Լուսանկարում՝ մրցանակը ընդունել է դեսպան Ծովինար Համբարձումյանը
2026 թվականի հունիսի 6-ին Բուլղարիայի Հանրապետությունում ՀՀ դեսպան Ծովինար Համբարձումյանը մասնակցել է Սոֆիայում կայացած հինգերորդ «Golden FEMI» միջազգային կինոփառատոնի Գալա մրցանակաբաշխությանը եւ արարողության ընթացքում ընդունել է երիտասարդ հայ կինոռեժիսոր Միլենա Հովհաննիսյանի մրցանակը, որը նրան շնորհվել էր փառատոնի միջազգային ժյուրիի կողմից «Հոգևոր ուժ» վավերագրական ֆիլմի համար։ Այս մասին հայտնում է Հայաստանի դեսպանությունը։
«Golden FEMI» կինոփառատոնը միջազգային մշակութային միջոցառում է, որը նվիրված է շրջակա միջավայրի վերաբերյալ իրազեկվածության, սոցիալական ներգրավվածության, կինոյում կանանց նվաճումների, ինչպես նաև հասարակության խոցելի խմբերին աջակցության, մարդկային արժանապատվության և համերաշխության արժեքների խթանմանը։
Վավերագրական «Հոգևոր ուժ» ֆիլմը մի մարդու ոգեշնչող պատմություն է. ողբերգական վթարի ժամանակ երկու ձեռքերը կորցնելուց հետո ֆիլմի հերոսը բախվել է հսկայական մարտահրավերների, սակայն հաղթահարել է դրանք դիմադրողականության, ստեղծագործ մտքի և նպատակասլացության միջոցով՝ որպես գյուտարար ու նորարար շարունակելով մեծ ներդրում ունենալ հասարակության մեջ։
Ֆիլմն այս բարձր ճանաչմանն Է արժանացել իր հզոր մարդկային ուղերձի և գեղարվեստական արժեքի համար։
Հայաստանի դեսպանը շնորհակալություն է հայտնել փառատոնի կազմակերպիչներին՝ միջմշակութային կարևոր երկխոսության հարթակ ստեղծելու համար և ընդգծել կինոյի կարևոր դերը համընդհանուր արժեքների, փոխըմբռնման և մարդկային արժանապատվության նկատմամբ հարգանքի խթանման գործում։
Դեսպանը նաև ընդգծել է Հայաստանի և Բուլղարիայի միջև երկկողմ համագործակցության կարևորությունը՝ նշելով, որ գեղարվեստական և մշակութային փոխանակումները շարունակում են ամրապնդել երկու երկրների միջև երկարատև բարեկամությունը։
Բուլղարիայում Հայաստանի Հանրապետության դեսպանությունը ի սրտե շնորհավորում է Միլենա Հովհաննիսյանին այս պատվավոր մրցանակի կապակցությամբ և մաղթում նրան շարունակական հաջողություններ իր ապագա ստեղծագործական ջանքերում։
orer.eu
