Ուրախ ենք տեղեկացնելու, որ վերջերս լոյս տեսաւ դոկտ. Աբէլ քհնյ. Մանուկեանի «The Deaconesses of the Armenian Church» խորագրով անգլերէն աշխատասիրութիւնը։ Առկան կը հանդիսանայ Ֆրիպուրկի համալսարանի էքումենիք ինստիտուտի Studia Oecumenica Friburgensia մատենաշարի 113-րդ հատորը, որ հրատարակուեցաւ Aschendorff Verlag-ի կողմէ օգոստոս 2024 թուականին Միւնսթերի մէջ։
Գիրքը կը հանդիսանայ հեղինակին տարիներու լուրջ եւ հետեւողական հետազօտութեանց արդիւնքը եւ լոյս կը սփռէ քրիստոնեայ եկեղեցիներու մէջ կարեւոր, բայց յաճախ անտեսուած աւանդոյթի մը վրայ՝ կանանց դերը որպէս ձեռնադրուած սարկաւագուհիներ: Յատկապէս կեդրոնանալով Հայ առաքելական եկեղեցւոյ աւանդութեան վրայ՝ ան կը քննէ պատմական այն կարեւորագոյն դերակատարութիւնը, որ սարկաւագուհիներ ունեցած են քրիստոնեայ համայնքներու կեանքին մէջ: Արդարեւ, հեղինակը փաստացի վկայութիւններով ցոյց կու տայ, թէ կանայք որպէս սարկաւագուհիներ ինչպիսի՛ նշանակալից ներդրումներ ունեցած են եկեղեցւոյ թէ՛ ծիսական եւ թէ ծառայասիրական առաքելութեանց մէջ։
Այսօր, երբ Ուղղափառ եւ Հռոմէական կաթողիկէ եկեղեցիներուն մէջ լուրջ խօսոյթ մը կը զարգանայ այս հնագոյն աւանդոյթը վերականգնելու ուղղութեամբ, «The Deaconesses of the Armenian Church» հատորը ակադեմական կարեւոր տուելաներ եւ նոր հեռանկարներ կը հաղորդէ աստուածաբաններու, պատմաբաններու, նաեւ բոլոր անոնց, որոնք հետաքրքրուած են արծարծուած նիւթով։
Գիրքը այժմ հասանելի է եւ կարելի է պատուիրել ուղղակի Aschendorff Verlag-էն:
