ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
25 փետրվարի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

“HyeAID2” Համերգը Ցոյց Տուաւ Սուրիահայութեան Օգնելու Վճռակամութիւնը` 150,000 Տոլար Եւս Պիտի Փոխանցուի

23 հունիսի, 2013 | 09:47

Հոլիվուտ, Քալիֆորնիա.- Հայ հասարակութեան հոգեմտաւոր աշխարհին մէջ Տոլպի Թատրոնը պիտի ըլլայ մէկ այլ վայր մը ուր հարաւային Քալիֆորնիան անգամ մը եւս սուրիահայութեան գոյատեւման նպաստելու իր միակամ վճռակամութիւնը փաստեց: Գրեթէ երեք հազար հոգի, 300 պարողներ, Հայաստանէն եւ գաղութէս արուեստագէտներ, 56 հովանաւորողներ քով-քովի գալով Սուրիոյ Հայութեան Զօրակցութեան Միացեալ Մարմնին (SARF) կազմակերպած “ՀայԷՅՏ2” համերգին մասնակցեցան Յունիս 9, 2013ին: Globalhye

 

Հոկտեմբեր 2012էն ի վեր, Սուրիոյ Հայութեան Զօրակցութեան Միացեալ Գործադիր Մարմինը արդէն իսկ կէս միլիոն տոլար փոխանցած է սուրիահայութեան: Գործադիր Մարմնի նիստէ մը ետք, Ատենապետ Զաւէն Խանճեանը տեղեկացուց թէ յաջորդ 150 հազար տոլարի փոխանցումը անմիջապէս պիտի գործադրուի:

Հալէպէն ստացուած Սուրիահայութեան Շտապ Օգնութեան եւ Վերականգնումի Մարմնի Յունիս 1, 2013ին թուակիր նամակը, որ տպագրուած էր ծրագրի գրքոյկին մէջ, շնորհակալութիւն կը յայտնէր եւ կը հաստատէր թէ “Ձեր կողմէ փոխանցուած գումարները հերթաբար կը ստանանք եւ համապատասխան ձեւով կը տրամադրենք Սուրիոյ հիմնական շրջաններու հայկական համայնքներուն՝ Հալէպ, Դամասկոս, Ծովափ (Լաթաքիա, Քեսապ) եւ Ճէզիրէ: Այս գումարները որոնք ժողովուրդի օգնութեան փութալու պահանջուած ծախսերն են, կը յատկացուին սննդեղէնի ապահովման, առողջապահական խնդիրներու սատարման, բնակարանային վնասներու հատուցման եւ կրթական բնագաւառի օժանդակութեան համար”: Նամակը նաեւ յոյս կը յայտնէր որ մարմնի “նախաձեռնած օժանդակութեան աշխատանքները պիտի շարունակուին նոյն ուժականութեամբ, յանուն Սուրիոյ հայ համայնքի գոյատեւման”:

 

Օրուան հանդիսավար Մանուկ Սերայտարեանը Տոլպի Թատրոնի չորս յարկերուն վրայ նստող հանդիսատեսներուն բարի գալուստ մաղթեց եւ հրաւիրեց Գործադիր Մարմնի Ատենապետ Զաւէն Խանճեանը որ իր սրտի խօսքը փոխանցէ: Խանճեան իր բանաստեղծական ոճով խօսելով ըսաւ. “Այս երեկոյ, այս սրահէն ալի՜ք, ալի՜ք բարձրացող երգն ու երաժշտութիւնը պիտի հնչեն որպէս ղօղանջ զօրակցութեան, որպէս մաղթանք լոյսի, յոյսի, որպէս աղօթք խաղաղութեան: Եւ ամէն կանչ եւ աղաղակ, հրաւէ՛ր է, ձիթենիի շիւղն կտուցին անարատ եւ սպիտակ աղաւնիին որ գայ հանգչի բերդի ճակտին, եկեղեցւոյ ծիր գմբէթին եւ թէ գագաթն մինարէթին… Բայց, Մենք հո՛ս ենք Սուրիահայ ազգակիցներ”:

 

Ձեռնարկին ներկայ էին Հայ Առաքելական Եկեղեցւոյ Ա.Մ.Ն.ի Արեւմտեան Թեմի Առաջնորդ Յովնան Արք. Տէրտէրեանը, Հայ Կաթողիկէ Համայնքի Հիւսիսային Ամերիկայի Առաջնորդ Միքայէլ Եպս. Մուրատեանը, Հիւսիսային Ամերիկայի Արեւմտեան Թեմի Առաջնորդի ներկայացուցիչ Միւռոն Ծ. Վրդ. Ազնիկեանը, Հիւսիսային Ամերիկայի Հայ Աւետարանական Եկեղեցիներու Միութեան Հովիւ Վեր. Յովսէփ Մաթոսեանը, Հայ Յեղափոխական Դաշնակցութեան Կեդրոնական Կոմիտէի ներկայացուցիչ Աւետիք Իզմիրլեանը, Սոցիալ Դեմոկրատ Հնչակեան Կուսակցութեան ներկայացուցիչ Գաբրիէլ Մոլոեանը, Ռամկավար Ազատական Կուսակցութեան ներկայացուցիչ Յակոբ Նազարեան, Հայ Օգնութեան Միութեան Արեւմտեան ԱՄՆի Շրջանային Վարչութեան ներկայացուցիչ Լենա Պօզոյեանը, Հայ Բարեգործական Ընդհանուր Միութեան ներկայացուցիչ Գրիգոր Գարակէօզեանը, Համազգային Արեւմտեան ԱՄՆի Շրջանային Վարչութեան ներկայացուցիչ Մանուկ Չուխաճեանը, հայկական ամէնօրեայ վարժարաններու տնօրէնները որոնք ձեռնարկը կը հովանաւորէին, ձեռնարկի գլխաւոր հովանաւորողներ Տէր եւ Տիկին Էտի եւ Թալին Ամրոյեան եւ Տէր եւ Տիկին Գրիգոր եւ Մարլէն Երեւանեան, մամլոյ ներկայացուցիչներ, ինչպէս նաեւ ծրագրի զանազան աշխատանքներու կամաւորներ:

 

 

Գէորգեան Պարի Ակադեմիայի հարիւրաւոր փոքրիկ ու պատանի պարողները, ղեկավարութեամբ Վարդան եւ Սիրանոյշ Գէորգեաններու եւ պարուսոյց Սոնա Գէորգեանի, լեցուցին հսկայ բեմը: Իրենց փայլուն ելոյթները տեսակաւոր էին՝ փոքրերու զուարճալի պարերէն մինչեւ աւելի բարդ ուս-ուսի “Բերդ” պարի կատարումները: Կատարումները ուրախութիւն եւ տխրութիւն փոխանցեցին, մանաւանդ երբ “Ցեղասպանութիւն”ը կը կատարուէր Նունէ Աւետիսեանի Յովհաննէս Շիրազի “Հայոց Տանդէական”ի ասմունքով եւ Արթիւր Մխճեանի եւ Էլոնի երաժշտութեամբ, Սոնա եւ Նինել Գէորգեաններու կողմէ: Պարախումբերը իրենց շարժումներով եւ գոյնզգոյն տարազներով վերահաստատեցին որ հայկական պարը կենդանի գոյութիւն է եւ կրնայ գոհացնել Արեւմտեան ափի հանրութիւնը:

Ներկաներու սպասումն եւ յուզմունքը վարակիչ էր Հայաստանէն հասած արուեստագէտներուն նկատմամբ: Իրենց ելոյթները, գաղութիս արուեստագէտներուն ելոյթներուն հետ, յիշատակելի էին: Անոնք հիանալի խումբ մը կը կազմէին, որոնք մեծ ճկունութեամբ կրնային կարօտի երգերէն շրջիլ ուրախ-զուարթ երգի մը, բեմին յարափոփոխ լոյսերուն նման:

Հայաստանի Հանրապետութեան վաստակաւոր արուեստագիտուհի Լէյլա Սարիբէկեանը մեներգեց իր հեղինակութեամբ երգերէն “Երկիր Հայրենի”, “Հայորդիներ Միակամ” (երաժշտութիւն՝ Սերկէյ Յարութիւնեանի) եւ “Զինւորի Մօր Երգ”ը: Հայրենի երգչուհի Սիլվա Յակոբեանի ելոյթներու ընթացքին՝ “Սասնա Պար”ի եւ “Աշխարհի հայերով”ի ներկայութեան ընթացքին հանդէս եկան Գէորգեանի պարախումբերը: Ան նաեւ մեներգեց Մանէ Յակոբեանի “Տնից փախել եմ” երգը:

Արցախի պատերազմը ապրած ըլլալով սուրիահայերու սրտակից Անտրէն, կատարեց “Հայաստանս” եւ “Հորիզոններ” երգերը: Արամ Աւագեանի երաժշտանոցէն վեց աշակերտներ կատարեցին “Հայաստան Աշխարհ”ը, Աւագեանի ելեկտրական դաշնակի ընկերակցութեամբ:

Ռուբէն Յարութիւնեանի եռեակը դուդուկներու վրայ կատարեց “Հովերն ընկան” մեղեդին: Յարութ Փամպուքճեանը բեմի վրայ իր ուժականութիւնը պարզեց Պարոյր Սեւակի “Մենք քիչ ենք, սակայն մեզ հայ են ասում” բանաստեղծութեան վրայ հիմնուած եւ Լեւոն Գաթրճեանի երաժշտութեամբ երգի կատարումով: Ռազմիկ Մանսուրեանը մեներգեց Մարին Ալէսի “Պատրանքի թեւերով”ը: Իսկ Յովհաննէս Շահպազեանը Կոմիտասի “Հորովել”ը կատարեց, իսկ Արմէնչիքը՝ “Աշխարհի հայեր”ը: Համերգը աւարտեցաւ Լէյլա Սարիբէկեանի “Արագածի շուրջպար”ի կատարումով որ հայութեան միասնականութիւնը կը պատկերացնէ եւ արուեստագիտուհիին խնդրանքին անսալով հանդիսատեսները ոտքի կանգնեցան, ձեռք-ձեռք բռնելով՝ իբրեւ սուրիահայութեան հետ միասնականութեան ապացոյց:

Աւելի քան երեք ժամ, համերգին հսկայ սրահը բազմաչարչար սուրիահայութեան փութացող հարաւային Քալիֆորնիայի բազմապատիկ գաղութին բաբախիւն սիրտը դարձած էր, որ յոյսի եւ կենսունակութեան աղբիւրը շարունակէ սփոփել անոնք որոնք բոլորին օժանդակութիւնը պէտք ունին իրենց գոյութիւնն իսկ շարունակելու համար:

Սուրիոյ Հայութեան Զօրակցութեան Միացեալ Մարմնի անդամները հետեւեալներն են.- Հայ Առաքելական Եկեղեցւոյ Ա.Մ.Ն.ի Արեւմտեան Թեմ, Հայց. Եկեղեցւոյ Հիւսիսային Ամերիկայի Արեւմտեան Թեմ, Հիւսիսային Ամերիկայի Հայ Աւետարանական Եկեղեցիներու Միութիւն, Հիւսիսային Ամերիկայի Հայ Կաթողիկէ Թեմ, Ամերիկայի Հայ Աւետարանչական Ընկերակցութիւն, Հայ Բարեգործական Ընդհանուր Միութիւն, Հայ Օգնութեան Միութեան Ա.Մ.Ն.ի Արեւմտեան Շրջան, Հայ Յեղափոխական Դաշնակցութիւն, Ռամկավար Ազատական Կուսակցութիւն եւ Սոցիալ Դեմոկրատ Հնչակեան Կուսակցութիւն: Համացանցի հասցէն է՝ www.SyrianArmenianReliefFund.org: Globalhye

Orer.eu

 

 

 


Առնչվող նյութեր
1. ՍԱՐՖԸ շարունակում է սուրիահայութեան օժանդակութիւնը. 1.4 միլիոն է փոխանցվել Սուրիոյ շտապին

Մեկնաբանություն

Վերջին լուրեր
1.Պատվո շքանշան Արտավազդ Փելեշյանին. 80-ամյա հոբելյանը օպերային թատրոնում
2.«Ավրորան»՝ ողջ աշխարհում
3.Էդվարդ Նալբանդյանն ու Ֆեդերիկա Մոգերինին ստորագրեցին Հայաստան – Եվրոպական միություն գործընկերության առաջահերթությունների իրագործման մասին փաստաթուղթը
4.Հայոց ցեղասպանության բացահայտ ճանաչումը Նիդերլանդների խորհրդարանի կողմից
5.Գասպար Կարապետեան.- Ազրպէյճանի` Ինթերփոլին իմ դէմ ներկայացուցած դիմումը անհեթեթ է
6.Երևանում նշվեց Հովհաննես Թումանյանի ծննդյան օրը
7.Քրիստոֆեր Աթամյանին գրական մրցանակˋ «Վաշինգտոնյան բարձունքների բանաստեղծը» գրքի համար
8.Եվրոպայի խորհրդարանի 16 անդամներ հարց են ուղղել Ֆեդերիկա Մոգերինին. ի՞նչու ԵՄ պաշտոնյանները չեն այցելում Արցախ
9.Ամենապահանջված պարային հաստատության հաջողության հետքերով
10.Բաց նամակ Արսեն Արծրունու հարազատներից ՀՀ Արդարադատության նախարար Դավիթ Հարությունյանին
Դիտել բոլորը
Ամենաշատ դիտվածները
1.Նալբանդյանը շշպռեց մեջ ընկած Մամեդյարովին.-տեսանյութ
2.Սոպրանո Անուշ Հովհաննիսյանն անցել է BBC Քարդիֆի ՚՚Աշխարհի երգիչ՚՚ մրցույթի եզրափակիչ փուլ
3.Հայ օպերային երգիչները գրավում են Քովենթ Գարդենը. 40 օրում 13 ելույթ Լոնդոնում
4.Եվրոպայի երկու չեմպիոն Պրահայում. Մամիկոն Ղարիբյանի եւ Մանուել Պետրոսյանի պատվին երկու անգամ հնչեց Հայաստանի օրհներգը -լուսանկարներ
5.Հայաստանի տիկնիկային թատրոնը հաղթեց Պրահայի միջազգային փառատոնում
6.՚՚Հաց բերողին՚՚ ազատեցին Ֆրանսիայում անախորժություններից խուսափելու համար. ֆրանսահայերի բողոքի ցույց խորհրդավոր ընթրիքի ժամին
7.Հայ բժշկուհիները օդանավում փրկեցին չինուհու կյանքը
8.Չեխիայի խորհրդարանը ճանաչեց Հայերի ցեղասպանությունը
9.Հայ մտավորականների բաց նամակը ՀՀ ոստիկանապետին. Մենք ցանկանում ենք ապրել պետությունում, որտեղ անպատիժ չմնան հովանավորյալները
10.«Միկոյանն իրադրության պատանդն էր, ինչ-որ չափով՝ ստալինյան զոհ»
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: