«Դիմադրություն» շարժումը որոշել է հունիսի 15-ից հավաքել վրանները: Ինչպես տեղեկանում ենք շարժման ֆեյսբուքի էջից, անհրաժեշտության դեպքում վրանային ավանը կվերականգնվի։ Այս մասին հաղորդում է Հայաստանի Հանրային ռադիոն (armradio.am)։
Ըստ հաղորդագրության՝ նախատեսվում են ամենշաբաթյա միջոցառումներ, այդ թվում՝ փողոցային ակցիաներ, ոլորտային և թեմատիկ խնդիրների մասնագիտական քննարկումներ, ժողովրդային հանդիպումներ, շաբաթական առնվազն 1 մարզային այց, 1 մեծ հանրահավաք-երթ:
Հայաստանում, Արցախում և Սփյուռքում ձևավորվելու են շարժման տարածքային և ճյուղային ստորաբաժանումներ։
Ըստ «Արմենպրես»-ի թղթակցի հաղորդման՝ Երևանի Ֆրանսիայի հրապարակում տեղի ունեցած հանրահավաքի ժամանակ շարժման համակարգող Իշխան Սաղաթելյանը առաջարկեց վաղվանից՝ հունիսի 15-ից հավաքել վրանները Ֆրանսիայի հրապարակից:
Իշխան Սաղաթելյանի խոսքով՝ «Դիմադրության» շարժումն այժմ կանգնած է մարտավարության փոփոխության անհրաժեշտության առաջ: Ըստ նրա՝ այս պահից սկսած իրենց պայքարի արդյունավետությունը վրաններով պայմանավորված չէ:
«Շարժման ներուժը մեծացնելու, աշխարհագրությունը ընդլայնելու, գործիքակազմը հարստացնելու, նոր մոտեցումներ որդեգրելու, հարթակն ընդլայնելու, հստակ գործողությունների ծրագրով պայքարը շարունակելու նոր և կարևոր հանգրվանի առջև ենք կանգնած: Հետևաբար, «Դիմադրության» շարժման ղեկավարները՝ մենք որոշել ենք վերափոխման ենթարկել շարժման կառուցվածքը և մարտավարությունը՝ միաժամանակ կապիտալիզացնելով արձանագրված այն բոլոր ձեռքբերումները, որ ունեցել ենք միասին: Ուստի անհրաժեշտ է՝ ինստիտուցիոնալ բնույթ հաղորդել այս շարժման քաղաքական կազմակերպական քարոզչական աշխատանքներն ավելի արդյունավետ դարձնելու համար և շարժմանը պետք է ցանցային բնույթ հաղորդել՝ կյանքի կոչելով տարածքային և ճյուղային, կառուցվածքային միավորներ», – հայտարարեց շարժման համակարգողը:
Սաղաթելյանի խոսքով՝ վերոնշյալ կետերը ենթադրում են, որ շարժումը այսուհետ ունենալու է ենթակառուցվածքներ, այսինքն՝ կոմիտեներ, ոլորտային հանձնախմբեր:
«Սրանով մենք լուծելու ենք քաղաքական, կազմակերպական, քարոզչական ուղղություններով կադրային ներուժը ընդլայնելու, նորանոր խմբեր, կարող անհատներ ընդգրկելով՝ շարժումը ավելի ընդլայնելու և նոր ուժ տալու հարցը», – մեկնաբանեց դաշնակցական գործիչը:
Ինչ վերաբերում է Ֆրանսիայի հրապարակում տեղադրված վրաններին՝ Դաշնակցության Հայաստանի Գերագույն մարմնի ներկայացուցիչը շեշտեց, որ վրանային ավանը լիարժեք կատարել է իր գործը, որի համար նա շնորհակալություն հայտնեց այնտեղ հերթապահություն իրականացրած բոլոր հայրենակիցներին:
Առաջիկա մարտավարությունը հաշվի առնելով՝ «Դիմադրության» շարժումը առաջարկում է վաղվանից՝ հունիսի 15-ից, հավաքել վրանները Ֆրանսիայի հրապարակից, բայց «միշտ նկատի ունենալ», որ ցանկության և անհրաժեշտության դեպքում իրենք երկու ժամում ցանկացած հրապարակում, այդ թվում՝ Ֆրանսիայի հրապարակում կվերականգնեն վրանային ավանը:
«Մեր պայքարի ընթացքում մեր վրանային ավանը լրջագույն հարց է լուծել, բայց մեր պայքարի հետագա արդյունավետությունը վրաններով պայմանավորված չէ: Ես գիտեմ, որ տարբեր խոսակցություններ են առաջանալու, բայց կրկնում եմ՝ մեր հետագա պայքարի արդյունավետությունը այս պահից սկսած վրաններով պայմանավորված չէ: Ովքեր այլ բան կասեն կամ կխոսեն, շատ արագ կհամոզվեն դրա հակառակի մեջ», – հավելեց «Դիմադրության» շարժման համակարգողը:
Սաղաթելյանը հաղորդեց, որ հունիսի 18-ին, ժամը 19:30-ին, Ֆրանսիայի հրապարակում տեղի կունենա համապետական հանրահավաք:
Հունիսի 14-ի հանրահավաքին ներկա էր ՀՀ 2-րդ նախագահ Ռոբերտ Քոչարյանը: Հանրահավաքին հաջորդեց մասնակիցների երթը:
Երկու օր առաջ՝ հունիսի 12-ին, Հայաստանի 3-րդ նախագահ Սերժ Սարգսյանը լրագրողներին ասել էր, որ Իշխան Սաղաթելյանը հունիսի 14-ին կարևոր հայտարարություն է անելու «Դիմադրության» շարժման «ցանկալի արդյունքների» մասին: «Վաղը չէ մյուս օրը կլսեք, թե ընդդիմության առաջնորդ Իշխան Սաղաթելյանը ինչ է ասելու այդ մասին», – ասել էր Սերժ Սարգսյանը:
Ապրիլի 25-ից Հայաստանում անցկացվում են ընդդիմության բողոքի ակցիաներ, որոնց մասնակցում են խորհրդարանական «Հայաստան» և «Պատիվ ունեն» դաշինքի կողմնակիցները: Նրանք պահանջում են վարչապետ Նիկոլ Փաշինյանի հրաժարականը:
orer.eu
