Իսրայելի արտաքին գործերի նախարար Գիդեոն Սաարը հանդիպել է Ադրբեջանի էկոնոմիկայի նախարար Միքայիլ Ջաբարովի հետ՝ տնտեսական և էներգետիկ հարաբերությունների ընդլայնման նպատակով։
Ջաբարովը ստորագրել է համաձայնագիր, որով Ադրբեջանի պետական նավթային ընկերությանը (SOCAR) տրվում են Իսրայելի բացառիկ տնտեսական գոտում գազի հետախուզման համատեղ իրավունքներ։
Հանդիպման ընթացքում քննարկվել են նաև ներդրումային նոր հնարավորություններ, և նախատեսվում է մոտ ապագայում գումարել Ադրբեջանի և Իսրայելի համատեղ տնտեսական հանձնաժողովի նիստը։
Երկու երկրների միջև համագործակցությունը վերջին տարիներին զգալիորեն խորացել է, հատկապես էներգետիկ և պաշտպանական ոլորտներում։
Միջերկրական ծովում Իսրայելի գազային պաշարները տարածաշրջանային ռազմավարական կարևորություն ունեն, և նոր համաձայնագիրը կարող է ազդել տարածաշրջանային էներգետիկ բալանսի վրա։
Տարածաշրջանի որոշ երկրներ, այդ թվում՝ Իրանն ու Թուրքիան, կարող են անհանգստանալ այս զարգացումներից, քանի որ Իսրայել-Ադրբեջան հարաբերություններն ամրապնդվում են։
