Կյանքից հեռացել է հայկական արմատներով լեհ հանրահայտ կոմպոզիտոր Պենդերեցկու այրին՝ Էլժբետա Պենդերեցկան, որը մեծ ներդրում ունի հայ-լեհական մշակութային կապերի ցարգացման գործում։
Դեռեւս 2017 թվականին, ՕՐԵՐ ամսագրում տպագրված մեր հարցազրույցում, Քշիշտոֆ Պենդերեցկին նշում էր, որ կինը՝ Էլժբետան շատ ակտիվ գործունեություն է վարում, հետաքրքրված է երաժշտությամբ եւ շատ է օգնել Լեհաստանում Բեթհովենի փառատոնի հիմնադրմանը եւ անցկացմանը։ Նա երկար տարիներ մասնակցել է Հայաստանում անցկացվող Արամ Խաչատրյանի մրցույթին իբրեւ ժյուրիի անդամ։
Լեհաստանում Հայաստանի դեսպանությունն տիկին Պենդերեցկայի մահվան առիթով հրապարակել է ցավակցական խոսք. «Մենք խորապես վշտացած ենք` լսելով մշակույթի և արվեստի լեհ ականավոր մեկենաս Էլժբիետա Պենդերեցկայի մահվան մասին։
Իր ողջ կյանքի նվիրվածության շնորհիվ նա ուշագրավ ներդրում է ունեցել իր ամուսնու՝ ականավոր կոմպոզիտոր Քշիշտոֆ Պենդերեցկու ժառանգության պահպանման և տարածման գործում, որի հայկական արմատները հպարտության և ոգեշնչման աղբյուր էին նրա ողջ ստեղծագործական ճանապարհորդության ընթացքում։
Մեր խորին ցավակցությունն ենք հայտնում նրա ընտանիքին և սիրելիներին։ Նրա նվիրվածությունը, շնորհը և մշակութային տեսլականը կհիշվեն խորը հարգանքով»։
Ցավակցական խոսք է գրել նաեւ Հայաստանի պետական սիմֆոնիկ նվագախմբի գլխավոր դիրիժոր Սերգեյ Սմբատյանը։
«Երեկ կյանքից հեռացավ հարգարժան Էլժբետա Պենդերեցկան։
Տիկին Պենդերեցկայի ծավալած գործունեությունը մեծապես նպաստել է բազմաթիվ մշակութային գործիչների ձևավորմանն ու զարգացմանը՝ դարձնելով նրան Լեհաստանի հպարտությունը։ Միջազգային համապատկերում՝ ներառյալ Հայաստանի, բարձր գնահատականի է արժանի նրա կատարած աշխատանքը։
Նա անգնահատելի ներդրում ունեցավ իր ամուսնու՝ Մաեստրո Քշիշտոֆ Պենդերեցկու երաժշտական ժառանգության պահպանման գործում։ Տիկին Պենդերեցկան բացառիկ մարդ էր, և երաժշտական աշխարհը մեծ կորուստ է կրել Պենդերեցկիների մահով։
Միշտ կհիշվի նրա ջերմությունն ու անկեղծ նվիրումն իր գործին»։
ՕՐԵՐ ամսագրի խմբագրակազմը ցավակցում է Պենդերեցկիների զավակներին եւ հարազատներին։
Օրեր
