Հայաստանի թատերական գործիչների միությունը եւ Հայաստանի կինոգործիչների միությունը ցավով տեղեկացնում են, որ կյանքից հեռացել է կինոյի և թատրոնի տաղանդավոր դերասան, ռեժիսոր, Հայաստանի կինոգործիչների և թատերական գործիչների միության անդամ, Հայաստանի ժողովրդական արտիստ ԳՈՒԺ ՄԱՆՈՒԿՅԱՆԸ։
ԳՈՒԺ ՄԱՆՈՒԿՅԱՆԸ ծնվել է գրող, արձակագիր, դրամատուրգ, թատերագետ Ալեքսանդր Մանուկյան – Արաքսմանյանի ընտանիքում։ Արաքսմանյանի նախնիները Վանից էին և հաստատվել էին Գյումրիում։
Գյումրիում էլ ծնվում են Արաքսմանյանի երկու որդիները՝ Էմանուել և Գուժ Մանուկյանները, տղաներ, որոնք իրենց դաստիարակությունն ստանում են գյումրեցի Իզաբելլա տատիկից, քանի որ հայրն ու մայրը նվիրվել էին թատերական աշխարհին։
ԳՈՒԺ ՄԱՆՈՒԿՅԱՆՆ ավարտել է Երևանի գեղարվեստաթատերական ինստիտուտի դերասանական ֆակուլտետը՝ դառնալով հայ կինոյի և թատրոնի լավագույն երիտասարդ դերասաններից մեկը։
Նրա կերտած բազում սիրելի կերպարները թե կինոյում, թե թատրոնում հայ մշակութային կյանքի լավագույն դրսևորումներից են և մշտապես մնալու են հանդիսատեսին թանկ ու հարազատ։
Ցավակցում ենք ԳՈՒԺ ՄԱՆՈՒԿՅԱՆԻ ընտանիքի անդամներին, մերձավորներին, նրա արվեստի երկրպագուներին։
ԳՈՒԺ ՄԱՆՈՒԿՅԱՆԻ կորուստը մեծ կորուստ է հայ թատրոնի և կինոյի համար։
