ԵՐԱՆԵԼԻ ԻԳՆԱՏԻՈՍ ՄԱԼՈՅԵԱՆԻ ՍՐԲԱԴԱՍՈՒՄԻՆ ՄԱՍԻՆ ՀԱՅ ԿԱԹՈՂԻԿԷ ՊԱՏՐԻԱՐՔԱՐԱՆԻՆ ՅԱՅՏԱՐԱՐՈՒԹԻՒՆԸ
«Անհուն գոհոնակութեան ու հրճուանքին մէջ, որոնք կը լեցնեն սրտերը աննկարագրելի հոգևոր ապրումներով, Հայ Կաթողիկէ Եկեղեցին Լիբանանի, Հայաստանի և Սփիւռքի իր զաւակներուն, ինչպէս նաև համընդհանուր Եկեղեցիին կը ղօղանջէ Հայ Եկեղեցիին մէջ սրբութեան ու մարտիրոսութեան ամէնէն նշանաւոր դէմքերէն մէկուն՝ Ապրիլեան Նահատակ Երանելի Իգնատիոս Արքեպս. Մալոյեանի սրբադասումին աւետիսը:
Այսօր, 13 Յունիս 2025-ին, Նորին Սրբութիւն Լեւոն ԺԴ. Պապը սահմանեց, թէ 19 Հոկտեմբեր 2025-ին տեղի պիտի ունենայ սրբադասումին պաշտօնական արարողութիւնը Վատիկանի հրապարակին վրայ, հանդիսաւոր Ս. Պատարագին ընթացքին, որուն հաւատացեալներ պիտի մասնակցին աշխարհի չորս կողմերէն:
Այս շրջագիծէն ներս՝ Հայ Կաթողիկէ Պատրիարքարանը Հռոմի մէջ կը սկսի գործնական ու հոգևոր նախապատրաստութիւններ այս պատմական իրադարձութեան համար։ Գոհաբանական պատարագներ պիտի մատուցուին Հռոմի, Լիբանանի, Մարտինի եւ այլ քաղաքներու մէջ, ուր հաւատացեալները պիտի համախմբուին ու պիտի խորհրդածեն ուրախութեամբ եւ աղօթքով Հայոց Ցեղասպանութեան այս Նահատակին կենսուղիին մասին։
Այս սրբադասումը կը մարմնաւորէ հաւատարմութեան ու հաւատքի ճանապարհորդութեան գագաթնակէտը: Կենդանի ու կենդանարար յոյսին նշանն է այն Եկեղեցիին համար, որ տուած է նահատակներ՝ վկայելով Քրիստոսի յարութեան մասին: Միաժամանակ նոր կոչ մըն է իւրաքանչիւր հաւատացեալին համար՝ ընթանալու սրբութեան ճանապարհով աշխարհին մէջ, որ կը փնտռէ ճշմարտութիւնը, լոյսն ու հաստատակամութիւնը»։
orer,eu
