ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
23 սեպտեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Ֆրանչիսկոս Սրբազան Պապի եւ Գարեգին Բ Ամենայն Հայոց Կաթողիկոսի համատեղ հռչակագիրը

27 հունիսի, 2016 | 06:55

pope ejmiatsinԱյսօր  համայն  հայութեան  հոգևոր  կենտրոն  Սուրբ  Էջմիածնում,  մենք` Ֆրանչիսկոս Պապը և Գարեգին Բ  Ամենայն Հայոց Կաթողիկոսը, ընծայում ենք մեր մտքերը  և  սրտերը  որպէս  շնորհակալութեան  տուրք  Ամենակարողին`  պայքարով քայքայուած  և  սփոփանքի  ու  յոյսի  ծարաւով  լեցուն  աշխարհում  շարունակելու  և մեծացնելու հաւատի ու սիրոյ սերտ կապերը Հայոց Եկեղեցու և Կաթոլիկ եկեղեցու միջև՝ փրկութեան աւետարանական ուղերձի իրենց համընդհանուր վկայութեամբ:

Մենք  փառաբանում  ենք  ամենասուրբ  Երրորդութեանը` Հօրը,  Որդուն  և  Սուրբ Հոգուն, ընձեռնելու համար մեզ հնարաւորութիւնը մէկտեղուելու Պիպլիական Արարատի երկրում,  որը  կանգուն  է  որպէս  վկայութիւն,  որ  Աստուած  է  միշտ  մեր պաշտպանութիւնն ու փրկութիւնը:

Գոհունակութեամբ  ու  հոգևոր  ուրախութեամբ  ենք  անդրադառնում,  որ    2001թուականին քրիստոնէութիւնը Հայաստանում  պետական կրօն հռչակման 1700-ամեակի առիթով Հայաստան այցելեց Սուրբ  Յովհաննէս-Պօղոս Բ Պապը՝ որպէս Հայ և Կաթոլիկ եկեղեցիների  եղբայրական  ջերմ  յարաբերութիւնների  պատմութեան  նոր  էջի վկայութիւն:  Մենք երախտապարտ ենք, որ շնորհն  ենք ունեցել միասին լինելու Հռոմի Սուրբ Պետրոսի տաճարում, հանդիսաւոր պատարագի ժամանակ, 2015թ, ապրիլի 12-ին, որտեղ մենք մեր յանձնառութիւնն արտայայտեցինք հակադարձելու բռնութեան ու անհանդուրժողականութեան  ցանկացած  դրսևորում՝  վերակոչելով  այն,  ինչ  արդեն հաստատուել  էր  Յովհաննէս  Պօղոս  Բ-ի  և  Գարեգին  Բ  Ամենայն  Հայոց  Կաթողիկոսի կողմից  ստորագրուած  համատեղ  յայտարարութիւն  մէջ,  որ  «մէկուկէս  միլիոն  հայ քրիստոնեաների  բնաջնջումն  ընդհանրապէս  ընկալւում  է  իբրև  Ի  դարի  առաջին ցեղասպանութիւն» (Համատեղ յայտարարութիւն, Գարեգին Բ և Յովհաննէս-Պօղոս Բ, (27սեպտեմբերի, 2001թ.):

Փառք  Բարձրեալին,  որ  այսօր  քրիստոնէական  հաւատը  կենսունակ իրականութիւն  է  Հայաստանում,  և  Հայոց  եկեղեցին  իր  լիարժէք  առաքելութիւնն  է իրականացնում՝  եկեղեցիների  միջև  տիրող  համագործակցութեան  եղբայրական  ոգով նեցուկ լինելով հաւատացեալներին՝ զօրակից, արդար և խաղաղ աշխարհի կերտման գործում:  Ցաւոք,  մենք  վկաներ  ենք  մեր  աչքերի  առաջ  տեղի  ունեցող  մի  մեծ ողբերգութեան՝  անթիւ  անհամար  անմեղ  մարդկանց  սպանութիւնների,  Մերձաւոր Արևելքում և աշխարհի այլ ծագերում  էթնիկ, տնտեսական, քաղաքական և կրօնական հիմքերի վրայ զարգացող շարունակական բնոյթի հակամարտութիւններով թելադրուած տեղահանումների  կամ  պարտադրուած  ցաւալի  ու  անորոշ  աքսորների:  Այդ  ամենի արդիւնքում կրօնական և էթնիկ  փոքրամասնութիւնները դարձել են հալածանքների և դաժան վերաբերմունքի թիրախ, այն առումով, որ սեփական կրօնական համոզմունքի համար տառապելը  դարձել է ամենօրեայ իրականութիւն: Նահատակները պատկանում են  բոլոր  եկեղեցիներին  և  նրանց  տառապանքը  «արեան  էկումենիզմ»  է,  որը անդրացնում է  քրիստոնեաների միջև առկայ պատմական բաժանումները՝ մեզ բոլորիս կոչելով  նպաստել  Քրիստոսի  առաքեալների  տեսանելի  միասնականութեանը:  Մենք, Սուրբ  Առաքեալների`  Պետրոսի  և  Պօղոսի,  Թադէոսի  և  Բարդուղիմեոսի բարեխօսութեամբ, միասնաբար աղօթում ենք, որպէսզի սրտերի փոփոխութիւն տեղի ունենայ բոլորի մէջ, նրանց, ովքեր գործում են այսպիսի յանցանքներ և նրանց, ովքեր իրենց  դիրքի  շնորհիւ  կարող  են  կանգնեցնել  բռնութիւնները:  Մենք  յորդորում  ենք ազգերի  առաջնորդներին՝  ունկնդրելու  միլիոնաւոր  մարդկային  արարածների  կոչին, ովքեր խաղաղութիւն և արդարութիւն են տենչում աշխարհում, ովքեր յարգանք են պահանջում  իրենց  աստուածատուր  իրաւունքների  նկատմամբ,  ովքեր  անյապաղ կարիք ունեն հացի, այլ ոչ թէ զէնքերի:

Ցաւօք,  մենք  ականատես  ենք  կրօնի  և  կրօնական  արժէքների  արմատական դրսևորումների,  որոնք  կիրառւում  են՝  ատելութեան,  խտրականութեան  ու  բռնութեան տարածումն արդարացնելու  համար:  Նմանատիպ  յանցանքների՝  կրօնական գաղափարներով  արդարացումն  անընդունելի  է,  քանի  որ  «Աստուած  խռովութեան Աստուածը  չէ,  այլ  խաղաղութեան» (Ա  Կոր. 14:33):  Աւելին,  կրօնական տարբերութիւնների հանդէպ յարգանքն անհրաժեշտ պայման է էթնիկ ու կրօնական տարբեր համայնքների խաղաղ համակեցութեան համար: Եւ հենց քրիստոնեայ լինելով է, որ մենք կոչուած ենք խաղաղութեան ու հաշտութեան ուղիներ փնտռելու և իրագործելու:

Այս իմաստով մենք յուսով ենք, որ Լեռնային Ղարաբաղին վերաբերող հարցերը կգտնեն խաղաղ լուծում: Յիշելով  այն ամենը, ինչ Յիսուս սովորեցրեց Իր աշակերտներին, երբ Նա ասաց. «Ես սոված էի, և դուք ինձ հաց տուեցիք, ես ծարաւ էի և դուք ինձ խմելու մի բան տուեցիք, ես  օտարական  էի,  և  դուք  ինձ  ընդունեցիք,  ես  մերկ  էի,  և  դուք  ինձ  հագցրեցիք,  ես հիւանդ էի, դուք ինձ այցելեցիք, ես բանտում էի, և դուք եկաք ինձ տեսութեան» (Մատթ.25:35-36), մենք  խնդրում  ենք  մեր  եկեղեցիների  հաւատացյալներին  բացելու  իրենց սրտերն  ու  ձեռքերը`  օգնելու  պատերազմի  և  ահաբեկչութեան  զոհերին, փախստականներին և նրանց ընտանիքներին:  Կարևորուում է մեր մարդասիրութեան զգացումը,  մեր  զօրակցութիւնը,  կարեկցանքը  և  մեծահոգութիւնը,  որոնք  կարող  են ճիշտ արտայայտել միայն առկայ նիւթական պաշարների անյապաղ և գործնական նուիրատուութեամբ: Մենք ընդունում ենք  այն, ինչն արդեն իսկ արւում է, բայց պնդում ենք, որ աւելին պէտք  է  արուի  քաղաքական  առաջնորդների  և  միջազգային  կառոյցների  կողմից, որպէսզի ապահովուած լինի  բոլորի՝ խաղաղութեան և անվտանգութեան մէջ ապրելու իրաւունքը,  պաշտպանուած  լինի  օրէնքի  գերակայութիւնը,  կրօնական  և  էթնիկ փոքրամասնութիւնների  պաշտպանութիւնը,  կանխուած  լինեն  մարդկային թրաֆիքինգը և մաքսանենգութիւնը: Հասարակութեան  ստուար  հատուածների  աշխարհիկացումը,  օտարումը  հոգևորից  ու աստուածայինից, անխուսափելիօրէն հանգեցնում են մարդու և մարդկային ընտանիքի ապասրբացմանն ու նիւթապաշտական ընկալմանը:  Այս առումով մենք  մտահոգ ենք շատ  երկրներում  ընտանեկան  կեանքի  ճգնաժամով:  Հայ  և  Կաթոլիկ  եկեղեցիներն ընտանիքի  մասին  նոյն  ընկալումն  ունեն,  որը  հիմնուած  է  ազատ  կամքով  ու հաւատարմութեամբ  ծնուած  սիրոյ  արդիւնք  հանդիսացող  տղամարդու  և  կնոջ ամուսնութեան վրայ: Մենք ուրախութեամբ արձանագրում ենք, որ չնայած քրիստոնեաների միջև առկայ բաժանումներին,  այն, ինչ մեզ միաւորում է, աւելին է, քան այն, ինչ մեզ բաժանում է, որի վրայ էլ պէտք է կառուցել Քրիստոսի եկեղեցու միութիւնը, ըստ Տիրոջ խօսքի, որբոլորը  մէկ  լինեն  (Հովհ.  ԺԷ  21) :  Վերջին  տասնամեակներում  մեր  եկեղեցիների յարաբերութիւնները  թևակոխել  են  որակապէս  նոր  փուլ՝  ամրապնդուած  լինելով համատեղ  աղօթքներով  և  ժամանակակից  մարտահրաւէրներին  դիմագրաւելու միասնական  ջանքերով:

Մենք  այսօր  համոզուած  ենք  այս  յարաբերութիւնների շարունակականութեան  խիստ  կարևորութեան  մէջ՝  երկուստեք  առաւել  խորը  և վճռական յանձնառութեամբ ոչ միայն աստուածաբանական մարզում, այլեւ աղօթական և գործնական  համագործակցութեամբ  տեղական  համայնքներում՝  լիարժէք հաղորդակցութիւն  և միութեան յստակ արտայայտութիւններ կիսելու տեսլականով: Մենք  յորդորում  ենք  մեր  հաւատացեալներին  ներդաշնակ  կերպով  աշխատելու հասարակութեան  մէջ  քրիստոնէական  արժէքների  զօրացման  համար,  որոնք արդիւնաւոր  կերպով  նպաստում  են  արդարութեան,  խաղաղութեան  և  մարդկայինհամերաշխութեան  քաղաքակրթութեան  կառուցմանը:

Հաշտութեան  և  եղբայրութեան ուղին  բաց  է  մեր  առաջ:  Թող  Սուրբ  Հոգին,  ով  առաջնորդում  է  մեզ  ամենայն ճշմարտութեան /հմմտ. Յովհ. ԺԶ 13/, զօրացնի ամեն  ազնիւ ջանք, որ  ուղղուած է մեր մէջ սիրոյ և հաղորդութեան կամուրջների կառուցմանը:

Սուրբ Էջմիածնից մենք կոչ ենք անում մեր բոլոր հաւատացյալներին միանալու մեզ  աղօթքով,  Սուրբ  Ներսէս  Շնորհալու  խօսքերով. «Փառաւորեալ  Տէր,  ընդունիր ծառաներիդ աղաչանքները և ի բարին կատարիր մեր խնդրանքները՝ բարեխօսութեամբ Սուրբ Աստուածածնի, և Յովհաննէս Մկրտիչի, և Սուրբ Ստեփանոս Նախավկայի, և մեր սուրբ  Գրիգոր  Լուսաւորչի,  և  սուրբ  առաքեալների,  մարգարէների,  վարդապետների, մարտիրոսների,  հայրապետների,  ճգնաւորների,  կոյսերի  և  Քո  բոլոր  երկնային  ու երկրային  սրբերի:  Եւ  Քեզ՝  անբաժանելի  Սուրբ  Երրորդութեանդ,  փառք  ևերկրպագութիւն, յաւիտեանս յաւիտենից, ամեն.»:

Ս. Էջմիածին, 26 յունիսի, 2016

Նորին Սրբութիւն Ֆրանչիսկոս,  Նորին Սրբութիւն Գարեգին Բ


Առնչվող նյութեր
1. Ժամանակն է համազգային զգօնութեան. ՌԱԿ հայտարարութիւնը եկեղեցւոյ տագնապի շուրջ
2. Ամենայն Հայոց կաթողիկոսի ուղերձը ուխտավորներին՝ իր հրաժարականի պահանջի առիթով
3. Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՇՆՈՐՀԱՎՈՐԱԿԱՆ ՈՒՂԵՐՁԸ ՀԱՂԹԱՆԱԿԻ ԵՎ ԽԱՂԱՂՈՒԹՅԱՆ ՏՈՆԻ, ՇՈՒՇԻԻ ԱԶԱՏԱԳՐՄԱՆ ԵՎ ԱՐՑԱԽԻ ՊԱՇՏՊԱՆՈՒԹՅԱՆ ԲԱՆԱԿԻ ՀԻՄՆԱԴՐՄԱՆ ՕՐԵՐԻ ԱՌԻԹՈՎ
4. Արամ Ա կաթողիկոսը Ֆրանցիսկոս Պապին է ներկայացրել իր առաջարկները
5. Վատիկանում տեղի ունեցավ Սուրբ Գրիգոր Նարեկացու արձանի բացման արարողությունը
6. Ամենայն Հայոց Կաթողիկոսի կոնդակը Հայաստանի առաջին Հանրապետութեան եւ մայիսեան հերոսամարտերի 100-ամեակի առիթով
7. Սուրբ Ծննդյան և Աստվածհայտնության տոնը Մայր Աթոռ Սուրբ Էջմիածնում
8. Լույս է տեսել «Արարատ»-ի բնագիրները» գրքի Բ հատորը
9. Գարեգին Բ Վեհափառի գահակալության 18 տարիները
10. Գարեգին Բ-ն Բեռլինում նախագահել է «Մերձավոր Արևելքի քրիստոնյաները» միջազգային գիտաժողովը

Մեկնաբանություն

Վերջին լուրեր
1.Իսպանիա. Հայաստանին նվիրված տոնական համերգ Սանտա Կոլոմա դե Գրամանետիում
2.«Իմ առաջադրանքը ձեզ շատ պարզ է` ամեն օր լուծել թեկուզ փոքր, բայց որևէ կոնկրետ խնդիր». Վարչապետը հանդիպել է Արարատի մարզի համայնքների ղեկավարներին
3.Գաֆեսճյան արվեստի կենտրոնում տեղի ունեցավ Հայաստանում Եվրոպական Ժառանգության օրերի պաշտոնական բացումը
4.ՀՀ քաղաքացիական ավիացիայի կոմիտեի նախագահի այցը Չինաստան
5.Երեւանի ավագանու ընտրությունների կապակցությամբ Եվրոպայի Հայերի Համագումարի կոչը Երեւանցիներին.
6.Ռումանիոյ Հայոց Թեմի առաջնորդ Տ. Տաթև եպիսկոպոս Հակոբյանի շնորհավորական ուղերձը ՀՀ անկախության 27-րդ տարեդարձի առիթով
7.Հայաստանի անկախության 27-ամյակին նվիրված միջոցառում Լիոնում
8.ԱՌԱՋԻՆԷՆ ՄԻՆՉԵՒ ՉՈՐՐԱՐԴ ՀԱՅԱՍՏԱՆԻ ՀԱՆՐԱՊԵՏՈՒԹԻՒՆ. ԱՆԿԱԽՈՒԹՅԱՆ ՕՐ
9.Պապը Կը Շնորհաւորէ Մխիթարեան Միաբանութեան 300ամեակը
10.Չինական գեղագրությունը և գրաֆիկան Հայաստանում
Դիտել բոլորը
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: