Մարտի 10-ից 12-ը Պարդուբիցեի կամերային ֆիլհարմոնիան իր երաժշտասերներին ներկայացրեց Բեթհովենի դաշնամուրի առաջին կոնցերտը հունգարացի դաշնակահարուհի Կլարա Վյուրցի հիանալի կատարմամբ։ Համերգը ղեկավարել է հայ դիրիժոր Վահան Մարտիրոսյանը, որը սեպտեմբերից դառնալու է Պարդուբիցեի կամերային ֆիլհարմոնիկի գլխավոր դիրիժորը։
Ընդհանրապես, վերջին տասը տարիներին հայ դիրիժորը բազմիցս հանդես է եկել այս նվագախմբի հետ, կատարել ձայնագրություններ տարբեր նախագծերի շրջանակներում։
Ինչպես նշում է klasikaplus.cz կայքէջը, Մարտիրոսյանն իր երաժշտական կրթությունը եւ գործունեությունը սկսել է Երևանի կոնսերվատորիայում, Հայաստանում։ Նա ուսանել է Փարիզում և սկսել է աշխատել որպես դաշնակահար։ Վերջին տարիներին նա ավելի աչքի է ընկել որպես դիրիժոր։ Նա իբրեւ դիրիժոր ղեկավարել է Ֆրանսիայի Կանի սիմֆոնիկ նվագախումբը և Հայաստանի պետական կամերային նվագախումբը, որտեղ նա եղել է նաեւ երաժշտական ղեկավար: 2020 թվականի հունվարից նա ղեկավարել է Վալոնիայի թագավորական նվագախումբը, որի հետ հանդես է եկել Բրյուսելում Եղիսաբեթ թագուհու մրցույթում։
klasikaplus.cz կայքէջը նաեւ գրում է .
« Վահան Մարտիրոսյանը իր հեռատեսութեամբ ու տեսանելի շնորհքով երաշխավորեց, որ արդյունքը եղավ ոչ թե ազատ մեկնաբանական խառնաշփոթը, այլ բոլոր գործիքային խմբերի անդամների վիրտուոզության փոքրիկ ցուցադրումը։
Նա արդեն հայտնի է Արևելյան Բոհեմիայի հանրությանը. անցած տարի նրան վստահեցին Պարդուբիցեի երաժշտական գարուն փառատոնի բացման համերգի ղեկավարումը։ Նա ինքն էլ չի թաքցնում իր բնական հայկական խառնվածքը, բայց միևնույն ժամանակ փայլում է այն պարտիտուրների գիտելիքներով, որոնց հետ գործ ունի, ունենալով նաեւ կարգուկանոնի և իր հաստատակամ ժեստերը կառավարելու զգացում»։
Հիշեցնենք, որ անցյալ տարի մարտի 4-6-ը իտալացի հանրահայտ ֆլեյտահար Մասիմո Մերչելլին հանդես է եկել Պարդուբիցեի կամերային ֆիլհարմոնիայի հետ՝ նվագելով Մոցարտի և Պուլենկի ստեղծագործություննները կրկին հայազգի դիրիժոր Վահան Մարտիրոսյանի ղեկավարությամբ։
orer.eu
Լուսանկարներ անցյալ տարվա համերգից։
