ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
21 նոյեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

ՍԵՐԳԷՅ ՓԱՐԱՋԱՆՈՎԻ «ՆՌԱՆ ԳՈՅՆԸ» ԳԱՆՆԻ ՅԵՏԱՀԱՅԵԱՑԻՆ

15 մայիսի, 2014 | 18:45

NRAN GUIN PARAJANOVՍերգէյ Փարաջանովի «Նռան գոյնը» ժապաւէնը կը ցուցադրուի Գաննի 67րդ փառատօնի յետահայեաց ծրագրի շրջանակին մէջ:

Երբ նոր թուային արհեստագիտութիւնները ամբողջութեամբ փոխեցին անցեալի նկատմամբ ժամանակակից շարժանկարի վերաբերումը, տասը տարի առաջ, Գաննի փառատօնէն ներս ստեղծուեցաւ «Cannes Classics» բաժանմունքը, որ կը ներկայացնէ հին ֆիլմերու ընտրանին:

Փարաջանովի «Նռան գոյնը» (Sayat Nova, 1968, 1:17) ֆիլմի պատճէնը վերականգնուած է 4К ձեւաչափով L’immagine Ritrovata ժապաւէնի տարրալուծարանին կողմէ, Film Foundation-World Cinema Project-ի (Նիւ Եորք) գանձատրումով:

«Cannes Classics»ի այս տարուան ծրագրին մէջ նախատեսուած են 22 երկար մեթրաժ եւ 2 վաւերագրական ֆիլմեր: Ընդառաջելով այդ ժապաւէններու իրաւասութեան տէրերուն փափաքին, բոլոր ֆիլմերն ալ կը ցուցադրուին DCP 2K եւ DCP 4K ձեւաչափով: «Cannes Classics»ի պատմութեան մէջ առաջին անգամ ըլլալով 35 միլիմեթրնոց ոչ մէկ տարբերակ կը ցուցադրուի:

Այս տարի «Cannes Classics»ի պատուոյ հիւրն է աշխարհահռչակ դերասանուհի Սոֆիա Լորէն, որ 1961ին կնոջական լաւագոյն դերի համար արժանացած է Գաննի մրցանակին՝ ոսկի արմաւենիին:

Գաննի 67րդ փառատօնը կը բացուի Մայիս 14ին եւ վերջ կը գտնէ 25ին:

Փարաջանովի ամենէն ծանօթ գործը հանդիսացող «Նռան գոյնը» նկարահանուած է 1968ին եւ նուիրուած է աշուղ Սայեաթ-Նովային:

«Նոր Յառաջ» երկօրեայ թերթին քաղուածքը Մայիս 13, թիւ 645


Մեկնաբանություն

© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: