Կինո և հեռուստաֆիլմերի Ռամսգեյթի միջազգային կինոփառատոնում (Մեծ Բրիտանիա) (Ramsgate International Film & TV Festival) «Լավագույն վավերագրական ֆիլմ» է ճանաչվել Նաիրի Հախվերդիի «Ավլելով Երևանը» ֆիլմը։ Այս մասին հայտնում է Հայաստանի ազգային կինոկենտրոնը՝ panorama.am -ի մատուցմամբ։
Ռեժիսոր և սցենարիստ` Նաիրի Հախվերդի, օպերատոր` Վահագն Տեր-Հակոբյան, պրոդյուսերներ` Լիանա Սմբատյան, Էդիթ Ֆարին, արտադրող ընկերություններ՝ «Margins Media», «Faites au Voeu», հեռարձակող ընկերություն՝ «Լիոն Կապիտալ ԹԻՎԻ»:
Ֆիլմը պետական ֆինանսական աջակցություն է ստացել Հայաստանի ազգային կինոկենտրոնի կողմից որպես խաղարկային վավերագրական ֆիլմ։
«Ավլելով Երևանը» պատմում է Մարինայի մասին, ով ամեն օր կեսգիշերին Չարենցավանից Երևան է գալիս ավլելու մայթերն ու փողոցները։ Արդեն երկար ժամանակ է նա ինքնուրույն հոգում է իր ընտանիքի կարիքները՝ կույր ամուսնու, երեխաների ու սկեսրոջ։ Խորհրդային միության փլուզումից ու գործարանների աշխատանքի դադարեցումից հետո շատերը կորցրին աշխատանքը ու դժվարությամբ հարմարվեցին նոր իրականությանը։ Մարինան պայքարում է այն իրականության համար, որտեղ իր երեխաներն այլ, ավելի լավ կյանք կունենան։
orer.eu
