Հայաստանի եւ Սլովակիայի միջեւ դիվանագիտական հարաբերությունների 30-ամյակի առթիվ Սլովակիայի պետական փոստը թողարկել է «Տաթեւի վանք-Հայաստան» փոստային նամականիշը։
Այդ առթիվ Սլովակիայում Հայաստանի Հանրապետության Պատվո հյուպատոս Բագրատ Հակոբյանը շնորհակալություն է հայտնել Սլովակիայի Հանրապետության տրանսպորտի և շինարարության նախարար Անդրեյ Դոլեժալին, Սլովակիայի փոստի գլխավոր տնօրեն պարոն Մարտին Յուպտակին եւ փոստի բոլոր պաշտոնյաներին հյուրընկալության համար, որի շնորհիվ հնարավոր եղավ իրականացնել Հայաստանի հետ փոստային նամականիշի համատեղ թողարկումը՝ նվիրված Հայաստանի և Սլովակիայի միջև դիվանագիտական հարաբերությունների հաստատման 30-ամյակին։ Այն ուժի մեջ է մտել այսօր՝ 2023թ. փետրվարի 28-ին։
Նամականիշի վրա պատկերված է սլովակ նկարիչ Պետր Աուգուստովիչի Տաթեւի վանքային համալիրի գեղանկարը։ Նամականիշի գինը մեկ եվրո է։ Նույն հեղինակի մի այլ գործ՝ Նիտրիանսկա Բլատնիցայում գտնվող 9-րդ դարի Սուրբ Գեւորգ եկեղեցու պատկերով, որը խորհրդանշում է Սլովակիան, նույնպես թողարկվել է Բրատիսլավայում։
Այս երկու նամականիշների հայերեն տարբերակները թողարկվել են նաեւ Երեւանում։ Այդ մասին հայտնել է նաեւ Հայփոստը, նշելով, որ փետրվարի 28-ին շրջանառության մեջ են դրվել երկու նամականիշ՝ նվիրված «Հայաստան-Սլովակիա համատեղ թողարկում» թեմային:
Նամականիշերի մարումն իրականացրեցին Հայաստանի Հանրապետության բարձր տեխնոլոգիական արդյունաբերության նախարարի տեղակալ Դավիթ Սահակյանը, Հայաստանի Հանրապետության արտաքին գործերի նախարարության գլխավոր քարտուղար Բորիս Սահակյանը, Հայաստանում Սլովակիայի Հանրապետության արտակարգ և լիազոր դեսպան Միրոսլավ Հացեկը, «ՀայՓոստ» ընկերության գլխավոր գործադիր տնօրեն Արայիկ Աբրահամյանը, Ֆիլատելիստների հայկական ասոցիացիայի նախագահ Հովիկ Մուսայելյանը:
Փոստային նամականիշերից յուրաքանչյուրն Հայաստանում ունի 400 ՀՀ դրամ անվանական արժեք:
orer.eu
