Երևան, Հայաստան, — TUMO-ն հայտարարել է, որ 2026 թվականի սեպտեմբերի 20-ին Լոս Անջելեսի Vibiana համալիրում կանցկացնի իր 15-ամյակին նվիրված գալա երեկոն։ Միջոցառումը կհամախմբի բարերարների, նորարարների և աջակիցների՝ նշելու TUMO-ի գործունեության տասնհինգ տարիների ձեռքբերումները և միջոցներ հայթայթելու կազմակերպության՝ Հայաստանի ողջ տարածքում ընդլայնման հաջորդ փուլն իրականացնելու համար։
Այս հոբելյանական միջոցառման ընթացքում կպարգևատրվեն երեք տեսլական առաջնորդներ, որոնց ներդրումը վճռորոշ դեր է ունեցել TUMO-ի առաքելության առաջխաղացման և Հայաստանի տեխնոլոգիական ու ստեղծարար էկոհամակարգի ամրապնդման գործում.
- Վահե Կուզոյան – ServiceTitan-ի համահիմնադիր և նախագահ
- Ռև Լեբարեդյան – NVIDIA-ի Omniverse և Simulation Technology բաժնի փոխնախագահ
- Արա Մահդեսյան – ServiceTitan-ի տնօրենների խորհրդի նախագահ, համահիմնադիր և գլխավոր գործադիր տնօրեն (CEO)
2011 թվականին Երևանում հիմնադրված TUMO ստեղծարար տեխնոլոգիաների կենտրոնը ստեղծվել է մեկ պարզ համոզմունքի հիման վրա. եթե դեռահասներն ունենան առաջադեմ տեխնոլոգիաների և դիզայնի կրթության անվճար հասանելիություն, նրանք կկարողանան բացահայտել իրենց ներուժը, կառուցել հաջող ապագա և դառնալ իրենց համայնքների զարգացման շարժիչ ուժը։
Տասնհինգ տարի անց այդ համոզմունքը վերածվել է համաշխարհային ուսուցման ցանցի, որն արդեն հասել է ավելի քան 100,000 երիտասարդի։ TUMO-ի ինքնուրույն ուսումնառության մոդելի, ոլորտի առաջատար մասնագետների վարած աշխատարանների և գործնական նախագծային լաբորատորիաների շնորհիվ ուսանողները ձեռք են բերում հմտություններ ուսուցման 14 ուղղություններով, այդ թվում՝ գեներատիվ արհեստական բանականություն (GenAI), ծրագրավորում, անիմացիա, ռոբոտաշինություն, կինոարտադրություն, երաժշտական պրոդյուսինգ և այլ ոլորտներ՝ միաժամանակ զարգացնելով ստեղծարարությունը, դիմակայունությունը և համագործակցության կարողությունները, որոնք անհրաժեշտ են ժամանակակից աշխարհում հաջողելու համար։
Ամեն շաբաթ տասնյակ հազարավոր դեռահասներ հաճախում են TUMO-ի կենտրոններ և ուսումնական տարածքներ Հայաստանում և աշխարհի տարբեր երկրներում՝ դառնալով երիտասարդ ստեղծարարների և նորարարների աճող միջազգային համայնքի մի մասը։
Գալա երեկոյի բոլոր ծախսերը հոգացել են բարերարները, ինչի շնորհիվ երեկոյի ընթացքում հավաքագրված միջոցների 100 տոկոսը կուղղվի TUMO-ի ծրագրերի ընդլայնմանը և Հայաստանի գյուղական համայնքներում նոր TUMO կենտրոնների և TUMO Box-երի ստեղծմանը։
«Քանի որ TUMO-ն թևակոխում է իր զարգացման հաջորդ փուլը, մեր ուշադրության կենտրոնում է գերհմտացող (superlearners) սերնդի պատրաստումը՝ երիտասարդների, որոնք կունենան տեխնիկական գիտելիքներ, հետաքրքրասիրություն և հարմարվողականություն, որոնք անհրաժեշտ են արագ փոփոխվող աշխարհում հաջողելու համար», — նշել է TUMO-ի գլխավոր գործադիր տնօրեն Մարի Լու Փափազյանը։
orer.eu
