CCAF-ի հայտարարությունը
Ֆրանսիայի հայկական կազմակերպությունների համակարգող խորհուրդը (CCAF) ողջունում է Իսրայելի Պետության՝ 1915 թվականի Հայոց ցեղասպանությունը պաշտոնապես ճանաչելու պատմական որոշումը։
Երկար տարիներ սպասված այս քայլը կարևոր առաջընթաց է պատմական ճշմարտության հաստատման գործում՝ ընդդեմ այն ճնշումների, ահաբեկման և պետական մակարդակով ժխտողականության, որոնք Թուրքիան ավելի քան մեկ դար դարձրել է իր արտաքին քաղաքականության հիմնասյուներից մեկը։
Այս ճանաչումը նաև անփոխարինելի բարոյական հատուցում է Քսաներորդ դարի առաջին ցեղասպանության 1,5 միլիոն զոհերի, ինչպես նաև նրանց ժառանգների համար, ովքեր ավելի քան մեկ դար շարունակ պաշտպանել են կորուսյալների հիշատակը, արդարությունն ու ճշմարտությունը։
Այս պայքարը շարունակում է մնալ արդիական։ Ցավոք, հայերի բնաջնջումն ու նրանց հայրենի հողերից վերացումը միայն անցյալի իրադարձություն չէ։ 2023 թվականին Ադրբեջանի կողմից, Թուրքիայի ակտիվ աջակցությամբ, իրականացված Լեռնային Ղարաբաղի էթնիկ զտումը կրկին ցույց տվեց, որ պանթուրքիստական գաղափարախոսությունն ու ատելության քաղաքականությունը շարունակում են գոյաբանական սպառնալիք ներկայացնել հայ ժողովրդի համար։
Հատկապես կարևոր է, որ Իսրայել պետությունը, որը ծնվել է Շոայի մոխիրներից և կրում է ցեղասպանության համամարդկային հիշողությունը, որոշեց հրաժարվել իրապաշտ քաղաքականության (realpolitik) նկատառումներից և այս հանցագործությունն անվանել իր իսկական անունով։ Ինչպես հայտարարել է Իսրայելի արտգործնախարարը. «Ճիշտ քայլ կատարելու համար երբեք ուշ չէ»։ Այս խոսքերը ակնհայտ ճշմարտություն են. լռությունն ու ժխտումը երբեք չեն պահպանում խաղաղությունը, այլ, ընդհակառակը, խրախուսում են հանցագործությունների կրկնությունը։
Այս որոշմամբ Իսրայելը վերադառնում է այն արդարության, ճշմարտության և պատասխանատվության արժեքներին, որոնք հիմք են հանդիսացել նրա ստեղծման համար։ Ճանաչելով Հայոց ցեղասպանությունը՝ այն հիշեցնում է, որ զոհերի հիշատակը չի կարող ստորադասվել տվյալ պահի դիվանագիտական շահերին։
Վերջապես, CCAF-ը հույս է հայտնում, որ այս պատմական որոշումը Թուրքիային նույնպես կմղի իրական ճշմարտության հետ առերեսվելու աշխատանքին։ Ժամանակն է, որ Անկարան դադարի իրեն ներկայացնել որպես երիտթուրք ղեկավարների ժխտողականության քաղաքական ժառանգորդ, հրաժարվի ցեղասպանության պատասխանատուների փառաբանումից և վերջապես ճանապարհ հարթի այնպիսի հաշտեցման համար, որը հիմնված կլինի փաստերի ճանաչման, արդարության և զոհերի հիշատակի նկատմամբ հարգանքի վրա։
Ճշմարտության ճանաչումը ուղղված չէ որևէ ժողովրդի դեմ։ Ընդհակառակը, այն ազգերի միջև կայուն խաղաղության և ապագայի հանցագործությունների կանխարգելման հիմնական նախապայմանն է։
CCAF-ի ազգային գրասենյակ
2026 թվականի հունիսի 28
