ՀԱՅԱՍՏԱՆԻ ԱԶԳԱՅԻՆ ՊԱՏԿԵՐԱՍՐԱՀԸ
ներկայացնում է
«ՍԱՄՎԵԼ ՂԱԶԱՐՅԱՆ. ԱՐԱՐՄԱՆ ՈՒՂԻՆ»
ցուցահանդեսը՝ նվիրված արվեստագետի ծննդյան 75-ամյակին
Փետրվարի 12, ժ. 18:00
Երևան, Արամի 1
Քանդակագործ, գրաֆիկ Սամվել Ղազարյանի արվեստն առանձնանում է ժանրաթեմատիկ լայն ընդգրկմամբ, խորքային բովանդակությամբ և կերպարային բազմազանությամբ: Նրա ստեղծագործություններում զուգակցվում են քնարականությունը և միստիցիզմը։ Վարպետի համար արվեստի շարժիչ ուժը գաղափարն է, որը տարածության մեջ զարգանալով՝ ստանում է ձև ու բովանդակություն։ Արարման ելակետ է միտքն ու հոգին, որ անցնելով ինքնամաքրման ուղին՝ կատարսիսը, և վերածվելով գեղեցիկ արվեստի, դառնում է մտածող արվեստագետի ձգտման արտահայտություն դեպի գոյի իմացություն։ Սամվել Ղազարյանի ծավալային մտածողությունը նկատելի է նաև գծանկարչության մեջ, որտեղ դրսևորվում են նույն փիլիսոփայական խորությունը, պլաստիկական լուծումների հարստությունը և կերպարային արտահայտչականությունը, որոնք հատուկ են նրա քանդակներին։
Անկախ չափից, նյութից կամ թեմայից՝ Սամվել Ղազարյանի արվեստը կրում է մոնումենտալ հնչողություն։ Նրա յուրաքանչյուր երկ առանձնանում է ձևի արխիտեկտոնիկ կառուցվածքով, լակոնիկ ասկետիզմով և դասական համաչափության ներդաշնակ կիրառմամբ։ Ղազարյանի ստեղծագործությունները հայ քանդակագործության կարևորագույն ձեռքբերումներից են, որոնք միավորում են ավանդական ժառանգությունը, ինքնատիպ ոճական մոտեցումներն ու համամարդկային գաղափարները:
Հոբելյանական ցուցահանդեսը, որն ընդգրկում է 70-ից ավելի քանդակ և գրաֆիկակական աշխատանք, նպատակ ունի ներկայացնելու արվեստագետի արարման ուղին՝ նրա ստեղծագործությունները բոլոր փոխակերպումներով հանդերձ, որոնք ծնվել են թե՛ գիտակցված, թե՛ ինտուիտիվ՝ ի հայտ բերելով խոր բովանդակություն և սիմվոլիկա։
Ցուցահանդեսի համադրող՝ Մարիամ Դավթյան:
Սիրով հրավիրում ենք լուսաբանելու «Սամվել Ղազարյան. Արարման ուղին» ցուցահանդեսի բացումը, որը տեղի կունենա փետրվարի 12-ին, ժ. 18։00-ին:
Պատկերասրահի մուտքը՝ Արամի փողոցից։
