ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
20 սեպտեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

ՀԲԸՄ-ՓԱՐԻԶ -ԱՐՏԱԳԱՂԹԻ ՆԻՒԹՈՎ ԲԱՆԱԽՕՍՈՒԹԻՒՆ-ՎԻՃԱՐԿՈՒՄ DEPOP-ի ԽՈՒՄԲԻՆ ՄԱՍՆԱԿՑՈՒԹԵԱՄԲ

AGBU-Organized Events Reveal New Trends in Armenia’s Emigration
15 մարտի, 2014 | 15:31

depop_2014_tour_01Փետրուար 3ի երեկոյեան Փարիզի ՀԲԸՄ-ը «Ալեք Մանուկեան» մշակոյթի իր կեդրոնին մէջ կը հիւրընկալէր DEPOP-ի խումբէն հայաստանցի երեք երիտասարդներ, որոնք համաշխարհային շրջապտոյտի մը ձեռնարկած են՝ նիւթ ունենալով Հայաստանէն արտագաղթի երեւոյթը:

Նախ երկու խօսքով ծանօթացնենք DEPOP-ը. իր անդամներուն իսկ սահմանումով՝ ան քաղաքականօրէն բոլորովին անկախ մարմին մըն է, որ նիւթապէս հովանաւորուած է Թորոնթոյի «Գոլոլեան Հիմնադրամ»ին կողմէ: Իրենց նպատակն է ուսումնասիրութիւններու ընդմէջէն պատրաստել արտագաղթի բուն պատճառներու, երեւոյթներու տեղեկագիր մը, նաեւ ճշդել դարմաններ զայն կասեցնելու եւ հակառակ ուղղութեամբ՝ ներգաղթի միտում ստեղծելու համար: Բոլորովին անաչառ եւ ներկայացուցչական տուեալներ ձեռք ձգելու համար, DEPOP-ի չորս խմբակներ անջատաբար ուսումնասիրութիւններ կատարած են եւ անոնց արդիւնքներուն տարրալուծումն է, զոր կը ներկայացնեն այս շրջապտոյտին: Հետազօտութեանց արդիւնքը արդէն ներկայացուած է ՄԱԿ-ի ժողովրդային հիմնադրամներու (UNEPA) վերաբերեալ դասախօսական հաւաքին, որ կայացած է 2013 Հոկտեմբեր 8ին Երեւանի մէջ։ Խումբը կը գլխաւորէ Կամօ Մայիլեան:

Երեկոյթին բացումը կատարեց Փարիզի ՀԲԸՄ-ի նախագահ Սասուն Սոժի, որ հակիրճ քանի մը խօսքով ներկայացուց օրուան բանախօսները, որոնք Կամօ Մայիլեանը, Օրիորդներ Էլէնա Մուրատեանն ու Անի Աւետիսեանն էին: Մինչ վերջին երկուքը ուսանողուհիներ են depop_2014_tour_02Երեւանի Պետական համալսարանի, Կամօ Մայիլեան մասթըր կը պատրաստէ Գանատայի մէջ:

Ապա, ի զարմանս բոլորին, չես գիտեր ինչու, երեկոյթը սկսաւ ընթանալ անգլերէնով, առանց սրահին կարծիքը շօշափելու, եւ մանաւանդ առանց որեւէ թարգմանութեան: Այսպէս 15-20 վայրկեան, թերեւս ալ աւելի, բանախօսութենէ ետք ներկաներէն ոմանց բողոքին ընդառաջելով, բանախօսը՝ Կամօ Մայիլեան, որուն մայրենին հայերէնն է (նոյնիսկ եթէ կատարելապէս կը տիրապետէր անգլերէնին) սկսաւ երկլեզու բանախօսել, մինչ հայաստանցի միւս երկու օրիորդները արդէն աւարտեր էին վիճակագրական տուեալներու իրենց ներկայացումը, բոլորովին անգլերէնով:

Ուրեմն, գլխաւոր բանախօսը այսպէս՝ մէջ ընդ մէջ հայերէն եւ անգլերէն, մանրամասնօրէն խօսեցաւ արտագաղթի պատճառներուն մասին, յատկապէս նշելով, թէ մեկնումներու ջախջախիչ մեծամասնութիւնը ընտանեօք է, ինչ որ երկրէն վերջնականապէս հեռանալու depop_2014_tour_03տխուր ազդարարն է: Աւելցուց նաեւ, թէ հակառակ ընկալեալ կարծիքին, ընդհանրապէս բարեկեցիկ ընտանիքներն են մեկնողները: Անդրադարձաւ երկրին կարօտեալ դասակարգին, անոր յուսահատ վիճակին, յատկապէս Գիւմրիի մէջ, որու բնակչութեան 47,7%ը աղքատութեան մէջ կ՚ապրի:

Մայիլեան ներկայի բացասական իրավիճակը շրջելու անհրաժեշտ հրամայական նկատեց Սփիւռքը պարզ գանձատրման աղբիւր մը տեսնելէ աւելի հեռու երթալով՝ անոր կողմէ ուղղակի ներդրումներու խթանումը, հակառակ տխուր փորձառութիւններու, որոնցմէ յիշեց ֆրանսահայ գործարար Տիկ. Վալերի Գործունեանի օրինակը: Նշեց, թէ Հայաստանի մէջ դատական եւ ոստիկանական համակարգերու որակը հեռու է գոհացուցիչ ըլլալէ եւ մանաւա՛նդ անկախ չեն: Այս ու նման բացասական երեւոյթներու որպէս միակ լուծում դիտել տուաւ զօրաւոր, կառուցողական ընդդիմութեան մը ստեղծումը երկրին մէջ: depop_2014_tour_04Մանաւանդ, որ ըստ բանախօսին, վերոնշեալ բացասական կէտերուն պատճառերով մարդիկ այն զգացումը չունին, որ կը մասնակցին երկրին կառավարման, ինչ որ ծանրակշիռ ախտ մըն է:

Օրուան գլխաւոր բանախօսը լաւատեսութիւն ներշնչելու համար տուաւ Իսրայէլի օրինակը, որ Հայաստանի համար քիչ թէ շատ կրնայ ծառայել բաղդատական եզր մը: Այդ երկիրը, որ ունի Հայաստանէն աւելի փոքր տարածք, այսօր տէր է 7,7 միլիոն բնակչութեան եւ բաւական բարգաւաճ իրավիճակ կը պարզէ: Տուաւ նաեւ ընդհանուր առմամբ թշուառութենէ տառապող Ափրիկէի մէջ Պոցվանայի օրինակը, որ վերջին շրջաններուն շնորհի՛ւ յաջող կառավարման, դարձած է բարգաւաճ երկիր:

Մայիլեան ըսաւ, թէ Հայաստանի մէջ դրական երեւոյթներ ալ կան, զորս պէտք չէ մոռնալ, սակայն անոնք չեն հասնիր փակելու բացասականները: Ան նաեւ խօսելով Հայաստանի կառավարութեան վիճայարոյց քանի մը որոշումներուն մասին ըսաւ. “Երէկ երբ կ՚այցելէինք Փարիզի տեսարժան վայրերը, հասնելով Էյֆէլեան աշտարակին առջեւ, Պ. Սոժի կատարելով անոր պատմականը, մեզի ըսաւ թէ աշտարակի կառուցման պահուն անթիւ ու անհամար բողոքի ձայներ բարձրացած էին, թէ ան պիտի խաթարէ մայրաքաղաքին նկարագիրը. բայց այսօր կը տեսնենք, թէ Էյֆէլ Փարիզի անբաժան մասնիկն է”: Յատկապէս այս եւ մէկ երկու նման այլ խօսքեր բաւարար եղան որպէսզի լսարանի որոշ մասնակիցներու մօտ կասկած ծագի խումբին առաքելութեան անաչառութեան մասին:

Մայիլեան իր իսկ օրինակը տալով, որ ընտանեօք կ՚ապրի Թորոնթօ, ըսաւ թէ ինչպէս շատ-շատերը, ինք ալ կը փափաքի վերադառնալ Հայաստան, պայմանաւ որ տեսնէ ապագայ, պայմանաւ որ իր նման շատ-շատերը հոն տեսնեն ապագայ:

depop_2014_tour_05Հարցում-պատասխաններու բաւական ստուար բաժինով մը վերջ գտաւ երեկոյթը:

Ամէն պարագայի պէտք է ողջունել DEPOP-ի նախաձեռնութիւնը, որ ինչ ալ ըլլան կարծիքները, ունի առնուազն մէկ առաքինութիւն՝ արտագաղթի հարցը օրակարգի վրայ պահելով, դիտարկումներու, մատնանշումներու, վիճարկումներու, առաջարկներու բեմ հանդիսանալը: Այս առընչութեամբ ալ չմոռնանք յիշեցնելու, որ արտագաղթի վերաբերող որեւէ նիւթի մասին կը սպասեն ձեր առաջարկներուն, հետեւեալ հասցէով՝ www.depop.am:

Յ. Կ.

«Նոր Յառաջ» երկօրեայ թերթին քաղուածքը Փետրուար 22, թիւ 614

 

«ԵՐԿՐԷՆ ԿԸ ՄԵԿՆԻՆ ԲԱՐԵԿԵՑԻԿ ԿԵԱՆՔ ՈՒՆԵՑՈՂ ՄԱՐԴԻԿ»

ՀԱՐՑԱԶՐՈՅՑ ԲԱՐԵԳՈՐԾԱԿԱՆԻ ԴԱՍԱԽՕՍԱԿԱՆ ԵՐԵԿՈՅԹԻՆ ՄԱՍՆԱԿՑԱԾ

ԿԱՄՕ ՄԱՅԻԼԵԱՆԻ ՀԵՏ «ՀԱՅԱՍՏԱՆԷՆ ԱՐՏԱԳԱՂԹԸ» ՆԻՒԹԻՆ ՇՈՒՐՋ

 

«Նոր Յառաջ».- Ինչպէս ծանօթ է, պիտի մասնակցիք Բարեգործական Միութեան կողմէ կազմակերպուած դասախօսական երեկոյթին (տե՛ս. քովի էջը)՝ ներկայացնելու համար արտագաղթի հրատապ հարցը եւ Հայաստանի ընկերային կեանքը։ Նախ կ՚ուզէինք գիտնալ թէ ինչպէ՞ս ծագեցաւ արտասահման շրջապտոյտ կատարելու գաղափարը։

Կամօ Մայիլեան.- Մեր այս անգամուան շրջապտոյտը կ՚ընդգրկէ Փարիզ, Պէյրութ, Թորոնթօ, Նիւ Եորք եւ Լոս Անճըլըս։ Նկատի ունենալով, որ արտագաղթը ահաւոր չափերու հասած է, կ՚ենթադրեմ որ իւրաքանչիւր հայ մտահոգ է այս հարցով։ Մեր ծրագիրը իրականացաւ շնորհիւ Թորոնթոյի «Գոլոլեան» հաստատութեան, որու նախագահ Վահան Գոլոլեան, գիտակից ըլլալով արտագաղթի ծանր իրականութեան եւ անոր վտանգաւոր հետեւանքներուն, երկու տարի առաջ կապ հաստատեց Երեւանի «Մարդկային զարգացման միջազգային կեդրոն»ին հետ՝ այս հարցով փաստերով ու վկայութիւններով մանրակրկիտ հետազօտութիւն կատարելու նպատակով։ Այս աշխատանքը իրագործելու համար ընտրուած են չորս խումբեր.-

1.- Հայ-ռուսական սլաւոնական համալսարանի հետազօտական խումբը։

2.- Երեւանի պետական համալսարանի տնտեսական բաժնի հետազօտական խումբը։

3.- Անկախ հետազօտական խումբ մը, որու անդամներն են՝ Արշակ Բալայեան, Արմէն Գազավեան եւ Աւետիք Մէճլումեան։

4.- «Հրայր Մարուխեան» հիմնադրամը։

 

Վերը նշուած երկու համալսարանները կատարած են ընկերային խնդիրներու վերաբերեալ հարցախոյզեր, կազմակերպած են կլոր սեղաններ, քննարկումներ։ Հարցարաններու պատասխանները ստանալով Հայաստանի զանազան շրջաններէն (Երեւան, Վանաձոր, Գիւմրի) մեր ծրագիրին մասնակցող 15 հոգիէ կազմուած բազմաթիւ խումբեր համադրական աշխատանք տարած են ընդհանրութիւնները մէջտեղ բերելու համար։ Իսկ սփիւռքահայ գաղութներու հետ հանդիպումներու գաղափարը կը պատկանի «Գոլոլեան» հաստատութեան եւ Հայկական Բարեգործական Ընդհանուր Միութեան, որոնք գիտակից ըլլալով այսօրուան վտանգաւոր կացութեան որոշած են ահազանգ հնչեցնել աշխարհասփիւռ հայութեան մօտ՝ համատեղ լուծումներ գտնելու հեռանկարով։

 

«ՆՅ».- Ինչպէս ըսիք, մեծ թիւով հետազօտական կեդրոններ իրարու հետ գործակցած են։ Հազուադէպ է այսպիսի աշխատակցութեան ականատես ըլլալ, բնականոն ընթացք ունեցա՞ծ է։

Կ.Մ..- Գիտէք, սկիզբը նախ իւրաքանչիւր կեդրոն կամ խումբ աշխատած է առանձին՝ ուսումնասիրելով իր ընտրած ոլորտը եւ ասիկա եղած է առանց զիրար ճանչնալու եւ աշխատանքի աւար- տին է որ մենք բոլորը քով-քովի բերելով համատեղած ենք ար- դիւնքները։

«Ն.Յ.».- Քիչ առաջ խօսեցաք «Մարդկային զարգացման միջազգային կեդրոն»ին մասին։ Ո՞վ կը ղեկավարէ այդ ընկերային կեդրոնը։

Կ.Մ.- Օրին Թեւան Պօղոսեանն էր ղեկավարը, որ այսօր երեսփոխան ընտրուած ըլլալով՝ զինք կը փոխարինէ կազմակերպութեան այլ ներկայացուցիչ մը։ Հոս կ՚ուզէի առիթէն օգտուելով ակնարկել կարեւոր փաստի մը։ 12 ամիս տեւած այս հետազօտութեանց մասնակից բոլոր խումբերը անկախ եղած են, առանց որեւէ քաղաքական կողմնորոշման, եւ ինքնուրոյն աշխատած են Հայաստանի մէջ։ Այս խումբերը սակայն ունեցած են տարբեր դիմագծեր։ Երկու համալսարանները արդէն ունին հետազօտական խումբեր, որոնք կ՚իրագործեն նա՛եւ այլ ծրագիրներ։ Իսկ մեր ծրագրին վրայ աշխատած են նոյն համալսարաններու հարցին հմուտ ու տեղեակ երիտասարդ դասախօսներ։

Ինչ կը վերաբերի անկախ հետազօտական խումբին, ապա ան կ՚ընդգրկէ երեք տարբեր մասնագիտութիւններու տէր համալսարանականներ, որոնք մեծ փորձառութիւն ունին։ Իսկ «Հրայր Մարուխեան» հիմնադրամը գործակցած է դոկտ. Խաչիկ Տէր Ղուկասեանի հետ, որ նմանապէս համալսարանական հետազօտութեան փորձառութիւն ունեցող անձ մըն է։ Հետեւաբար մենք կրցած ենք քննարկել ընկերային, տնտեսական եւ քաղաքական բազմակողմանի հարցեր։

«ՆՅ».- Կազմակերպչական առումով աներեւակայելի է, որ բոլոր խումբերը կրցած են իրենց աշխատանքով միանալ «Գոլոլեան» հաստատութեան ծրագրին եւ չեն փորձուած առանձին հանդէս գալ։

Կ.Մ.- Կրնամ ըսել թէ արտագաղթի երեւոյթը բոլորիս հիմնախնդիրը ըլլալով է որ գանատահայ գործարար Վահան Գոլոլեանի ծրագրին շուրջ համախմբած ենք մեր նպատակները։

«ՆՅ».- Ձեր աշխատանքները ինչպիսի՞ բաժանում ունին, եւ ի՞նչ հարցերու կ՚անդրադառնաք։

Կ.Մ.- Ունինք չորս կարեւոր բաժանումներ՝ վիճակագրական համայնապատկերը, ընկերային-տնտեսական, քաղաքական եւ իրաւական վերլուծումներ, որոնք հիմնուած են վիճակագրական պատկերի արդիւնքին հաւաքուած պատասխաններու վրայ։ Նաեւ իբրեւ օրինակ նկատի առած ենք Իսրայէլի ներգաղթի պարագան, թէ մեր նորանկախ պետութիւնը ի՛նչ դասեր կրնայ քաղել իսրայէլեան փորձառութենէն եւ վերջապէս Սփիւռքի հետ միատեղ աշխատանքի մանրամասն վերլուծում, որպէսզի միջոցներ որոնենք մեր աշխատանքներու մէջ ներգրաւելու Սփիւռքի անդամները։

Մեր ծրագրին մէջ ներառած ենք նաեւ հարցախոյզեր՝ ըստ տարիքի, կրթութեան մակարդակի եւ կեանքի պայմաններու։ Մեր թիրախները եղած են նաեւ այն մարդիկ, որոնք մեկնած են արտասահման եւ ետ դարձած։ Նաեւ խորապէս վերլուծած ենք անկախութենէն ի վեր հրապարակումներն ու մամլոյ մէջ տեղ գտած գրութիւնները։ Այդ կարգին միջազգային կազմակերպութիւններու հրապարակումները՝ ՄԱԿ, Միջազգային Տարադրամի Հիմնադրամ, Միջազգային Դրամատուն, Մարդկային Իրաւանց Եւրոպական Ատեան: Ուսումնասիրած ենք միջազգային հեղինակաւոր կազմակերպութիւններու զեկոյցները կառավարման բարեփոխումներու վերաբերեալ, հետազօտած ենք վիճակագրական տեղեկատւութիւններ, կառավարական աղբիւրներ, ընդդիմութեան հրապարակումներ։ Ասիկա կը նշանակէ, որ մենք հիմնուած ենք թէ՛ կառավարական աղբիւրներու, թէ՛ ոչ-կառավարական եւ թէ՛ միջազգային աղբիւրներու վրայ՝ անշուշտ ներկայացնելով փաստեր։

«ՆՅ».- Վիճակագրական առումով ի՞նչ են տուեալները։

Կ.Մ.- Մենք վիճակագրական տարբեր արդիւնքներ յայտնաբերած ենք, սակայն ամենէն կարեւորը հետեւեալ երկու մտահոգիչ փաստերն են՝ Հայաստանէն կ՚արտագաղթեն երիտասարդ անձեր իրենց ընտանիքներով եւ երկրորդ զարմանալի իրականութիւնը այն է, որ երկրէն կը մեկնին բարեկեցիկ կեանք ունեցող մարդիկ, այսինքն որքան եկամուտը կը բարձրանայ, նոյնքան ալ արտագաղթը կ՚աւելնայ, ինչ որ տրամաբանօրէն պէտք է հակառակը ըլլար եւ ասիկա կը փաստէ որ արտագաղթի պատճառը միա՛յն տնտեսականին կապուած չէ։ Անշուշտ բոլորս տեղեակ ենք որ նոյնիսկ զարգացած երկիրներու մէջ արտագաղթը ընդհանրապէս համաճարակ երեւոյթ դարձած է, բայց Հայաստանի պարագային մտահոգիչը – ինչպէս ըսի -երիտասարդ ընտանիքներու արտագաղթն է, որ կը նշանակէ թէ անոնք երկար ժամանակով բնակութեան կարելիութիւն կը փնտռեն եւ հաւանաբար այլեւս պիտի չվերադառնան։ Ինչ կը վերաբերի մասնագէտներուն, անոնք ալ շուտով աշխատանք գտնելով արտասահմանի մէջ, ա՛լ չեն մտածեր հայրենիք վերադարձի մասին։

«ՆՅ».- Որո՞նք են արտագաղթի բուն պատճառները։

Կ.Մ.- Օրէնքով ամրագրուած անհաւասար պայմանները, կաշառակերութիւնը, աշխատանք ստեղծելու համար առկայ դարձեա՛լ անհաւասար իրաւունքները եւ հանրութեան մօտ գոյութիւն ունեցող որոշ հիմնախնդիրներ արտագաղթի պատճառներ կը նկատուին։ Սակայն հոս կ՚ուզեմ ընդգծել թէ միա՛կ յանցաւորը կառավարութիւնը չէ, այլ մեղաւոր ենք մենք բոլորս, որ չունինք ամուր հիմքերով քաղաքացիական հանրութիւն, չունինք զօրաւոր ընդդիմութիւն որ ազդեցութիւն ունենայ որոշումներու կայացման վրայ եւ ստիպէ կառավարութիւնը, որ իր գործունէութեան հաշուետւութիւնը ներկայացնէ։ Աւելի՛ն, մենք այսօր չունինք հանրային ուժ մը, որ ի վիճակի ըլլայ ընտրութեանց ժամանակ վերահսկողութիւն կատարելու։ Ահաւասիկ այս է պատճառը մեր շրջապտոյտին, որու ընթացքին Սփիւռքի հետ հանդիպումներու ժամանակ կ՚ուզենք մեր ձայնը բարձրացնել արտագաղթի վտանգաւոր երեւոյթին դէմ, որպէսզի միասնաբար քննարկենք եւ երկխօսութեան միջոցով ելքեր որոնենք կառուցողական ընդդիմութիւն եւ ժողովրդային շարժում ստեղծելու համար։

«ՆՅ».- Արդեօք տարեցնե՞րն ալ կ՚արտագաղթեն։

Կ.Մ.- Գիտէք, արտագաղթի միտումը միշտ ալ գոյութիւն ունեցած է թէ՛ Հայաստանի եւ թէ՛ դրացի երկիրներու մէջ։ Մեր աւագ սերունդը աւելի շատ Ռուսաստան կը գաղթէ՝ դրամ վաստակելու եւ երբեմն ալ վերադառնալու մտադրութեամբ։ Սակայն անոնք քանի մը անգամ վերադառնալէ ետք ի վերջոյ իրենց ընտանիքներու հետ մնայուն բնակութիւն կը հաստատեն հեռաւոր Ռուսաստանի մէջ։ Ըսեմ որ արտագաղթը միշտ ալ եղած է, սակայն այսօրուան չափերով զանգուածային գաղթ աննախընթաց երեւոյթ մըն է։

«ՆՅ».- Հայաստանի ո՞ր շրջաններէն առաւել շեշտուած է արտագաղթի հոսանքը։

Կ.Մ.- Ցաւով պիտի նշեմ, թէ սահմանամերձ գիւղեր շատոնց է, որ արտագաղթի բացասական պատկերը կը պարզեն։ Երկար ժամանակ է որ այդ շրջաններուն մէջ մեծ մասամբ տարիքոտ մարդիկ կը բնակին։ Իսկ այդ վայրերու արտագաղթի հիմնական պատճառը տնտեսական ազդակն է, մանաւա՛նդ նկատի ունենալով որ մեր երկիրը չունի բնական աղբիւրներ եւ շրջանի ժողովուրդը աղքատ կեանք մը կ՚ապրի։ Մեր համոզումով՝ միակ ելքը ճիշդ կառավարման ձեւն է, որ կրնայ ապագայի հանդէպ անոնց յոյս ներշնչել։ Զանոնք պէտք է մասնակից դարձնել կառավարման գործընթացին։ Ըսեմ, որ սահմանամերձ գիւղերու բնակիչները չափազանց հայրենասէր ըլլալով՝ կարօտով կը հեռանան հայրենիքէն։ Հոս կ՚ուզեմ հետեւեալ օրինակը նշել.- պատմական մշակութային կեդրոնները կամ փակ շուկան այդ մարդոց առօրեային մաս կը կազմեն եւ երբ գիւղացին առտուն կ՚արթննայ եւ կը տեսնէ որ կը քանդեն այդ կեդրոնները – առանց զինք տեղեակ պահելու – հոն է որ կ՚անհետանայ հայրենիքի հանդէպ սեփականութեան զգացողութիւնը, ինչպէս նաեւ ապագայի նկատմամբ յոյսը։ Եւ ասիկա կը վերաբերի ոչ միայն սահմանամերձ շրջաններուն, որովհետեւ ընդհանրապէս Հայաստանի ժողովուրդը մասնակից չէ իր առօրեայ կեանքին կապուած որոշումներուն։ Այսօր իշխող կուսակցութիւնը խորհրդարանին մէջ ունի բացարձակ մեծամասնութիւն եւ քանի որ գոյութիւն չունի պետութեան գործունէութիւնը վերահսկող կառոյց մը, եւ դատական իշխանութիւնն ալ անկախ չէ, հետեւաբար կայացած որոշումները արդար չեն կրնար ըլլալ։

«ՆՅ».- Ըստ երեւոյթին, ձեր հետազօտութեան բուն նպատակը ներգաղթ կազմակերպելն է։

Կ.Մ.- Ներգաղթի պարագաներ եղած են։ Սակայն ներգաղթողը քանի մը տարի ետք արտագաղթած է…։ Հարցը հետեւեալն է՝ նախ պէտք է ներքին մթնոլորտը բարելաւել, այսինքն դատական արդար համակարգ եւ օրէնքի իշխանութիւն հաստատել։ Յետոյ ալ գործարարութեան համար հաւասար պայմաններ ստեղծել, կաշառակերութեան դէմ պայքար մղել։

Ըսեմ որ այսօր Սփիւռքի նախարարութեան հետ միատեղ աշխատանք կը տարուի ներգաղթ կազմակերպելու համար։ Անշուշտ, կան յաջողած պարագաներ՝ մասնաւորաբար արհեստաւորներու շրջանակին մէջ, որոնք Հայաստանի մէջ գործարարութեամբ կը զբաղին։

«ՆՅ».- Վերադարձողներու մէջ Հայաստանցիներ կա՞ն։

Կ.Մ.- Գիտէք, մեր շրջապտոյտներու ընթացքին հանդիպած ենք շատ ու շատ հայաստանցիներու, որոնք անխտիր բոլորն ալ կ՚ապրին Հայաստանի կարօտով ու երկիր վերադառնալու յոյսով, սակայն անոնք նա՛եւ կ՚ըսեն, թէ այն ատեն կը վերադառնան երբ իրավիճակը բարելաւուի եւ իրենց երախաներու ապագան երաշխաւորուի։

«ՆՅ»

 

 


Առնչվող նյութեր
1. Ուշագրավ համերգների և դասախոսությունների շարքը հայկական երաժշտությունը հասցրեց Ասիա՝ կամրջելով դարավոր ժողովրդական ավանդույթները
2. Ամենայն Հայոց Կաթողիկոսը և ՀԲԸՄ նախագահը քննարկեցին հայրենական կյանքին և Սփյուռքին վերաբերող հարցեր
3. ՀԲԸՄ-ը նոր թափով պիտի սկսի հասարակական-տնտեսական ծրագիրներու իրականացումը
4. Հ.Բ.Ը.Մ.-Ը ՈՒՍՈՒՄՆԱԿԱՆ ԴՐԱՄԱՇՆՈՐՀՆԵՐ ԿԸ ՏՐԱՄԱԴՐԷ ԼՈՅՍ ՀԻՄՆԱԴՐԱՄԻ ԼՈՒԾԱՐՄԱՆ ՊԱՏՃԱՌՈՎ ՏՈՒԺԱԾ ՈՒՍԱՆՈՂՆԵՐՈՒ
5. ՀԲԸՄ-ն խթանում է Հայաստանի և Սփյուռքի միջև նոր շփումները
6. Creative Armenia-ն և Հայկական Բարեգործական Ընդհանուր Միությունը հայտարարում են նորարար տաղանդավոր արվեստագետներին օժանդակող ծրագրի մեկնարկը
7. ՀԲԸՄ-ն ներկայացնում է անհրաժեշտ էլեկտրոնային գրքեր ու հավելվածներ Հայաստանի մասին
8. ՀԲԸՄ Նախագահն ու Հայաստանի Նոր Ղեկավարությունը Քննարկում են Համագործակցության Հնարավորություններն ու Փոխադարձ Հետաքրքրության Ոլորտները
9. Լրատվական դաշտը՝ որպես Սփյուռք-Հայրենիք կամուրջ
10. ՀԲԸՄ-ը Նշում է Հայաստանի Առաջին Հանրապետության Հաղթական 100-ամյակը

Մեկնաբանություն

Վերջին լուրեր
1.Հայաստանի և Էստոնիայի հարյուրամյակներին նվիրված համերգ Տալլինում
2.Հայկական տոներին նվիրված համերգ Հռոմում.
3.Սեւան Քէլէշեանը կամրջում է հայաստանցուն եւ սփյուռքահային. «Ի՞նչ Կ’ըսեմ, Ի՞նչ Կ’ըսես» հարղորդումը եթերում
4.Երկարամյա դադարից հետո Եպիսկոպոսական Պատարագ մատուցվեց Բուրգասի Ս. Խաչ եկեղեցում
5.Էստոնիա. Քննարկվել է հայ-էստոնական թվային ֆորում անցկացնելու գաղափարը
6.Լեհաստանի Զամոշչ քաղաքում բացվել է հայկական խաչքար և տեղի են ունեցել մի շարք մշակութային միջոցառումներ
7.Ին՞չ եփել այսօր՝ քաղաքական կաթսայում. հայացք Երեւանից
8.Աշխարհում յուրաքանչյուր 5 վայրկյանը մեկ 15 տարին չլրացած երեխա է մահանում. ՄԱԿ-ի զեկույց
9.Բուլղարահայ նկարիչ Բեդիգ Բեդրոսյանի հուշարձանը Սիլիստրայում
10.Լոնդոնի Թագավորական քոլեջում փորձաքննվել է ՀՀ Չինաստանի «Մետաքսի ճանապարհին» միանալու ռազմավարությունը` հայ գիտնականի մասնակցությամբ
Դիտել բոլորը
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: