Լեհահայ կազմակերպությունները դիմել են երկրի իշխանություններին՝ Ադրբեջանի հանցավոր գործողությունները դատապարտելու եւ կանխելու պահանջով

  • 16.12.2022
  • 0
  • 272 Views

Դեկտեմբերի 16-ին Հայ-լեհական հասարակական կոմիտեի նախագահ, համատեղության կարգով Զաբժեում (Լեհաստան) ՀՀ պատվավոր հյուպատոս Հրաչյա Բոյաջյանը, Լեհաստանի հայ առաքելական եկեղեցու հոգևոր հովիվ Հայր Տարոն Վարդապետ Ղուլիկյանը, Հայ կաթողիկէ քահանա Տ. Թադեուշ Իսակովիչ-Զալևսկին, Կառավարության ազգային և էթնիկ փոքրամասնությունների համատեղ հանձնաժողովում հայ փոքրամասնության ներկայացուցիչ Բոգդան Կասպրովիչը, ինչպես նաև Լեհաստանում գործող հայկական ավանդական կազմակերպությունները համատեղ նախաձռնությամբ դիմում-նամակով դիմել են Լեհաստանի Արտաքին գործերի նախարարություն, Սեյմ և Սենատ՝ կոչ անելով խստորեն դատապարտել ադրբեջանական իշխանությունների գործողությունները և միջոցներ ձեռնարկել անհապաղ ապաշրջափակել Լեռնային Ղարաբաղը Հայաստանի հետ կապող ճանապարհը՝ Լեռնային Ղարաբաղի տարածաշրջանում հումանիտար աղետ առաջացնելուն ուղղված հետագա գործողությունները կանխելու նպատակով:

«Լեռնային Ղարաբաղում բնակվող հայերը դարձել են Ադրբեջանի անողոք ու հանցավոր քաղաքականության պատանդը, որը, եթե չկարողանա հեռացնել հայկական տարրին Լեռնային Ղարաբաղի տարածքներից, ցանկանում է նրանց կյանքը դարձնել դժոխք։ Լեհաստանի Հանրապետությունը, որպես ժողովրդավարական և օրինապաշտ երկիր, չի կարող լռել օրենքի նման բացահայտ խախտման դեմ»,- ասվում է դիմում-նամակում: Լեհահայերը նաեւ ընդգծել են, որ Լեհաստանը պետք է օգտագործի նաեւ ԵԱՀԿում իր նախագահությունը։

Կից ներկայացվում է դիմում-նամակը, որն ի դեմս ներքոնշյալ բոլոր հաստատությունների անունից ստորագրել է Հայ-լեհական հասարակական կոմիտեի նախագահ, Զաբժեում ՀՀ պատվավոր հյուպատոս Հրաչյա Բոյաջյանը։

Ավելացնենք, որ դիմումի տակ ստորագրել են Լեհաստանում գրանցված 22 հայկական կազմակերպությունների ներկայացուցիչներ։

orer.eu

Մեր գործընկերները

ՕՐԵՐ ԵՎՐՈՊԱԿԱՆ ԱՄՍԱԳԻՐ
Մենք սոց․ ցանցերում