Լրտեսության համար կասկածվող BND գերմանական հետախուզության նախկին ղեկավար Ավգուստ Հանինգը, ենթադրվում է, գաղտնի փաստաթղթերից վերլուծական զեկույց է պատրաստել Ադրբեջանի հատուկ ծառայությունների համար: Այդ մասին հոկտեմբերի 6-ին հայտնել է գերմանական Der Spiegel պարբերականը՝ հղում անելով իր սեփական աղբյուրներին։
Ըստ նրանց տվյալների՝ Հանինգը կասկածվում է ավելի քան 2000 գաղտնի փաստաթուղթ անօրինական կերպով ձեռք բերելու համար։ Բացի այդ, հետաքննությունը ստուգում է կասկածը, որ BND-ի նախկին ղեկավարը կապ է պահպանել Ադրբեջանի գործակալի հետ։
«Հետաքննության համաձայն՝ Հանինգը, ենթադրաբար, գաղտնի փաստաթղթեր է ստացել BND-ում աշխատակազմի իր նախկին ղեկավար Մանֆրեդ Դ.-ի միջոցով, ապա դրանք օգտագործել է գրավոր վերլուծություն պատրաստելու համար», – գրում է Der Spiegel-ը։
Պարբերականը հայտնում է, որ փաստը, որ Հանինգը շփումներ է ունեցել Ադրբեջանի ներկայացուցիչների հետ, կասկած չի հարուցում: Մասնավորապես, նա եղել է գերմանա-ադրբեջանական ֆորումի վարչության կազմում, ինչը հետևում է կազմակերպության 2025 թվականի հուլիսի պաշտոնական հաղորդագրությունից:
Հետախուզական գործակալության 80-ամյա նախկին ղեկավարը կարող է դատապարտվել վեց ամսից մինչև տասը տարվա ազատազրկման, եթե մեղավոր ճանաչվի հանուն օտարերկրյա պետության շահերի լրտեսության համար:
Հաննինգի նկատմամբ հետաքննությունը սկսվել է 2025 թվականի սեպտեմբերին նրա տան և գրասենյակների խուզարկություններից հետո մեկ այլ գործի շրջանակում՝ գործարարուհի Քրիստինա Բլոկի երեխաների ենթադրյալ առևանգման վերաբերյալ։ Առգրավված նյութերն ուսումնասիրելիս ոստիկանությունը հայտնաբերել է Գերմանիայի Դաշնային Հանրապետության հետախուզության գաղտնի փաստաթղթերով էլեկտրոնային կրիչ։ Դրանից հետո նյութերը փոխանցվել են դաշնային իշխանություններին, և 2026 թվականի մայիսին Գլխավոր դատախազությունը հետաքննություն է սկսել Հաննինգի և հետախուզական ծառայությունում տեղեկատվության ենթադրյալ աղբյուրի նկատմամբ։
ԱԶԳ
