Բրյուսելում տեղի է ունեցել Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը։
Քննարկման արդյունքում պայմանավորվածություններ են ձեռք բերվել տարածաշրջանային կոմունիկացիաների բացմանն ուղղված աշխատանքների հետագա ընթացքի, սահմանների սահմանագծման ու անվտանգության հարցերով հանձնաժողովի աշխատանքների մեկնարկի վերաբերյալ:
Քննարկման առարկա են դարձել նաև երկու երկրների միջև հարաբերությունների կարգավորման բանակցային գործընթացի նախապատրաստություններին, հումանիտար խնդիրներին, ինչպես նաեւ Լեռնային Ղարաբաղի հիմնախնդրի կարգավորմանը վերաբերող հարցեր:
Պայմանավորվածություն է ձեռք բերվել շարունակել եռակողմ հանդիպումները` նախատեսելով նմանատիպ հանդիպում անցկացնել հուլիսին կամ օգոստոսին:
Հանդիպման արդյունքում Շարլ Միշելը հանդես է եկել մամուլի հայտարարությամբ
Այսօր ես կրկին հյուրընկալել եմ Ադրբեջանի նախագահ Ալիևին և ՀՀ վարչապետ Փաշինյանին։ Սա մեր երրորդ քննարկումն էր նման ձևաչափով։ Մենք կենտրոնացել ենք Հարավային Կովկասի իրավիճակի, ԵՄ–ի և երկու երկրների միջև առկա հարաբերությունների զարգացման, ինչպես նաև ավելի լայն տարածաշրջանի վրա։Քննարկումն անկեղծ էր և արդյունավետ։ Մենք քննարկել ենք հարցերի ամբողջ համալիրը։ Մենք մանրամասն քննարկել ենք հումանիտար հարցերը, ներառյալ՝ ականազերծումը, ինչպես նաև պատանդառուների ազատ արձակման և անհայտ կորածների ճակատագրերը պարզելու հարցը:Մենք հասել ենք հետևյալ արդյունքներին՝–Սահմանային հարցեր
Առաջիկա օրերին միջպետական սահմանին տեղի կունենա սահմանային հանձնաժողովների առաջին համատեղ նիստը: Դրանում կքննարկվեն սահմանի սահմանազատման հետ կապված բոլոր հարցերը և թե ինչպես լավագույն կերպով ապահովել կայուն իրավիճակը:
–Կապուղիներ
Առաջնորդները համաձայնել են տրանսպորտային կապերի ապաշրջափակման անհրաժեշտության հետ։ Նրանք պայմանավորվել են Արևմտյան Ադրբեջանի և Նախիջևանի միջև տարանցումը կարգավորող սկզբունքների, ինչպես նաև Ադրբեջանի տարածքով Հայաստանի տարբեր հատվածների միջև կապի և երկու երկրների հաղորդակցային ենթակառուցվածքի միջոցով միջազգային փոխադրումների մասին: Մասնավորապես, նրանք պայմանավորվել են սահմանային կառավարման, անվտանգության, հողի վարձի, ինչպես նաև մաքսատուրքերի սկզբունքների մասին՝ միջազգային փոխադրումների համատեքստում։ Փոխվարչապետներն այս աշխատանքը կշարունակեն առաջիկա օրերին։
–Խաղաղության համաձայնագիր
Առաջնորդները պայմանավորվել են շարունակել Հայաստանի և Ադրբեջանի միջև միջպետական հարաբերությունները կարգավորող ապագա խաղաղ պայմանագրի քննարկումը: Արտաքին գործերի նախարարների գլխավորած խմբերը այս գործընթացը կշարունակեն առաջիկա շաբաթներին։ Բացի այդ, ես նաև ընդգծել եմ երկու առաջնորդներին, որ անհրաժեշտ է հասցեագրել Ղարաբաղում էթնիկ հայ բնակչության իրավունքների և անվտանգության հարցը։
–Սոցիալ-տնտեսական զարգացում
ԵՄ-ն առաջ կտանի երկու կողմերի հետ միասին Տնտեսական խորհրդատվական խմբի (Economic Advisory Group) աշխատանքը, որը ձգտում է նպաստել տնտեսական զարգացմանը` ի շահ երկու երկրների և նրանց բնակչության:Ես նաև ընդգծել եմ, որ կարևոր է պատրաստել ժողովուրդներին երկարաժամկետ կայուն խաղաղության: ԵՄ-ն պատրաստ է տրամադրել իր աջակցությունը ։Մենք պայմանավորվել ենք սերտ կապի մեջ մնալ և նույն ձևաչափով կրկին կհանդիպենք հուլիս/օգոստոս ամիսներին»:
Թարգմանությունը՝ Ադրբեջանի հարցերով փորձագետ Տաթեւիկ Հայրապետյանի։
Վերջինս իր ֆեյսբուքյան էջում գրում է. «Այս բոլոր կետերի մեջ ինձ համար ամենից վտանգավորը «Խաղաղության պայմանագիր» կոչվածի տակ տեղ գտած դրույթն է՝ «անհրաժեշտ է հասցեագրել Ղարաբաղում էթնիկ հայ բնակչության իրավունքների և անվտանգության հարցը»: Սա այն վտանգավոր ձևակերպումն է, որի դեմ համառորեն պայքարում էինք, սրա փոխարեն, եթե տարվեր նորմալ դիվանագիտական աշխատանք կլիներ հետևյալ ձևակերպումը՝ «անհրաժեշտ է շարունակել ԵԱՀԿ ՄԽ ձևաչափի ներքո ԼՂ հակամարտության հետագա համապարփակ կարգավորման հարցը՝ հայտնի սկզբունքների և տարրերի հիման վրա»: Բայց ցավոք, ՀՀ կառավարությունն ու նրա ղեկավարը հերթական վտանգավոր հետքայլն արեցին՝ այս անգամ հրաժարվելով ազգերի ինքնորոշման իրավունքից և, փաստացի, երեկվա հանդիպումից հետ տեղ գտած ձևակերպումից կարելի է ենթադրել, որ ՀՀ–ն իր միջազգային գործընկերների մոտ խոսում է, որ պատրաստ է ճանաչել Արցախն Ադրբեջանի կազմում՝ անվտանգային երաշխիքների դիմաց: Եթե դա այդպես է, ապա նման քաղաքականության հետևանքները լինելու են կործանարար մեր ողջ պետության համար, քանի որ նրանք հարվածում են պետության գլխավոր հիմնասյուներից մեկին՝ Արցախի գոյությանն առհասարակ»։
Անգլերեն տարբերակը՝
