ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
20 նոյեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Տոլմայի համահայկական փառատոնը սկսվում է

09 հուլիսի, 2013 | 20:02

ԵՐԵՎԱՆ.-Հուլիսի 10-ին Սարդարապատում կբացվի արդեն ավանդական Տոլմայի փառատոնը։

«Մամիս դոլմեն ոչ ոք չի կարող սարքի, դոլմի հետ մատներդ էլ կուտեիր»,-ասում է 87-ամյա իրանահայ Թադևոս պապը, որ կնոջ հետ եկել էր մասնակցելու Տոլմայի համահայկական փառատոնին: Բայց երբ տաղավարներից մեկում նրան տոլմա հյուրասիրեցին, գոհունակ ժպիտով ասաց. «Լա՜վն է»:

Արդեն երեք տարի է, որ Սարդարապատի հուշահամալիրը հուլիսին լցվում է մարդկանցով, որոնք տաղավարից տաղավար անցնելով` համտեսում էին չտեսնված ու չլսված տոլմայի տեսակներ:

Այս առիթով դեռ հունիսի 27-ին “Արարատ Հոլ” ռեստորանի տնօրեն, ավագ խոհարար, «Հայ խոհարարական ավանդույթների զարգացման և պահպանման» ՀԿ-ի նախագահ Սեդրակ Մամուլյանը անցկացրել էր քննարկում՝ նվիրված փառատոնի բոլոր կազմակերպչական ու ընթացիկ հարցերին: Ըստ նրա, այս տարվանից գործելու է միջոցառումների կազմակերպման մշակված հատուկ կանոնակարգ: Փառատոնն անցկացվելու է մրցույթի ձևով, որին կմասնակցեն ինչպես Հայաստանի առաջատար ռեստորաններ, այնպես էլ անհատներ Երևանից և մարզերից` ընդհանուր առմամբ 20 մասնակից, որոնցից յուրաքանչյուրը տեղում կպատրաստի ավանդական տոլմայի իր տարբերակը՝ յուրօրինակ բաղադրատոմսով: Հաղթողները մի քանի անվանակարգում`լավագույն տեսք, համ ու ձևաորում, կպարգևատրվեն մրցանակներով:

Միջոցառումը հետապնդում է քարոզչական նպատակ` մասսայականացնելով հայ ավանդական կերակրատեսակները և ամրագրելով հայոց ոչ նյութական մշակութային արժեքներից մեկը համարվող հայկական խոհանոցն, ինչպես նաև տոլման ներկայացնել որպես հայկական կերակրատեսակ՝ հերքելով այն թյուր կարծիքը, թե իբր այդ կերակրատեսակը թուրքական արմատներ ունի:

Օրինակ, երբևէ կերե՞լ եք հորթի, գառան, խոզի և հավի մսերի խառնուրդից պատրաստված տոլմա, որը խոհարարներն անվանում են փունջ կամ էլ խմորի շերտերի մեջ լցոնած, որը հիշեցնում է հայկական փախլավա: Եթե ներկա լինեիք տոլմայի համահայկական փառատոնին, ապա կտեսնեիք նաև ոլոռով, սիսեռով և ոչխարի մանր կտրատած մսով տոլմա, մրգային և հատապտղային հավելումներով, բրնձով և սունուբարով տոլմա, հոնի, ծիրանի հյութով պատրաստված, հավի կրծքամսով, տավարի ծեծված մսով և ձավարով, անգամ խեցգետնի ու իշխանի մսով տոլմաներ:

Բացի ավանդական կաղամբից ու թփից, այս փառատոնի տոլմաները լցոնված էին եզան լեզվի, ազնվամորու, լոբու, թզի, թթի տերևների, նույնիսկ դդմի չբեղմնավորված ծաղկի մեջ:

Վստահ ենք, որ ցանկաված հայ տոլմայի մի յուրօրինակ բաղադրատոմս գիտի, որը շատ է սիրում և անձամբ պատրաստում է:

2011թվականին անցկացված Տոլմայի միջոցառումն ունեցել է միջազգային արձագանք՝ երկու օր անընդմեջ հեռարձակվելով ամերիկյան CNN հեռուստաընկերության եթերում:

Ըստ Սեդրակ Մամուլյանի փառատոնն ունեցել է իր դրական ու բացասական կողմերը, վերջիններս շտկվել են ընթացքում: Այսպիսով`հարկավոր է այն կազմակերպել բարձր մակարդակով,ավելի գրավելու զբոսաշրջիկների ու օտարերկրացիների ուշադրությունը ինչպես մեր երկրի,այնպես էլ փառատոնի նկատմամբ:

Այս տարվա միջոցառմանը հրավիրվել են Ազգային ժողովի նախագահ Հովիկ Աբրահամյանը, վարչապետ Տիգրան Սարգսյանը, մշակույթի նախարար Հասմիկ Պողոսյանը, Երևանի քաղաքապետ Տարոն Մարգարյանը, պատգամավորներ, հասարակական-քաղաքական և մշակույթի գործիչներ, տարբեր ՀԿ-երի, դեսպանատների և ԶԼՄ-ների ներկայացուցիչներ:

Միջոցառմաումն իրականացվում է «Ոսկե Ծիրան» կինոփառատոնի շրջանակներում, ինչը հնարավորություն է տալիս հայկական տոլմայի համը հասանելի դարձնել նաեւ օտարերկրացի հյուրերին։

Փառատոնի կազմակերպիչ Սեդրակ Մամուլյանի կարծիքով, միջոցառման նպատակներից մեկն էլ տուրիզմի զարգացումն է . «Առանց սպասարկման ոլորտի և հատկապես ազգային խոհանոցի շատ դժվար կլինի զարգացնել տուրիզմը,-կարծում է խոհարարը,-երբ տուրիստը մեր երկրից գնա, նրա մեջ ամենաուշը կմոռացվի համի և հոտի զգացողությունը»:

Սակայն փառատոնի գլխավոր նպատակը հայկական ազգային խոհանոցի նկատմամբ հարգանքի և վստահության բարձրացումն է, քանի որ կա կարծրատիպ, թե այն հարուստ ու բազմազան չէ. «Ի դեպ, այդ թյուր կարծիքը մեր մեջ է, օտարները շատ լավ գիտեն մեր խոհանոցի արժեքը,-նշում է խոհարարը,-մենք պետք է ապացուցենք, որ մեր խոհանոցը ոչ միայն հզոր է, այլև ծառայել է դոնոր մեր հարևան և ոչ հարևան երկրների համար»:

Փառատոնի ընթացքում ներկայացվում են 22-ից ավելի տաղավարներ` տոլմայի ավելի քան 60 տեսակով: Փառատոնի առաջին հաղթող ճանաչված Աֆրիկյանների պանդոկի խոհարար Գրիշա Անտինյանը մինչ օրս մի յուրահատուկ ակնածանքով և զգուշավորությամբ է իր ձեռքն առնում շահած մեդալը:

Այս տարի էլ հուլիսի 10-ի Սարդարապատի հերոսահամալիրի հաղթական պատը նորից կհյուրընկալի հայ խոհարարին՝ այս անգամ էլ Տոլմայի համեղ ու հաղթական բույրի շուրջը սփռելու և մի շատ կարևոր հաղորդագրություն տարածելու համար՝ դարեր շարունակ խոհանոցում այսքան հոգի դնող ժողովուրդը հավերժ կապրի: Եվ տոլմա, իրոք, չեն սիրում միայն նրանք, ովքեր իրենք չեն կարողանում տոլմա պատրաստել:

Հուսանք,որ նմանատիպ ձեռնարկները կլինեն շարունակելի, որոնք համայն աշխարհին կներկայացնեն մեր ավանդական կերակրատեսակը`տոլման:

Գարիկ Ավետիսյան, Աստղիկ Վիրաբյան

ԵՐԵՎԱՆ

Հատուկ ՕՐԵՐ-ի համար


Առնչվող նյութեր
1. Տոլմայի փառատոն Վիրահայոց թեմում

Մեկնաբանություն

Վերջին լուրեր
1.Գավառում վերաբացվեց Լևոն Քալանթարի անվան դրամատիկական թատրոնը
2.«Բուկինիստ» գրախանութում տեղի ունեցավ Ալիսա Գանիևայի «Խոցված զգացմունքներ» վեպի շնորհանդեսը
3.Մտորումներ Լատվիայի անկախության 100-ամյակի առթիվ
4.Մեր ժամանակի ամենամեծ վտանգը համարում եմ գերտերությունների մոլագար մրցակցությունը՝ աշխարհի վերաբաժանման համար. Աստղիկ Մելիքբեկյան
5.Ամենայն Հայոց Կաթողիկոսի ձեռամբ օծվեց Նովոսիբիրսկի նորակառույց եկեղեցին
6.Արտավազդ Փելեշյանի «Իմ աշխարհը և դաշտի միասնական տեսությունը» նաև անգլերեն
7.Եվրամիությունը աջակցում է «Հայաստանում ընտրական գործընթացների աջակցություն» ծրագրին
8.Ստրասբուրգ. Հայաստանի մշտական ներկայացուցիչ Պարույր Հովհաննիսյանն ընտրվեց Եվրոպայի խորհրդի նախարարների կոմիտեի ենթախմբի նախագահ
9.Նիդերլանդներ. Վերաքննիչ դատարանը անփոփոխ է թողնում թուրք ազգայնամոլ Իլհան Աշկինի դեմ վճիռը
10.Գարեգին Բ- Նիկոլ Փաշինյան հանդիպում Մայր Աթոռում
Դիտել բոլորը
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: