ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
21 նոյեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Հայ գրատպության 500ամյակը Վենետիկում

20 դեկտեմբերի, 2012 | 10:10

ՎԵՆԵՏԻԿ. – Դեկտեմբերի 16-17-ը Վենետիկի Մխիթարյան Միաբանության և ՀՀ սփյուռքի նախարարության նախաձեռնությամբ կազմակերպվեցին միջոցառումներ` նվիրված Հայ գրատպության 500–ամյա հոբելյանին:

Միջոցառումների մեկնարկ տրվեց դեկտեմբերի 16–ին Սուրբ Ղազար կղզու Մխիթարյան Միաբանության Մայրավանքի եկեղեցում, որտեղ հայ գրատպության նվիրյալների   հոգիների հանգստության համար մատուցվեց Սուրբ Պատարագ: Միջոցռումներին ներկա էր նաեւ ՀՀ սփյուռքի նախարար Հրանուշ Հակոբյանը։

Առանձնակի հետաքրքրություն ներկայացրեց Սուրբ Ղազարում բացված` տպագրության հնագույն սարքերի և գործիքների ցուցադրությունը: Մասնակիցները կարևորեցին հայ գրքի հայտնի տպագրական կենտրոններից մեկի պահպանումը և համալրումը նոր ցուցանմուշներով: Այդպիսով այն կդառնա հայ տպագրության յուրօրինակ թանգարան, հայկական մշակույթի կարևոր անձնագիր, համահայկական նշանակալի գործի սկիզբ, այցեքարտ կղզի այցելողների համար:

Նախարարը բացման խոսքում գնահատեց մխիթարյանների անուրանալի ներդրումը հայ գրատպության զարգացման գործում և նշեց, որ ՀՀ Նախագահի հովանավորությամբ և աջակցությամբ շուտով կսկսվեն Վենետիկի Մխիթարյան միաբանության մշակութային ժառանգության թվայնացման աշխատանքները: 

 Երեկոյան Մուրադ-Ռաֆայելյան վարժարանի սրահում տեղի ունեցավ “Գասպար Եդեսացի” համույթի “Պայծառ Նաիրի” երաժշտական-բանաստեղծական պիեսի բեմադրությունը: Իտալացի երիտասարդները ներկայացրեցին հայ բանաստեղծների և երգահանների ստեղծագործությունները հայերենով:

ՀՀ սփյուռքի նախարարն իր ողջունի խոսքում շնորհակալություն հայտնեց  համույթի իտալացի անդամներին բարձրարվեստ կատարումների համար: Նա միջոցառումը գնահատեց որպես հայ-իտալական մշակութային բարեկամության լավագույն օրինակ:                         

Դեկտեմբերի 17–ին կայացավ ՀՀ սփյուռքի նախարարության և Մխիթարյան Միաբանության կողմից կազմակերպված “Հայ գրքի հետքերով” խորագիրը կրող գիտաժողովը, որին մասնակցեցին հայ և այլազգի գիտնականներ, հայագետներ:

Բացման խոսքով ելույթ ունեցավ Մխիթարյան Միաբանության Ընդհանրական աբբահայր Գերաշնորհ Հայր Եղիա վրդ. Քիլաղպյանը:

Գիտաժողովում ՀՀ սփյուռքի նախարար Հրանուշ Հակոբյանն իր ելույթում անդրադարձավ Մեսրոպյան գյուտից հետո հայ ժողովրդի հոգևոր կյանքում Վենետիկում առաջին գրքի նշանակությունը, ևս մեկ անգամ արժևորեց Հակոբ Մեղապարտի` հայ հոգևոր և աշխարհիկ մշակույթի զարգացման գործում ունեցած ավանդը, ներկայացրեց հայ գրքի անցած ճամփան և նախանշեց բարձր տեխնոլոգիաների առկայության պայմաններում այսօրվա անելիքները:

Ելույթներով հանդես եկան պրոֆեսորներ Ռուդի Կորեան, Քլոդ Մութաֆյանը, Ագնես Ուզունյանը, Ռայմոն Գեորգյանը, Հ.Վահան Վրդ, Օհանյանը և այլ հայտնի գիտնականներ:

Գիտաժողովով ավարտվեցին ուղիղ մեկ տարի առաջ հայ գրքի 500 ամյակին նվիրված տոնակատարությունները, որոնք սկսվել էին Վենետիկում` հայ առաջին գրքի ծննդավայրում, ՀՀ Նախագահի մասնակցությամբ:

Հայ գրատպության 500-ամյակի կապակցությամբ ՀՀ սփյուռքի նախարարությունը և Մխիթարյան Միաբանությունը համատեղ հիմնել են Հակոբ Մեղապարտի հուշամեդալը, որը հանձնվելու է հայ գրատպության պատմության մեջ մեծ ավանդ ունեցող գործիչներին:

Հակոբ Մեղապարտ հուշամեդալի պատրաստումը հովանավորում է «Զանգակ» հրատարակչությունը, որը Հայաստանի առաջատար հրատարակչություններից մեկն է:

Orer.eu


Առնչվող նյութեր
1. «Լաւագոյն հայկական կրթօջախ» ` Հայ Լեզուի և Մշակոյթի Ամառնային Խտացեալ Դասընթացքին
2. ՀԱՅ ԼԵԶՈՒԻ ԵՒ ՄՇԱԿՈՅԹԻ ԱՄԱՌՆԱՅԻՆ ԽՏԱՑԵԱԼ ԴԱՍԸՆԹԱՑՔ Օգոստոս 2018
3. Իտալիա. Ապրիլ 24-ի ոգեկոչումը Սուրբ Ղազարի մէջ
4. Վենետիկ – Սուրբ Ղազար Վանք- Բացում «Յառաջ» օրաթերթի ցուցահանդէսին
5. ԵՐԵՍՈՒՆ ՀԱՅԿԱԿԱՆ ՕԳՈՍՏՈՍ ՎԵՆԵՏԻԿՈՒՄ
6. ՅՈՒՆԵՍԿՕ-ի մշակութային համաժողովը բացվեց Երեւանում
7. Հաղթանակի օրը` հաղթանակով. Վենետիկի 56-րդ բիենալեում Հայաստանի տաղավարն արժանացել է «Ոսկե առյուծ» գլխավոր մրցանակի
8. Հակոբ Մանուկյանի «Հայերի ներկայությունը Իտալիայում 1915-2000թթ.» գրքի շնորհանդեսը Վենետիկում
9. Հայոց ցեղասպանությանը նվիրված ցուցահանդես Վենետիկի «Մարչիանա» ազգային գրադարանում

Մեկնաբանություն

© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: