Սոֆիայում վախճանվել է Եվրոպայի ամենահայտնի հայ աճպարարը՝ Աստորը (Անդրանիկ Արաբաջյանը)

  • 17.05.2022
  • 0
  • 234 Views

Հայկական Բարեգործական Ընդհանուր Միության Սոֆիայի գրասենյակից տեղեկացանք, որ մայիսի 16-ին Սոֆիայում 79 տարեկան հասակում վախճանվել է  Բուլղարիայի եւ Եվրոպայի ամենահայտնի հայ աճպարարը՝ մոգության վարպետ Աստորը (Անդրանիկ Արաբաջյանը)։

Նրա հետ մեր վերջին հանդիպումը տեղի էր ունեցել 2019 թվականի աշնանը, երբ պատրաստում էինք բուլղարահայությանը նվիրված ՕՐԵՐ ամսագրի հատուկ համարը։ Կյանքով լեցուն, կատակասեր, տաղանդավոր ու հայրենասեր հայորդին խոստացել էր, որ հաջորդ այցիս ցույց կտա իր կառուցած մոգության տունը՝ Կախարդական թատրոնը։

Աստորը ծնվել էր 1943 թվականի նոյեմբերի 18-ին բուլղարական Շումեն քաղաքում։ Ծնողները գաղթել էին Թուրքիայից։ Ութ տարեկանից հրապուրվել է աճպարարությամբ, ֆոկուսներով, իսկ առաջին անգամ ելույթ է ունեցել զինվորական ծառայության ընթացքում։ Նրա կյանքում մեծ դեր են խաղացել չեխական Կարլովի Վարի քաղաքում անցկացվող իլյուզոնիստների՝ աճպարարների ամենամյա փառատոնները, որտեղ բազմաթիվ մրցանակների է արժանացել։ Ապա նմանատիպ փառատոններ են կազմակերպել Բուլղարիայում։ Նրա կյանքում բացառիկ նշանակություն է ունեցել, երբ 1981 թվականին ԱՄՆ Պիտսբուրգ քաղաքում  նրան շնորհել են աճպարարության բնագավառում միջազգային ամենապատվավոր մրցանակը՝  «Ոսկե Օսկարը»։ Այդ մրցանակից հետո, երեք տարի Լաս Վեգասում է աշխատել։ Երկու անգամ նաեւ Հայաստանում է եղել, ելույթ է ունեցել տարբեր ակումբներում։

Հայտնի Իսահակ Գոգեսն իր գրքում Աստորին անվանել է «Մոգության թագավոր»։  Լույս է տեսել Աստորին նվիրված մենագրություն։ Տաղանդավոր հայը աճպարարության 1000-ից ավելի համար ուներ եւ հպարտանում էր, որ ինքը ոչ միայն աճպարար է, այլեւ դերասան։

Մեր խորին ցավակցություններն ենք փոխանցում դստերը՝ Արուսին եւ թոռիկներին։ Աստված հոգին լուսավորի։

Հակոբ Ասատրյան

Պրահա

Աստորը եւ Հակոբ Ասատրյանը Սոֆիայում, 2019թ.

Բուլղարական մամուլը Աստորի մասին

Почина известният български илюзионист Астор – bTV Новините (btvnovinite.bg)

Մեր գործընկերները

ՕՐԵՐ ԵՎՐՈՊԱԿԱՆ ԱՄՍԱԳԻՐ
Մենք սոց․ ցանցերում