Արտավազդ Փելեշյանին՝ Հոլանդական «Կյանքի նվաճումների համար» մրցանակ

  • 20.11.2021
  • 0
  • 71 Views

Նոյեմբերի 19-ին Ամստերդամի Վավերագրական ֆիլմերի միջազգային փառատոնում՝ IDFA 2021 համաշխարհային կինոյին բերած վաստակի համար տաղանդավոր կինոռեժիսոր Արտավազդ Փելեշյանը պարգեւատրվել է «Ողջ կյանքի նվաճումների համար» մրցանակով։

Կինոռեժիսորն անձամբ ներկա չի գտնվել մրցանակի հանձնման արարողությանը, սակայն նրա փոխարեն մրցանակը ստացել են իր վերջին ֆիլմի հետ համագործակցած « Կարտյե» հիմնադրամի նախագահ Հերվ Չանդեսը եւ հայտնի կինոարտադրող Անդրեյ Ուժիկան, որոնք մրցանակը կփոխանցեն կինոռեժիսորին։

«Բնություն» ֆիլմը ցուցադրվել է փառատոնի շրջանակներում, որը ներկայացրել է վարպետի կինոգործի մեծ երկրպագու, հայտնի երգչուհի եւ գրող Փաթի Սմիթը, որը հատուկ այդ նպատակով Նյու Յորքից ժամանել է Ամստերդամ՝ իր հարգանքի տուրքը մատուցելու վարպետին։ Նա ընթերցել է Արտավազդ Փելեշյանին նվիրված իր բանաստեղծությունը եւ  երգել է մի երգ, իսկ ֆիլմի մասին ասել է՝ «Դա կործանարար գեղեցիկ» է։ 

Իսկ հոլանդահայ Վիկտորիա Ապպինգ-Գարահակոբյանն իր ֆեյսբուքյան էջում արձանագրել է, որ «Բնությունը» ավելի շատ պոեզիա էր, քան ֆիլմ։  Նա նաեւ կարծիք է հայտնել, որ Կլիմային նվիրված միջազգային գագաթնաժողովներում պետք է պարտադիր ցուցադրել այս ֆիլմը։

Հիշեցնենք, որ այս ֆիլմը ցուցադրվել էր նաեւ Նյու Յորքի միջազգային կինոփառատոնում։  

Շնորհավորում ենք Մեծն Արտավազդ Փելեշյանին այս մրցանակի առիթով եւ մաղթում առողջություն եւ նոր ստեղծագործություններ։ 

orer.eu 

Մեր գործընկերները

ՕՐԵՐ ԵՎՐՈՊԱԿԱՆ ԱՄՍԱԳԻՐ
Մենք սոց․ ցանցերում