Բուխարեստում ավարտին մոտեցող ազատ ոճի ըմբշամարտի Եվրոպայի առաջնությունում Հայաստանը ևս մեկ չեմպիոն ունի: Ինչպես հայտնում է ՀՀ ԿԳՄՍ-ն, 70 կգ քաշայինների պայքարում Հայաստանի ներկայացուցիչ Արման Անդրեասյանը եզրափակչում 7:3 հաշվով տպավորիչ հաղթանակ է տարել Վրաստանի ներկայացուցչի նկատմամբ՝ հաղթական միավորները վաստակելով վերջին վայրկյաններին:
Հայ ըմբիշը եզրափակիչ էր դուրս եկել՝ կիսաեզրափակչում 8:5 հաշվով առավելության հասնելով Հունգարիան ներկայացնող Իսմաիլ Մուսուկաևի նկատմամբ:
Անդրեասյանը կարիերայում առաջին անգամ է դառնում Եվրոպայի չեմպիոն:
Այսօր ավելի վաղ կարիերայում չորրորդ անգամ Եվրոպայի չեմպիոնի կոչմանն արժանացել էր նաև 57 կգ քաշային Արսեն Հարությունյանը:
Արման Անդրեասյանը իր հաղթանակը նվիրել է հերոս եղբորը` Տարոն Անդրեասյանին, գրում է «Սպուտնիկ Արմենիան»։ Տարոն Անդրեասյանը 44–օրյա պատերազմի հերոս է։ Նա միայնակ կռվել է թշնամու մեծաքանակ զինվորների հետ։ Որպեսզի գերի չընկնի, Տարոնը պայթեցրել է իր ձեռքի նռնակը և զոհվել։
Իսկ news.amի Թե «ո՞ւմ է նվիրում հաղթանակը» հարցին ի պատասխան Արմանն ասել է՝
«Նվիրում եմ հերոս եղբորս, Տարոն Անդրեասյանին: Նա իմ հորեղբոր որդին է, որն անմահացել է 44-օրյա պատերազմում: Նաեւ ցանկանում եմ նվիրել մեր ազգին, բոլոր նրանց, ովքեր հպարտանում եւ ուրախանում են մեր հաղթանակներով ու մեր զինվորներին: Թող բոլորը խաղաղ երկնքի տակ ծառայեն եւ վերադառնան իրենց ընտանիքներին»:
orer.eu
