«Անին իր աշխատանքով ինձ համար թանգարանի տնօրենի չափանիշ է». Արքեմենիկ Նիկողոսյան

  • 03.11.2023
  • 0
  • 134 Views

ԿԳՄՍ նախարարի հրամանով Հովհաննես Թումանյանի թանգարանի տնօրենի պաշտոնից Անի Եղիազարյանի ազատմանն իր ֆեյսբուքյան էջում անդրադարձել է գրականագետ Արքեմենիկ Նիկողոսյանը։

Նա մասնավորապես գրել է.

«Այս միջակությունների, չմո հավակնոտների անարժեք ու անսկզբունք ժամանակներում, եթե մարդու հետևից այսպես ասած՝ ընկած ես, անպայման, ցավոք, անպայման կգտնես, մեծ ճիգերով, ջանքով, անգամ ստորանալու գնով կգտնես որևէ պատճառ, առիթ՝ նրան վնասելու և ուզածիդ հասնելու: Ես հաստատ չգիտեմ, գուցե ֆորմալ պատճառն իրոք կա, բայց այդ ֆորմալություններն ու հազարումի … չինովնիկական ձևականություններն ինձ համար գրոշի արժեք չունեն այս դեպքում, որովհետև կա Ani Yeghiazaryan-ի խոսքը, իսկ Անին այն մարդն է, որին հատկապես այս դեպքում հավատում ու վստահում եմ անվերապահորեն: Թող ինձ ներեն մյուս թանգարանների տնօրենները, որոնցից շատերն իմ ընկերներն ու մտերիմներն են, բայց Անին իր աշխատանքով ինձ համար թանգարանի տնօրենի չափանիշ է: Սերը, գիտելիքը, նվիրվածությունը, կրեատիվությունը, գործից հասկանալը վերջապես․․․ Մի քիչ հետ նայեք ու կտեսնեք, թե նրա կատարած աշխատանքը, մշակած ու իրականացրած ծրագրերը շղթայական ինչ ռեակցիա են ունեցել մյուս թանգարանների աշխատանքների լավարկման գործում: Ու նրա դեմ դավեր նյութողը, այս ամեն ինչից ուրախացողը՝ տեսնես գիտի՞ ինչ բան է թանգարանային գործը, տեսնես գիտի՞, որ տնօրեն լինելը մենակ էդ փափուկ բազկաթոռներին վեր ընկնելն ու ինչ-որ թղթեր ստորագրելը չի, տեսնես գիտի՞, որ դա բարձր ծառայություն է բարձր արժեքների: Տեսնես գիտի՞, թե, ասենք, ինչ բան է որևէ գրողի երկերի ակադեմիական հրատարակություն ասվածը, գիտի՞ մեծի ժառանգությունն ինչ է, դրա հետ հոգատարությամբ վերաբերվելն ինչ է․․․ Ու ընդհանրապես, լիքը ի՞նչ է-ներ տեսնես գիտի՞․․․

Անիի կատարած աշխատանքն էս տարիների ընթացքում էն լավագույն ու լավատեսական մեսիջներից է, որ հնարավոր է ինչ-որ բան կարող է դեպի դրականը փոխվել էս բամբասանքներով լեցուն ու վատի, անարժեքի կույր պաշտամունքների գերի հասարակությամբ երկրում…

Ես իմ անվերապահ աջակցությունն եմ հայտնում Անի Եղիազարյանին: Նա ինձ համար այս երկրի լավ գալիքի, բարձր խոսքի ու արժեքների, նվիրյալ ու գիտակ աշխատանքի, վերջապես կիրթ ու զարգացած հասարակություն ունենալու հավատի խորհրդանիշ ու երաշխիք է: ..․»։

Մեր գործընկերները

ՕՐԵՐ ԵՎՐՈՊԱԿԱՆ ԱՄՍԱԳԻՐ
Մենք սոց․ ցանցերում