Շտայնմայերին ժողովրդավարությանը նվիրված ֆորումի ժամանակ։ Նա մեծ աշխատանք է տարել նաեւ իրենց քաղաքում միջմշակութային երկխոսության եւ սոցիալական համախմբվածության ուղղությամբ, ակտիվ մասնակցություն ունեցել Հալլեի հայ համայնքի գործունեությանը
Նշենք, որ Սաթենիկ Ռոթը մասնագիտությամբ քիմիկոս է, ավարտել է ԵՊՀ քիմիայի ֆակուլտետը, 1995 թվականից բնակվում է Հալլեում, գերմանացի ամուսնու՝ Անդրեաս Ռոթի հետ ծանոթացել է դեռեւս Երեւանի Ընդհանուր և անօրգանական քիմիայի ինստիտուտում աշխատելու տարիներին։
Մեր հայրենակցուհու մասին ավելի ծավալուն հոդվածը կտպագրվի ՕՐԵՐ եվրոպական ամսագրի գերմանահայությանը նվիրված բացառիկ համարում։
Շնորհավորում ենք տիկին Սաթենիկին եւ մաղթում հաջողություններ։
orer.eu
