Իսպանիայի Պատգամավորների Կոնգրեսը հինգշաբթի օրը 174 կողմ, 132 դեմ քվեարկությամբ մերժել է Ադրբեջանի Հանրապետության հետ ստորագրված միջազգային համաձայնագիրը, հայտնում է El Confidencial-ը։
2021 թվականի դեկտեմբերի 14-ին Մադրիդում ստորագրված դիվանագիտական համաձայնագիրը նախատեսում էր գաղտնի տեղեկատվության փոխանակում և այդ տեղեկատվության պաշտպանություն։
Պատգամավոր Յոն Ինյարիտուն (EH Bildu) համաձայնագիրը «անհեթեթություն» է անվանել՝ հատկապես հաշվի առնելով, որ ադրբեջանական ռեժիմը «ագրեսոր» է և հակամարտության մեջ է Հայաստանի հետ։
ERC-ի պատգամավոր Մարտա Ռոսիքը դատապարտել է Իսպանիայի կառավարությանը Հայաստանի և Լեռնային Ղարաբաղի դեմ Ադրբեջանի իրականացրած ագրեսիայի առնչությամբ լուռ մնալու համար։ Նա նաև քննադատել է, որ Իսպանիան մինչ օրս չի ճանաչել «այնպիսի վայրագությունը, ինչպիսին է հայերի դեմ իրականացված Ցեղասպանությունը և փոխարենը ցանկանում է նման համաձայնագիր կնքել»։
Անցյալ ամսվա սկզբին Կոնգրեսը հաստատել է ինստիտուցիոնալ հռչակագիրը, որը դատապարտում է սեպտեմբերին ավելի քան 200 մարդու կյանք խլած Հայաստանի դեմ ադրբեջանական ագրեսիան։
