ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
23 սեպտեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Ցուցարարներու Եւ Նախագահին Միջեւ Հանդիպումէն Ետք Իսկ՝ Արցախի Մէջ Բողոքը Կը Շարունակուի

04 հունիսի, 2018 | 04:42

ՍՏԵՓԱՆԱԿԵՐՏ, «Արցախփրէս».- Երկուշաբթի, Յունիս 4ին, Ստեփանակերտի Ազատամարտիկներու փողոցին վրայ վերսկսաւ Յունիս 2ին սկիզբ առած բողոքի շարժումը:

Նախաձեռնող խումբի անդամները ներկայացուցին նախօրէին Արցախի Հանրապետութեան նախագահ Բակօ Սահակեանի հետ հանդիպման ընթացքին քննարկուած հարցերուն մանրամասնութիւնները: Շարժման նախաձեռնող խումբի անդամ Դաւիթ Սիմոնեան նշեց, որ նախագահ Սահակեան խոստացած է փոփոխութիւններ կատարել:

«Հանդիպման ընթացքին բարձրացուած է ուժային կառոյցներուն մէջ փոփոխութիւն կատարելու հարցը, որ սակայն միանշանակ չէ ընդունուած նախագահին կողմէ: Բակօ Սահակեան մեզի խոստացած է, որ իր կողմէ պիտի նախաձեռնուին համակարգային բարեփոխումներ, որոնք, իր պատկերացումով՝ կապուած են ո՛չ թէ անձերու փոփոխութեան հետ, այլ՝ ընդհանուր քաղաքականութեան եւ ամէնօրեայ աշխատանքի տեսքով: Բացի ատկէ, նախագահին կողմէ առաջարկ եղած է նաեւ ստեղծելու հանրային խորհուրդ, ուր ընդգրուած պիտի ըլլան մեր նախաձեռնութեան խումբ մը մասնակիցներ եւս, որպէսզի հանրային օրակարգի խնդիրներուն հրատապ լուծումներ տրուին», ըսաւ Սիմոնեան եւ, դիմելով հաւաքուած ցուցարարներուն՝ յայտնեց, թէ այժմ իրե՛նք պէտք է որոշեն, թէ որքա՛ն բաւարարուած են այս պայմաններով։

Բողոքի մասնակիցներուն մօտ յառաջացած դժգոհութենէն սակայն պարզ դարձաւ, որ զիրենք չեն բաւարարեր բանակցութիւններուն սոյն արդիւնքները, եւ որ իրենց ներկայացուցած պահանջները կը շարունակեն մնալ ուժի մէջ:

0605pago

Այնուհետեւ, ելոյթով հանդէս եկաւ Ազգային ժողովի ընդդիմադիր պատգամաւոր Հայկ Խանումեան՝ նշելով, որ ցուցարարներուն կողմէ դրուած պահանջները ընդունելի են լայն շրջանակներու համար, եւ պէտք է հարցերը գտնեն արագ եւ ճիշդ լուծում՝ հետագայ խնդիրներէ խուսափելու համար:

Ցուցարարները կը շարունակեն փակ պահել մայրաքաղաքի կեդրոնական փողոցներէն մէկուն երթեւեկելի հատուածը:

Միւս կողմէ, Բակօ Սահակեան Յունիս 4ին խորհրդակցութիւն ունեցաւ կառավարութեան անդամներուն եւ պետական այլ մարմիններու ղեկավարներուն հետ: Քննարկուեցաւ երկրին մէջ ստեղծուած ներքաղաքական իրավիճակը: Ան ընդգծեց, որ մեր երկրին մէջ անընդունելի՛ են նման միջադէպեր, ինչպէս նաեւ՝ անոնց քաղաքականացումը եւ տարբեր ձեւի շահարկումները, որոնք յղի են հասարակութիւնը պառակտելու վտանգով: Անոր խօսքով՝ իշխանութիւնները եւ պետական կառավարման օղակները պարտաւոր են ցուցաբերել պատասխանատուութեան առաւելագոյն աստիճան՝ առկայ խնդիրները լուծելու համար, այս ուղղութեամբ իրականացնելով սկզբունքային, հետեւողական ու քրտնաջան աշխատանք:

Նշենք, որ Յունիս 1ին, Ստեփանակերտի մէջ, Արցախի Ազգային անվտանգութեան ծառայութեան (ԱԱԾ) աշխատակիցներուն մասնակցութեամբ տեղի ունեցած ծեծվըռտուքի մը իբրեւ հակազդեցութիւն՝ Յունիս 2ին խումբ մը երիտասարդներ Ստեփանակերտի կեդրոնական փողոցներէն մէկուն վրայ ցոյց կատարեցին՝ փակելով փողոցին երթեւեկելի հատուածը:

Արցախի դատախազութիւնը քրէական գործ յարուցեց Յունիս 1ի նշեալ ծեծվըռտուքի դէպքին առիթով: Դատախազութեան հրապարակած հաղորդագրութեան մէջ կը նշուի, որ Յունիս 1ի երեկոյեան, Ստեփանակերտի մէջ վիճաբանութիւն մը տեղի ունեցած է մէկ կողմէ՝ Դաւիթ Յարութիւնեանի եւ Ալպերթ Աւետիսեանի, իսկ միւս կողմէ՝ Մհեր Մուսայէլեանի (ԱԱԾ աշխատող), Մխիթար Մուսայէլեանի, Սերկէյ Մուսայէլեանի, Գուրգէն Հայրապետեանի եւ Վարդան Ղարամեանի (ԱԱԾ աշխատող) միջեւ: Վիճաբանութեան ընթացքին կողմերը հարուածած են զիրար՝ պատճառելով մարմնական վնասուածքներ: Դատախազութեան յատուկ քննչական բաժինին մէջ յարուցուած քրէական գործին իբրեւ հետեւանք կան ձերբակալուածներ: Նկատի առնելով հանրութեան հետաքրքրութիւնը դէպքին առնչութեամբ՝ Արցախի դատախազութիւնը նպատակայարմար գտած է հրապարակել քրէական գործին մէջ ընդգրկուած տեսանիւթին՝ ծեծվըռտուքի հատուածը:

Յունիս 2ին, նախագահ Բակօ Սահակեան հանդիպում ունեցած էր նաեւ Ազգային ժողովի նախագահ Աշոտ Ղուլեանի եւ խմբակցութիւններու ղեկավարներուն հետ, որոնց հետ քննարկած էր երկրի ներքին կեանքին առնչուող շարք մը հարցեր եւ յատուկ ուշադրութիւն դարձուցած էր մայրաքաղաքին մէջ տեղի ունեցած դէպքին: Ապա, Ազգային ժողովին մէջ ստեղծուած է հանրային հնչեղութիւն ստացած հարցերու ուսումնասիրութեան քննիչ յանձնախումբ:

Արցախի պաշտպանութեան նախարարութիւնը եւս այս առնչութեամբ յայտարարութիւն հրապարակած է՝ նշելով. «Նկատի ունենալով, որ սահմանագիծէն ոչ այնքան հեռու գտնուող վայրի մը մէջ տեղի ունեցող որեւէ իրադարձութիւն կրնայ թէկուզ փոքր տոկոսով սպառնալ ժողովուրդի անվտանգութեան եւ անդրադարձ ունենալ սահմանային իրադրութեան վրայ, Արցախի Հանրապետութեան պաշտպանութեան նախարարութիւնը խորին մտահոգութիւն կը յայտնէ այս եւ ասոր յաջորդած դէպքերուն զարգացման գծով»: Նախարարութիւնը աւելցուցած է, որ, թէեւ իւրաքանչիւր քաղաքացի սահմանադրական իրաւունքը ունի դատապարտելու բռնութեան որեւէ դրսեւորում՝ նախարարութիւնը կը յորդորէ զերծ մնալ արդէն իսկ արտաքին սպառնալիքներու տակ գտնուող մեր երկրի ներքաղաքական իրավիճակը արհեստականօրէն սրելու վտանգաւոր քայլերէն եւ հարցին հանգուցալուծումը դիտել բացառապէս իրաւական հարթութեան վրայ:

Ցուցարարները, սակայն, կը պահանջեն ուժային կառոյցներու համապատասխան ղեկավարներու հրաժարականը: Դաւիթ Սիմոնեան ըսած է, որ իրենք այդ անձերուն հրաժարականը կը պահանջեն, որովհետեւ անընդունելի է համազգեստով ծառայողներու մասնակցութեամբ ծեծվըռտուք կատարել մայրաքաղաքին մէջ:

Ցուցարարներուն պահանջը լսելու նպատակով, դէպքի վայր եկած են Արցախի պետական նախարար Արա Յարութիւնեան, Արցախի անվտանգութեան խորհուրդի նախագահ Վիթալի Բալասանեան, Ազատամարտիկներու միութեան նախագահ Սամուէլ Կարապետեան, Ազգային ժողովի պատգամաւորներ Հայկ Խանումեան եւ Լեռնիկ Յովհաննիսեան: Աւելի ուշ, բողոքի մասնակիցներուն իր աջակցութիւնը յայտնած է նաեւ Ազգային ժողովի նախկին պատգամաւոր Վահան Բադասեան:

Իշխանութեան ներկայացուցիչները հաստատած են, որ առաջադրուած խնդիրները պիտի լուծուին օրէնքի ծիրին մէջ, եւ բոլոր մեղաւորները պատասխանատուութիւն պիտի կրեն, սակայն նախաձեռնութեան հեղինակ Դաւիթ Սիմոնեան յայտարարած է, թէ այնքան ատեն որ չէ կատարուած ցուցարարներուն պահանջը՝ իրենք պիտի շարունակեն ցոյցը:

«Երկիր Մեդիա»ի համաձայն՝ Արցախի ազատամարտիկներու միութիւնը կը պատրաստուի ցոյց կազմակերպելու՝ ընդդէմ կատարուող ցոյցերուն:

Նաեւ, Արամ Ա. վեհափառը Յունիս 3ի երեկոյեան հեռաձայնային կապ հաստատած է Արցախի նախագահ Բակօ Սահակեանի հետ եւ իր մտահոգութիւնը յայտնած Ստեփանակերտի մէջ տեղի ունեցող ժողովրդային ցոյցերուն գծով: Նախագահը ընդհանուր գիծերու մէջ կաթողիկոսին ներկայացուցած է տիրող կացութիւնն ու անոր դրդապատճառները: Իսկ Արամ Ա. իր զօրակցութիւնը յայտնելով նախագահին եւ Արցախի ժողովուրդին՝ շեշտած է, որ Հայաստանի ու Արցախի դիմագրաւած ներկայ մարտահրաւէրները վստահաբար մեր ժողովուրդի սիրելի զաւակներն ու Արցախի իշխանութիւնը փոխադարձ հասկացողութեամբ պիտի առաջնորդեն խոհեմութեան ու զգօնութեան՝ հեռու մնալով այնպիսի մթնոլորտէ, որ կրնայ վնասել Արցախի անվտանգութեան:

Իր կարգին, Գարեգին Բ. կաթողիկոս Յունիս 4ին յայտարարութեամբ մը մտահոգութիւն յայտնեց Ստեփանակերտի իրադարձութիւններուն առթիւ, որոնք կրնան «վտանգել Արցախի ներքին կայունութիւնը»: «Երկրում ներքաղաքական իրադրութեան սրացումը, անզիջում դիրքորոշումները անթոյլատրելի՛ են, քանզի դրանք կարող են խոցելի դարձնել Արցախի ապահովութիւնն ու խաղաղութիւնը: Յորդորում ենք Արցախի մեր սիրելի զաւակներին՝ համերաշխութեան ու եղբայրասիրութեան ոգով եւ երկխօսութեան ճանապարհով լուծել բոլոր տարաձայնութիւններն ու խնդիրները», աւելցուց ան:

Արցախի մէջ տեղի ունեցած դէպքերուն մասին յայտարարութիւն կատարած է նաեւ Հայաստանի նախկին նախագահ Լեւոն Տէր Պետրոսեան՝ հաստատելով, որ Հայաստանի մէջ տեղի ունեցածը անթոյլատրելի՛ է կրկնել Արցախի մէջ: Ըստ անոր՝ պատերազմական վիճակի մէջ գտնուող պետութեան համար այս դէպքերը կրնան աղէտալի հետեւանքներ ունենալ: Ան հաստատած է, որ պէ՛տք է յանցաւորները պատժուին, սակայն ուժային կառոյցներու ղեկավարներու հրաժարականի պահանջին կատարումը կրնայ ծանր հարուած ըլլալ իշխանական համակարգին դէմ, որմէ անյապաղ պիտի օգտուին մեր հակառակորդները:

asbarez.com


Առնչվող նյութեր
1. Հայաստանի եւ Արցախի նախագահները Ստեփանակերտի հուշահամալիրում հարգանքի տուրք են մատուցել հերոսների հիշատակին
2. Ադրբեջանական կողմին խորհուրդ եմ տալիս այդքան վստահ չլինել նրանում, որ ինքը վերահսկում է ռազմական դրության էսկալացիայի հարցը.Դավիթ Տոնոյան
3. Հասմիկ Պապյանի մենահամերգը Շուշիում
4. «ԲրուտԱրտ» կավագործության միջազգային սիմպոզիումը Արցախում
5. Վարչապետը ժամանել է Արցախ. Նիկոլ Փաշինյանն ու Բակո Սահակյանն այցելել են Ճարտարի նորակառույց Սուրբ Վարդանանք եկեղեցի
6. Հայաստանի եւ Արցախի նախագահները հանդիպել են Ստեփանակերտում
7. Հայաստանի ԱԳ նախարարն ընդունեց Մինսկի խմբի համանախագահներին
8. Տիգրան Բալայանի մեկնաբանությունը Արցախի պաշտպանության բանակի զինծառայողի սպանության մասին
9. Արցախի պետնախարար նշանակվեց Գրիգորի Մարտիրոսյանը. Նախագահի կողմից կատարվել են նոր նշանակումներ
10. Նիկոլ Փաշինյանի կոչը նպաստեց Ստեփանակերտի բողոքի ակցիայի խաղաղ հանգուցալուծմանը

Մեկնաբանություն

Վերջին լուրեր
1.«Իմ առաջադրանքը ձեզ շատ պարզ է` ամեն օր լուծել թեկուզ փոքր, բայց որևէ կոնկրետ խնդիր». Վարչապետը հանդիպել է Արարատի մարզի համայնքների ղեկավարներին
2.Գաֆեսճյան արվեստի կենտրոնում տեղի ունեցավ Հայաստանում Եվրոպական Ժառանգության օրերի պաշտոնական բացումը
3.ՀՀ քաղաքացիական ավիացիայի կոմիտեի նախագահի այցը Չինաստան
4.Երեւանի ավագանու ընտրությունների կապակցությամբ Եվրոպայի Հայերի Համագումարի կոչը Երեւանցիներին.
5.Ռումանիոյ Հայոց Թեմի առաջնորդ Տ. Տաթև եպիսկոպոս Հակոբյանի շնորհավորական ուղերձը ՀՀ անկախության 27-րդ տարեդարձի առիթով
6.Հայաստանի անկախության 27-ամյակին նվիրված միջոցառում Լիոնում
7.ԱՌԱՋԻՆԷՆ ՄԻՆՉԵՒ ՉՈՐՐԱՐԴ ՀԱՅԱՍՏԱՆԻ ՀԱՆՐԱՊԵՏՈՒԹԻՒՆ. ԱՆԿԱԽՈՒԹՅԱՆ ՕՐ
8.Պապը Կը Շնորհաւորէ Մխիթարեան Միաբանութեան 300ամեակը
9.Չինական գեղագրությունը և գրաֆիկան Հայաստանում
10.Հայաստանի և Էստոնիայի հարյուրամյակներին նվիրված համերգ Տալլինում
Դիտել բոլորը
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: