Վառնայի Բորիս Գեորգիևի քաղաքային պատկերասրահում բացվել է բուլղարահայ նկարչուհի Գրոնիկա Կավաֆյանի «ՍՊԵԿՏՐՈՒՄ» ցուցահանդեսը, որին ներկա է գտնվել Բուլղարիայի Հանրապետությունում ՀՀ դեսպան Ծովինար Համբարձումյանը ։
ՀՀ դեսպանության հովանու ներքո Վառնայի Հայկական Բարեգործական Ընդհանուր Միության կողմից կազմակերպված ցուցահանդեսը ներկայացնում է մարդկային զգացմունքների հարուստ սպեկտրը արտահայտված ծաղկային կոմպոզիցիաների, գույների և լույսի միջոցով։
Բացման խոսքում դեսպան Համբարձումյանը շնորհակալություն հայտնեց ՀԲԸՄ Վառնային՝ բազմաթիվ մշակութային նախաձեռնությունների միջոցով Բուլղարիայում հայկական ինքնության պահպանմանը և հայկական մշակույթի տարածմանը շարունակական նվիրվածության համար։ Նա նաև շնորհավորեց նկարչուհի Գրոնիկա Կավաֆյանին ցուցահանդեսի բացման կապակցությամբ և գովաբանեց նրա ոգեշնչող գեղարվեստական տեսլականը։
Դեսպանն ընդգծեց, որ մշակույթը միշտ եղել է Հայաստանի և Բուլղարիայի միջև երկարատև բարեկամության հենասյուներից մեկը՝ խթանելով երկխոսությունը, փոխըմբռնումը և համագործակցությունը երկու ժողովուրդների միջև։ Նա նաև ընդգծեց տարիների ընթացքում Վառնայի հայ համայնքի արժեքավոր ներդրումը քաղաքի մշակութային, տնտեսական և սոցիալական կյանքում՝ նշելով, որ այն շարունակում է ծառայել որպես բնական կամուրջ Հայաստանի և Բուլղարիայի միջև։
Միջոցառմանը մասնակցել են խորհրդարանի անդամներ, տեղական իշխանությունների ներկայացուցիչներ, հայ համայնքի ներկայացուցիչներ, արվեստագետներ, մշակութային գործիչներ և բազմաթիվ հյուրեր։
orer.eu
