ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
24 սեպտեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Սասուն Սոժի. Պահպանել հայկական ինքնութիւնը, բացուիլ աշխարհին ՀԲԸՄ-ի նման միջազգային կազմակերպութեան մը միջոցաւ

Հարցազրոյց «Հայկական Բարեգործական Ընդհանուր Միութեան» Փարիզի մասնաճիւղի ատենապետ Սասուն Սոժիի հետ
14 նոյեմբերի, 2013 | 08:59

sasun saugyՀարցում – Արդէն երկու տարի է Հայկական Բարեգործական Ընդհանուր Միութեան Փարիզի մասնաճիւղին նախագահութիւնը ստանձնած էք։ Ձեր դրոշմը դրած էք, ձեր գործելակերպը ներմուծած։ Ինչպէ՞ս կը գնահետէք ձեր գործունէութեան երկու տարիները։

Սասուն Սոժի – Երբ ես ստանձնեցի պաշտօնս, շուրջ տարի մը ժամանակ տրամադրեցի ուսումնասիրելու համար միութեան գործելակերպը, ծրագիրները, նախապատւութիւնները, որու արդիւնքին, նկատի ունենալով որ առանձին էի, կեդրոնացայ յատկապէս արդէն գոյութիւն ունեցող ուժերուն վրայ, որովհետեւ կարճ ժամանակի մէջ կարելի չէր վերամշակել քաղաքականութիւն կամ ուղղութիւններ։ Այնուհետեւ առաջին եռամսեայի աւարտին ինծի համար արդէն յստակ էր, որ «Հայկական Բարեգործական Ընդհանուր Միութիւն»ը (UGAB) ճիշդ է շնորհիւ իր կամաւորներու տարած աշխատանքին մեծ ուժ կը ներկայացնէր, սակայն այդ գործունէութիւնը բաւարար կերպով համադրուած չէր եւ դուրսի աշխարհին չէր ցոլացներ մեր կեդրոնի իրական պատկերը, այսպէս՝ մասնաճիւղերու միջեւ ուղղակի կապը կը պակսէր, իսկ ես կ՚ուզէի ժողովներու եւ հանդիպումներու ճամբով կարելի չափով ամրապնդել յարակցութիւնը աշխատանքային զանազան խումբերու միջեւ, որոնք կը զբաղէին դպրոցով, թատրոնով, երգչախումբով, երիտասարդական հարցերով, եւայլն։ Գիտէք, երբ ձեռնարկ մը կ՚ըլլայ մարդիկ կու գան կը մասնակցին, սակայն հարկաւոր է անոնց հետ մնայուն կապ հաստատելու ձեւերը որոնել։ Ահաւասիկ անցնող երկու տարիներու մեր գործունէութեան պատկերը։

Հարցում – Իսկ որո՞նք են ձեր ապագայի ծրագիրները։

Սասուն Սոժի – Յառաջիկային ալ պիտի քալենք նոյն ուղղութեամբ, անշուշտ պիտի զօրացնենք կեդրոնին մէջ աշխատող խումբերու շարքերը, պիտի աւելցնենք աշակերտներու, երգչախումբի, թատերախումբի կամ պարախումբի անդամներուն թիւը, նաեւ պիտի ուսումնասիրենք ներկայացուող նոր առաջարկները, որոնք համապատասխան են մեր Միութեան նպատակներուն։ Օրինակ՝ կեդրոնի դռները բանալ հայ արուեստագէտներու առջեւ, որպէսզի անոնք կարենան ցուցադրել իրենց գործերը, եւայլն։ Պիտի աւելցնեմ, որ ամիսը մէկ կամ երկու անգամ կը կազմակերպենք դասախօսութիւններ՝ քաղաքական, գրական, մշակութային եւ այլ թեմաներով, մեծ մասամբ հայկական նիւթերու շուրջ, բայց երբեմն ալ կ՚արծարծուին այլ հարցեր։

Հարցում – Այս բոլորը ի՞նչ նպատակի պիտի ծառայեն։

Սասուն Սոժի – Պիտի ծառայեն «Հայկական Բարեգործական Ընդհանուր Միութեան» նպատակին՝ պահպանել հայկական ինքնութիւնը, բացուիլ աշխարհին (UGAB)-ի նման միջազգային կազմակերպութեան մը միջոցաւ։

Հարցում – Երբ կ՚արծարծէք հայ ինքնութեան պահպանութեան հարցը կրնա՞ք աւելի յստակ կերպով բացատրել. կ՚ապրինք երկրի մը մէջ որ ունի հարուստ, այլազան, ճոխ եւ բարձր մակարդակով մշակոյթ մը։ Այս բոլորին լոյսին տակ արդեօք միջոցները ունի՞նք պահելու մեր ինքնութիւնը։

Սասուն Սոժի – Անշուշտ որ դժւար է, պէտք է համակերպինք այսօրուան աշխարհի օրէնքներուն, սակայն մեր համայնքը տասնամեակներու ընթացքին կրցած է պահել իր ինքնութիւնը, ինքզինք ծանօթացնել ֆրանսական մշակոյթին, հանգամանք մը, որ յաճախ ճանչցուած ու յատկապէս շեշտուած է հիւրընկալ այս երկրի պատկան մարմիններուն կողմէ եւ մեր ժողովուրդը համարկումի լաւ օրինակ հանդիսացած է։ Միեւնոյն ժամանակ ճիշդ է որ այսօր կայ նոր սերունդ մը որ ունի ակնկալիքներ ու սպասումներ, որոնց պէտք է գոհացում տրուի, անոնց հետ քայլ պահուի։ Բայց կը յուսանք որ դպրոցի ճամբով պիտի կարենանք դրական արդիւնք քաղել։

Հարցում – Դուք Բարեգործականի Փարիզի մասնաճիւղի պատասխանատուն էք։ Ինչպէ՞ս կը համադրէք աշխատանքները Ֆրանսայի մակարդակով։

Սասուն Սոժի – Մեր նպատակակէտը նոյնն է, սակայն պէտք է առաւել ամրապնդել ու համադրել շրջանային գործունէութիւնը։

Հարցում – Այսօր լայն թափով աճ կ՚ապրի քաղաքային բնակչութիւնը։ Առ այդ «Բարեգործական»ի մէկ կեդրոնը բաւարա՞ր է շուրջ հարիւր հազար հաշուող փարիզահայութեան համար։

Սասուն Սոժի – Ատիկա արդէն միջոցներու հարց է։ Ըսեմ որ տեղական բազմաթիւ ընկերակցութիւններ կան, որոնք կ՚աշխատին իւրաքանչիւրը իր մասնագիտութեամբ եւ որոնց հետ որոշ չափով կը գործակցինք, օրինակ՝ կան դպրոցներ, որոնց նեցուկ կը հանդիսանանք, եւայլն։

Հարցում – Վերիվարոյ ի՞նչ թիւով հայութիւն կ՚այցելէ ձեր կեդրոնը։

Սասուն Սոժի – Դժուար է յստակ թիւ տալ, սակայն կրնամ ըսել թէ շաբաթական ունինք հարիւրէն երկու հարիւր այցելուներ։

Հարցում – Փարիզի կեդրոնի հաղորդակցական կապը ինչպէ՞ս կ՚ընթանայ։

Սասուն Սոժի – Կան հաղորդակցութեան զանազան միջոցներ, սակայն մենք պէտք է մեր փորձառութենէն մեկնելով ընտրենք լաւագոյնը։ Ես այդ ճիւղին մէջ մասնագէտ չեմ, բայց յաճախ կարող անձերու հետ կ՚ուսումնասիրեմ այն նոր ծրագիրները, որոնք կը ցոլացնեն մեր ներքին ընդհանուր աշխատանքները։ Ինչ կը վերաբերի գրաւոր կամ բանաւոր մամուլին (media), իմ կարծիքով պէտք է մկրտել ու կառուցել հաղորդակցութեան նոր քաղաքականութիւն մը՝ ցարդ եղածը բարելաւելու համար։

Հարցում – Ֆրանսայի մէջ Բարեգործականը քանի մասնաճիւղ կամ կեդրոն ունի։

Սասուն Սոժի – Բացի Փարիզէն կեդրոններ ունինք Մարսիլիա, Լիոն եւ Վալանս։

Հարցում – Ընկերային առումով, յատուկ վերաբերում կը ցուցաբերէ՞ք Հայաստանէն եկած Հայերուն։ Անոնք կ՚այցելե՞ն ձեր կեդրոնները։

Սասուն Սոժի – Այո, երբեմն կը հանդիպինք Հայաստանցիներու։ Ընդառաջելով ներկայացուած դիմումներուն մեր կեդրոնին մէջ վերամուտին սկսած են արեւելահայերէնի դասընթացքներ, որոնց կրնան մասնակցիլ նաեւ Հայաստանէն եկած Հայերը։ Կ՚ուզէի ըսել թէ մենք գործնապաշտ մօտեցում ունինք մեր կեդրոնը այցելող անդամներու խնդիրներու նկատմամբ եւ զանոնք հարթելու համար կարիք ունինք ժամանակի եւ համբերութեան։ Պէտք է վստահութիւն ներշնչել, որովհետեւ ժամանակի հետ քայլ պահելու առումով անխուսափելի են մշակութային փոփոխութիւնները եւ ատիկա դիւրին չէ մանաւա՛նդ «Բարեգործական»ի նման 100ամեայ կազմակերպութեան մը համար։

Աւելցնեմ նաեւ որ Ֆրանսայի մասնաճիւղը, նմանօրինակ Սփիւռքի այլ շրջաններուն, ունի ապակեդրոնացած քաղաքականութիւն, սակայն իր աշխատանքները կը համադրէ UGAB-ի միջազգային կեդրոնին հետ։

Տեսակցեցաւ՝

ԺԻՐԱՅՐ ՉՈԼԱՔԵԱՆ

«Նոր Յառաջ» երկօրեայ թերթին քաղուածքը, Նոյեմբեր 14, թիւ 573

 


Առնչվող նյութեր
1. Ուշագրավ համերգների և դասախոսությունների շարքը հայկական երաժշտությունը հասցրեց Ասիա՝ կամրջելով դարավոր ժողովրդական ավանդույթները
2. Հ.Բ.Ը.Մ.-Ը ՈՒՍՈՒՄՆԱԿԱՆ ԴՐԱՄԱՇՆՈՐՀՆԵՐ ԿԸ ՏՐԱՄԱԴՐԷ ԼՈՅՍ ՀԻՄՆԱԴՐԱՄԻ ԼՈՒԾԱՐՄԱՆ ՊԱՏՃԱՌՈՎ ՏՈՒԺԱԾ ՈՒՍԱՆՈՂՆԵՐՈՒ
3. Creative Armenia-ն և Հայկական Բարեգործական Ընդհանուր Միությունը հայտարարում են նորարար տաղանդավոր արվեստագետներին օժանդակող ծրագրի մեկնարկը
4. Նախագահ Արմեն Սարգսյանը Փարիզում հանդիպումներ է ունեցել ֆրանսիական խոշոր ձեռնարկությունների ղեկավարների հետ
5. ՀԲԸՄ-ն ներկայացնում է անհրաժեշտ էլեկտրոնային գրքեր ու հավելվածներ Հայաստանի մասին
6. ՀԲԸՄ Նախագահն ու Հայաստանի Նոր Ղեկավարությունը Քննարկում են Համագործակցության Հնարավորություններն ու Փոխադարձ Հետաքրքրության Ոլորտները
7. Լրատվական դաշտը՝ որպես Սփյուռք-Հայրենիք կամուրջ
8. ՀԲԸՄ-ը Նշում է Հայաստանի Առաջին Հանրապետության Հաղթական 100-ամյակը
9. Մահացել է ամերիկահայ նախկին նահանգապետ Ջորջ Դեքմեջյանը
10. ՀԱՅԿԱԿԱՆ ԲԱՐԵԳՈՐԾԱԿԱՆ ԸՆԴՀԱՆՈՒՐ ՄԻՈՒԹՅՈՒՆՆ ՈՒ ՀԱՅԱՍՏԱՆԻ ՆԵՐԿԱ ԻՐԱԴՐՈՒԹՅՈՒՆԸ

Մեկնաբանություն

Վերջին լուրեր
1.Երեւանի ավագանու ընտրություններում առաջատարը ,,Իմ քայլը,, կուսակացությունների դաշինքն է՝ 80.7 տոկոսով
2.Իսպանիա. Հայաստանին նվիրված տոնական համերգ Սանտա Կոլոմա դե Գրամանետիում
3.«Իմ առաջադրանքը ձեզ շատ պարզ է` ամեն օր լուծել թեկուզ փոքր, բայց որևէ կոնկրետ խնդիր». Վարչապետը հանդիպել է Արարատի մարզի համայնքների ղեկավարներին
4.Գաֆեսճյան արվեստի կենտրոնում տեղի ունեցավ Հայաստանում Եվրոպական Ժառանգության օրերի պաշտոնական բացումը
5.ՀՀ քաղաքացիական ավիացիայի կոմիտեի նախագահի այցը Չինաստան
6.Երեւանի ավագանու ընտրությունների կապակցությամբ Եվրոպայի Հայերի Համագումարի կոչը Երեւանցիներին.
7.Ռումանիոյ Հայոց Թեմի առաջնորդ Տ. Տաթև եպիսկոպոս Հակոբյանի շնորհավորական ուղերձը ՀՀ անկախության 27-րդ տարեդարձի առիթով
8.Հայաստանի անկախության 27-ամյակին նվիրված միջոցառում Լիոնում
9.ԱՌԱՋԻՆԷՆ ՄԻՆՉԵՒ ՉՈՐՐԱՐԴ ՀԱՅԱՍՏԱՆԻ ՀԱՆՐԱՊԵՏՈՒԹԻՒՆ. ԱՆԿԱԽՈՒԹՅԱՆ ՕՐ
10.Պապը Կը Շնորհաւորէ Մխիթարեան Միաբանութեան 300ամեակը
Դիտել բոլորը
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: