ՍՏԵՓԱՆԱԿԵՐՏ, 15 հուլիսի, ԱՐՑԱԽՊՐԵՍ-ԱՐՄԵՆՊՐԵՍ: ԵՄ խորհրդի նախագահ Շառլ Միշելն անհրաժեշտ է համարում Լաչինի միջանցքի ապաշրջափակումն ու նշում, որ ստեղծված իրավիճակը չի բխում որևէ կողմի շահերից։ Ինչպես հաղորդում է «Արմենպրես»-ի թղթակիցը Բրյուսելից, Միշելը նման հայտարարություն է արել ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիեւի հետ եռակողմ հանդիպումից հետո լրագրողների հետ զրույցում։
«Քննարկվեցին հստակ քայլեր, որպեսզի օգնենք իրավիճակը նորից վերադառնա իր նորմալ ընթացքին։ Ես ընդգծեցի Լաչինի միջանցքի բացման անհրաժեշտությունը, նկատեցի Ադրբեջանի պատրաստակամությունը Աղդամով հումանիտար օգնություն հասցնելու հարցում։ Եվրամիությունը շարունակում է ներգրավված լինել, որպեսզի Լեռնային Ղարաբաղի նախկին ինքնավար մարզի ներկայացուցիչների եւ Բաքվի միջեւ բանակցություններ սկսվեն, որոնք կարեւոր են` տեղի հայ բնակչության իրավունքների եւ անվտանգության հարցերը քննարկելու համար»,-նշել է ԵՄ խորհրդի նախագահը։
Եվրոպական խորհրդի նախագահն ուշադրություն է հրավիրել Լեռնային Ղարաբաղի ժողովրդի հումանիտար ճգնաժամի հետ առերեսվելու փաստի վրա եւ ընդգծել, որ Լաչինի միջանցքի շուրջ առկա իրավիճակն անկայուն է։
Նրա խոսքով` հանդիպմանը կողմերը վերահաստատել են, որ ճանաչում են միմյանց տարածքային ամբողջականությունը։
ԵՄ խորհրդի նախագահը հավելել է, որ քննարկման առարկա դարձած` սահմանների դելիմիտացիան պետք է իրականացվի ըստ Ալմաթիի հռչակագրի։ Միշելն ընդգծել է, որ եռակողմ հանդիպմանը քննարկվել են գերիների և սխալմամբ մյուս կողմ անցած զինվորների հարցերը։
Միշելը հիշեցրել է, որ Հայաստանի և Ադրբեջանի ղեկավարների մասնակցությամբ ևս մեկ` այս անգամ հնգակողմ (Հայաստան, Ադրբեջան, ԵՄ, Ֆրանսիա, Գերմանիա) հանդիպում է ծրագրվում աշնանը Գրանադայում։
Artsakhpress.am | Արցախի անկախ լրատվական գործակալություն
Իր հերթին, Հայաստանի վարչապետի մամուլի ծառայությունը հայտնում է, որ հանդիպման ընթացքում քննարկվել են Ադրբեջանի կողմից Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված խորացող հումանիտար ճգնաժամին, երկու երկրների միջև սահմանազատման և սահմանային անվտանգության ապահովման աշխատանքներին, տարածաշրջանային տրանսպորտային և տնտեսական ենթակառուցվածքների ապաշրջափակմանը, Հայաստանի և Ադրբեջանի միջև հարաբերությունների կարգավորման համաձայնագրին, Լեռնային Ղարաբաղի ժողովրդի իրավունքների և անվտանգության հասցեագրմանը, ինչպես նաև գերիների, անհետ կորածների և այլ հումանիտար խնդիրներին վերաբերող հարցեր:
Պայմանավորվածություն է ձեռք բերվել ակտիվացնել աշխատանքները քննարկված հարցերի կարգավորման ուղղությամբ:
