Թուրքիայի արտաքին գործերի նախարարությունը դատապարտել է Իսրայելի կողմից Հայոց ցեղասպանությունը ճանաչելու որոշումը։
«Իսրայելի կառավարությունը, որ ամբողջ աշխարհի աչքի առաջ ճնշում է պաղեստինցի ժողովրդին և դատվում է Միջազգային դատարանում Գազայի ժողովրդի դեմ ցեղասպանություն կատարելու համար, նպատակ ունի թաքցնել սեփական հանցագործությունները` 1915թ․ իրադարձությունների վերաբերյալ իր կողմից ընդունված քաղաքական որոշմամբ»- ասված է հայտարարության մեջ:
Ադրբեջանի արտաքին գործերի նախարարությունը նույնպես մտահոգություն է հայտնել Իսրայելի կառավարության՝ «Հայոց ցեղասպանության» ճանաչման վերաբերյալ որոշման կապակցությամբ։ Ադրբեջանական կողմը 1915 թվականի իրադարձությունների վերաբերյալ որևէ գնահատական համարում է պատմական ճշմարտության խեղաթյուրում և պնդում է, որ դրանք չունեն իրավական կամ գիտական հիմքեր։
«Նման քայլերը չեն նպաստում հաշտեցմանը և փոխըմբռնմանը, ընդհակառակը, դրանք խորացնում են առկա հակասությունները և խոչընդոտում տարածաշրջանում կայուն խաղաղության և հաշտեցման հասնելու ջանքերին», – ասվում է հայտարարության մեջ։
Ադրբեջանի արտաքին գործերի նախարարությունը կոչ է արել Իսրայելի կառավարությանը վերանայել իր որոշումը։
