ՀԲԸՄ-ն դատապարտում է Հայաստանի սահմանամերձ բնակավայրերի վրա ադրբեջանական հարձակումներն ու կոչ է անում միասնական լինել

  • 15.09.2022
  • 0
  • 30 Views

Սեպտեմբերի 13-ին՝ կեսգիշերից սկսած, Ադրբեջանը ինտենսիվ ռազմական գործողություններ է իրականացնում Հայաստանի Հանրապետության սահմանամերձ Ջերմուկ, Գորիս, Կապան քաղաքներում և Սոթք, Արտանիշ և Իշխանասար գյուղերում: Ադրբեջանական ագրեսիվ գործողությունների հետևանքով Հայաստանի զինված ուժերը տվել են արդեն իսկ զգալի թվով զոհեր։ Տեղի ունեցածը ևս մեկ անգամ փաստում է, որ Հայաստանի Հանրապետության անվտանգությունը և տարածքային ամբողջականությունը կրկին վտանգված են։ 

Հայկական բարեգործական ընդհանուր միությունը (ՀԲԸՄ) 2020 թ.-ի արցախյան պատերազմից և կնքված եռակողմ զինադադարից ի վեր քաջատեղյակ է, թե Ադրբեջանի նմանօրինակ և պարբերական պատերազմական գործողությունների և միջազգային նորմերի խախտման ետևում ինչ օրակարգ է թաքնված։ Մենք նաև գիտակցում ենք, թե ադրբեջանական լայնածավալ հարձակումներն ինչ մարդկային կորուստների կարող են հանգեցնել։ Ուստի, կոչ ենք անում միջազգային հանրությանը, աշխարհասփյուռ հայությանը և բարի կամքի տեր անհատներին միավորվել և պայքարել Ադրբեջանի անօրեն գործողությունների դեմ։ Ակնհայտ է, որ ադրբեջանական ռազմական ագրեսիան միտված է Հայաստանի սահմանամերձ համայնքները թիրախավորելով տարածաշրջանում գերիշխող դիրք գրավելուն։ 

Հետևաբար, վերոնշյալ աղետը կանխելու համար առաջնային է ներքաղաքական պառակտումներն ու անհամաձայնություններն անհապաղ մի կողմ դնելը։ Կոչ ենք անում մեր հայրենակիցներին համախմբվել և ուժերն ու ռեսուրսները լիակատար օգտագործել հայրենիքի գոյությանը սպառնացող այս վտանգին դիմակայելու համար։ ՀԲԸՄ-ն, հավատարիմ մնալով իր առաքելությանը, պատրաստակամ է ներդնել իր ողջ ներուժը՝ ի նպաստ ազգի և պետության բարօրության։ 

Կիսելով մեր հայրենակիցների վիշտը՝ խորապես ցավակցում ենք ադրբեջանական ռազմական գործողությունների արդյունքում զոհված զինծառայողների և քաղաքացիների հարազատներին։

Հայկական բարեգործական ընդհանուր միությունը (ՀԲԸՄ) սփյուռքի հնագույն, համաժողովրդական և համահայկական կազմակերպությունն է: Հիմնված լինելով 1906 թվականին՝ ՀԲԸՄ-ի գլխամասային գրասենյակը գտնվում է Նյու Յորքում: ՀԲԸՄ-ը կրթական, մշակութային և մարդասիրական ծրագրերի միջոցով պահպանում և զարգացնում է հայկական ինքնությունն ու ժառանգությունը՝ յուրաքանչյուր տարի ազդեցություն ունենալով աշխարհով մեկ սփռված շուրջ 500,000 հայերի կյանքի վրա:

ՀԲԸՄ-ի և իր աշխարհասփյուռ ծրագրերի մասին հավելյալ տեղեկություն ստանալու համար կարող եք այցելել www.agbu.org:

Մեր գործընկերները

ՕՐԵՐ ԵՎՐՈՊԱԿԱՆ ԱՄՍԱԳԻՐ
Մենք սոց․ ցանցերում