ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
21 սեպտեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

ՖՐԱՆՍԻԱ. Նոր ազգային ժողովը պիտի ունենայ չորս հայ երեսփոխան

20 հունիսի, 2017 | 18:53

ՓԱՐԻԶ.- ՆՈՐ ՅԱՌԱՋ.-Կիրակի, Յունիս 18-ին տեղի ունեցաւ խորհրդարանական ընտրութիւններու Բ. շրջանը: Ա. շրջանի արդիւնքները արդէն բաւական խօսուն էին ընդհանուր հակումներու մասին: Կը մնար սպասել այս ընտրութիւններուն՝ աւելի յստակ պատկեր մը ունենալու համար:
Զգայացունց ոչինչ պատահեցաւ, տեղի չունեցան հրաշքներ:
Ինչպէս կ՚ակնկալուէր, նախագահ Մաքրոնի «Ընթացող Հանրապետութիւն»-ը (La République en Marche! – LREM) տարաւ ջախջախիչ յաղթանակ, թէեւ նուազ քան Ա. շրջանի արդիւնքներու թելադրած կանխատեսութիւնները: Արդարեւ մինչ կը սպասուէր, որ հազիւ տարի մը առաջ լոյս աշխարհ եկած այդ կուսակցութիւնը նուաճէ Ազգային ժողովի 577 աթոռներու 420-էն 450-ը, ըստ նախնական արդիւնքներու՝ ստիպուեցաւ «գոհանալ» 361 աթոռով (MoDem-ի հետ): Հանրապետականները ձեռք ձգեցին յարաբերաբար աւելի լաւ արդիւնք մը, քան ինչ որ կը սպասէին, իսկ ընկերվարականներու ուղղակի աւազախրում մը տեղի ունեցաւ: Ատոր տրամաբանական հետեւանքը եղաւ կուսակցութեան ընդհ. քարտուղար Ժան-Քրիսթոֆ Գամպատելիսի անմիջական հրաժարումը առաջին արդիւնքներու յայտարարուելէն անմիջապէս ետք, մա՛նաւանդ որ՝ Գամպատելիս անձա՛մբ ալ պարտուեցաւ եւ չընտրուեցաւ երեսփոխան:
Բ. շրջանի կարեւորագոյն յայտնութիւնը կարելի է նկատել Ժան-Լիւք Մելանշոնի «Չենթարկուող Ֆրանսան» (La France insoumise) կուսակցութեան արձանագրած արդիւնքը: Այդ կուսակցութիւնը 15 երեսփոխանի սահմանը գերազանցած ըլլալով՝ Ազգային ժողովին մէջ խմբակցութիւն կազմելու իրաւունք պիտի ունենայ, ինչ որ բնաւ արհամարհելի նուաճում մը չէ քաղաքական հոսանքի մը համար, նկատի ունենալով այդ հանգամանքին ընձեռած կարելիութիւնները:
Ազգային ճակատը, որու պարագլուխը՝ Մարին Լը Փէն ընտրուեցաւ, հակառակ նախագահական ընտրութիւններու իր տպաւորիչ վերելքէն ետք արձանագրած յստակ անկումին՝ գոհ է, որովհետեւ աւելի քան կրկնապատկած է իր երեսփոխաններու թիւը: Այս կուսակցութիւնը իր ձախողութեան պատճառը կը կապէ ձեռնպահութեան եւ մա՛նաւանդ ընտրութեանց մեծամասնական դրութեան եւ կը պահանջէ, որ վերահաստատուի համեմատականը: Արդարեւ, Ընկերվարական կուսակցութիւնը եւ իր դաշնակիցները միասնաբար աւելի քան 1% նուազ ձայն ստացած ըլլալով հանդերձ՝ իրմէ շուրջ 5 անգամ աւելի աթոռ ձեռք ձգած են:
Բայց, այս ընտրութիւններուն ամենէն կարեւոր երեւոյթը անկասկած ձեռնպահութեան մրցանշային տոկոսն է՝ 57,36%, որ Ե. Հանրապետութեան պատմութեան մէջ ամենէն բարձրը կը հանդիսանայ: Անընդունելի է ասիկա ժողովորդավարութեան օրրանը նկատուող երկրի մը համար: Այս անտարբերութիւնը կը մեկնաբանուի զանազան վարկածներով, ըստ արտայայտուողին պատկանելիութեան: Ոմանք կ՚ըսեն, թէ Ֆրանսացին այլեւս ձանձրացած է յաջորդական ընտրութիւններէն (քանի մը ամսուան մէջ այս մէկը հինգերորդն էր, եթէ նկատի ունենանք կուսակցութեանց նախնական ընտրութիւններն ալ), ուրիշներ կ՚ըսեն, թէ այլեւս հաւատք չէ մնացած քաղաքականութեան նկատմամբ, ոմանց կարծիքով LREM-ի յաղթանակը ստոյգ կը նկատուէր, քուէարկողը կարիքը չտեսաւ տեղէն շարժելու, իսկ ամենէն լաւատեսները հարցը կը կապեն գեղեցիկ օդին, օդափոխութեան մեկնումներուն:
Յամենայն դէպս, զարգացումները առնուազն շատ լուրջ ազդարարութիւն մը եղան դասական նկատուող կուսակցութիւններուն համար, չըսելու համար լախտի հարուած մը: Բնապահներն ալ անհետացման եզրին հասած են, անոր անդամներէն շատերը միացած ըլլալով LREM-ին:

Ստորեւ նախնական արդիւնքները.-
 LREM/MoDem՝ 361 աթոռ (49,12%)

 Հանրապետականներ (LR), Ժողովրդավարներու միութիւն եւ Անկախներ (UDI), Զանազան աջեր (DVD)՝ 126 (26,95%)

 Ազգային ճակատ (FN)՝ 8 (8,75%)

 Ընկերվարական կուսակցութիւն (PS), Արմատական ձախերու կուսակցութիւն (PRG), Զանազան ձախեր (DVG)՝ 46 (7,49%)

 «Չենթարկուող Ֆրանսա» (FI), Համայնավար կուսակցութիւն (PCF)՝ 26 (6,06%)
(10 աթոռներու ալ ընտրուած են տարբեր հոսանքներու թեկնածուներ)

 Շրջանամէտներ՝ 0,76%

 Զանազան՝ 0,55%

 Բնապահներ՝ 0,13%

 «Ոտքի՝ Ֆրանսա»՝ 0,1%

 Ծայրայեղ աջ՝ 0,1%

– Ոչ ոքի՝ սպիտակ քուէներ՝ 6,93%

– Անվաւեր քուէներ՝ 2,94%
Հինգ հայ թեկնածուներէն չորսը ընտրուեցան

Բ. շրջան անցած հինգ հայ թեկնածուներէն չորսը ընտրուեցան: Միակ բացառութիւնը կազմեց Պուշ-տիւ-Ռոնի մէջ Փասքալ Շամասեան, որ հակառակ Ա. շրջանի իր լայն առաւելութեան, պարտուեցաւ հանրապետական Վալերի Պուայէէն, որ այլեւս ներկայացնելու կարիքը չենք զգար:

Այսպէս, ընտրուեցան՝
 Հօ-տը-Սէնի մէջ LREM-ի թեկնածու Ժագ Մարիլոսեան ձայներու 57,81%-ով՝ ընդդէմ հանրապետական Էրիք Պարտոաթիի,

 Ռոնի մէջ Տանիէլլ Ղազարեան (LREM) 52,35%-ով՝ ընդդէմ հանրապետական Ֆիլիփ Մէօնիէի, որ Ռոնի շրջանային խորհուրդի փոխնախագահն է,
 Շէրի մէջ Նատիա Եսայեան (MoDem) 52,57%-ով՝ ընդդէմ համայնավար Նիքոլա Սանսիւի,

 Էօռ եւ Լուառի մէջ Կիյոմ Գասպարեան (LREM) 55,18%-ով՝ ընդդէմ հանրապետական Ֆրանք Մասելիւսի:

Հայ դատի յանձնախումբի զօրակցած միւս թեկնածուներէն ընտրուեցան Մարին Պրընիէ (հանրապետական, Ծովային Ալպեաններ), Լիւք Գարվունաս (ընկերվարական, Վալ-տը-Մառն), Ֆրանսուազ Տիւմա (LREM, Կառ), Ֆրանսուա Միշէլ Լամպէռ (LREM, Պիւշ-տիւ-Ռոն), Ֆրանսուա Փիւփոնի (ընկերվարական, Վալ-տ՚Ուազ), Կի Թեսիէ (հանրապետական, Պուշ-տիւ-Ռոն):
Իսկ «Ֆրանսա-Արցախ բարեկամութեան շրջանակ»-ի համանախագահ Ֆրանսուա Ռոշպլուան (UDI, Լուառ) պարտուեցաւ երեսփոխանական վեց շրջաններ բոլորելէ ետք, ինչպէս նաեւ Կրթութեան նախկին նախարարուհի Նաժատ Վալօ-Պելքասեմ (ընկերվարական, Ռոն): ■


Առնչվող նյութեր
1. Փարիզում սփյուռքի նախարարության և «Հայասա» ֆեդերացիայի միջև ստորագրվեց հուշագիր
2. Ելիսեյան պալատում կայացել է Նիկոլ Փաշինյանի և Էմանուել Մակրոնի հանդիպումը
3. Հայաստանում սկսվել է մի նոր գործընթաց, որը կտարածվի աշխարհում. ասել է Նիկոլ Փաշինյանը ֆրանսահայերին
4. Ֆրանսիայում ՀՀ նորանշանակ դեսպանն ընդունեց Ֆրանսահայ կազմակերպությունների համակարգող խորհրդի անդամներին
5. Հայոց ցեղասպանության 103-րդ տարելիցին նվիրված միջոցառում Ստրասբուրգում
6. Հայոց ցեղասպանության 103-րդ տարելիցին նվիրված միջոցառում Մարսելում
7. Հայաստանին նվիրված 15-օրյակ Մարսելում
8. Հասմիկ Տոլմաջյանը՝ Ֆրանսիայում Հայաստանի դեսպան
9. Ֆրանսահայ դերասանուհի Հերմինե Ղարագյոզյանը Ֆեբիոֆեստում. չեխական երկու ֆիլմի պրեմիերա
10. «Արցախ. թաքնված գանձեր» խորագրով ցուցահանդես Ստրասբուրգում

Մեկնաբանություն

© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: