Հայ դահուկորդ Միքայել Միքայելյանը տուգանվել է Իտալիայում անցկացվող Tour de Ski մրցաշարի մեկնարկի ժամանակ իր մարզահագուստի վրա «Ադրբեջան» բառը փակելու համար։
Դահուկային սպորտի և սնոուբորդի միջազգային ֆեդերացիան Ադրբեջանի պետական զբոսաշրջության գործակալության հետ ստորագրել է 5-ամյա պայմանագիր, և մի շարք մրցումների ընթացքում մարզիկների համազգեստների վրա հայտնվում է «Կրակի երկրի» անվանումը։
Միքայելյանը որոշել էր իր անհանդուրժողականությունը դրսևորել՝ փակելով գրությունը։
Աղբյուր՝ ԱԶԳ
Քաղաքագետ Արա Պապյանն այսպես է արձագանքել իր ֆեյսբուքյան էջում՝
Ապրի մեր տղան՝ հիշենք անունը Միքայել Միքայելյան։ Արժանապատվություն ունի։ Կարող էլ հազար ու մի պատրվակ բռնել, ասել՝ հո ես չեմ դրել, միջազգային ֆեդերացիան է արել։ Չի ասում բենզինը բենզին է, թող մի քիչ էլ մեջը արյուն լինի։
Իսկ Մամուլի Ազգային ակումբի նախագահ Նարինե Մկրտչյանը գրել է .
ՀՀ վարչապետ Նիկոլ Փաշինյանին այդպես էլ չհաջողվեց Ադրբեջանի վրայից քերել-մաքրել ագրեսորի և Հայաստանի թշնամու խարանը և տապալվեց Ալիևից «խաղաղասեր» կերտելու օպերացիան։ Կեղծ գաղափարները և պետական մակարդակի հասցված պարտադրանքն անէացան առնվազն մինչև փաշինյանական հաջորդ փորձը։
Ինչպես տեղեկացնում է «Ազգը»՝ «հայ դահուկորդ Միքայել Միքայելյանը տուգանվել է Իտալիայում անցկացվող Tour de Ski մրցաշարի մեկնարկի ժամանակ իր մարզահագուստի վրա «Ադրբեջան» բառը փակելու համար։ Դահուկային սպորտի և սնոուբորդի միջազգային ֆեդերացիան Ադրբեջանի պետական զբոսաշրջության գործակալության հետ ստորագրել է 5-ամյա պայմանագիր», համաձայն որոնց մարզահագուստների վրա նշվում է Արդբեջանի անունը։
Հայ մարզիկը, իհարկե, տուգանք կվճարի դրա համար, բայց դրանով կպահպանի Հայաստանի պետության և ժողովրդի արժանապատվությունը, որից ՀՀ գործող կառավարիչներն անվերջ մասնահանումներ են անում։
orer.eu
