ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
21 սեպտեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Շվեյցարիա. Ժընեւի «Արձագանգ» երկամսեայ թերթը տօնեց իր 30-ամեակը

19 դեկտեմբերի, 2016 | 15:44

ardzagank-znevՇվեյցարիա. Ժընեւի մէջ լոյս տեսնող «Արձագանգ» երկամսեայ թերթը անցեալ Հոկտեմբերին բոլորեց իր 30-ամեակը։ Այս առթիւ խմբագրութիւնը կազմակերպած էր ֆրանսերէն լեզուով բանախօսութիւն-քննարկում մը՝ «Հայաստան-Սփիւռք հեռանկարներ» նիւթին շուրջ։
Ձեռնարկը տեղի ունեցաւ Ուրբաթ, Նոյեմբեր 25-ին՝ Ժընեւի Հայկական կեդրոնի սրահին մէջ։ Բացման խօսքով հանդէս եկաւ թերթի աւելի քան 20 տարիներու պատասխանատու խմբագիր Մարալ Սիմսար Թօմպազեան, որ ներկայացուց բանախօսութեան տուն տուող պատճառները:
Վերջին տասնամեակներուն՝ հայութեան վերաբերող անկիւնադարձային զարգացումները մեզ կը մղեն վերատեսութեան ենթարկելու մեր աշխարհահայեացքը, մօտեցումներն ու գործելակերպը որպէս սփիւռքեան համայնք։

ardzgank-2Այսօր Սփիւռքի մէջ հայկական ինքնութեան վերակերտումը, հայութիւնը համախմբող գաղափարներու ու ազգային տեսլականի վերասահմանումը, համայնքային կեանքի վերակազմակերպումը, Հայաստանի ու Արցախի հետ արդիւնաւէտ կապերու  ամրապնդումը եւ ժողովրդավարական սկզբունքներու կիրարկումը թէ՛ Հայաստանի թէ՛ Սփիւռքի մէջ, հրատապ հարցեր են, որոնք հանրային լուրջ քննարկումի կը կարօտին։ «Արձագանգ»-ի 30-ամեակը լաւագոյն առիթն էր համայնքէն ներս առարկայական քննարկումի մը մեկնարկը տալու համար: Թերթին խմբագիրը յայտարարեց, որ «Արձագանգ» պատրաստ է անկախ հարթակ հանդիսանալու վերոյիշեալ նիւթերուն շուրջ վիճարկումներու համար, ապա հրաւիրեց համայնքին անդամները, որպէսզի իրենց կարծիքները արտայայտեն թերթի սիւնակներուն մէջ։
Օրուան հանդիսավար Արեգ Թորոսեան ներկայացուց բանախօսներ Ալեքսի Գրիգորեանն ու Արտուշ Եղիազարեանը, որոնք վերլուծեցին ներկայ վիճակը ու ներկայացուցին իրենց առաջարկները տուեալ հարցերուն շուրջ։ Բանախօսները պատասխանեցին նաեւ հանդիսավարին ու ներկաներուն հարցումներուն։

Ալեքսի Գրիգորեան իր ելոյթին մէջ ծանրացաւ Սփիւռքի հայկական կառոյցներուն ժողովրդավարացումի կարեւորութեան վրայ եւ ներկայացուց ֆրանսահայութեան փորձը: Արդարեւ, մի քանի տարի առաջ Ֆրանսահայերը ժողովրդական քուէարկութեամբ ընտրուելիք ներկայացուցչական միացեալ մարմին ստեղծելու ծրագիր մը մշակած էին, որը սակայն մնաց թուղթի վրայ: Այսպիսի ներկայացուցչական մարմին մը իրաւասու պիտի ըլլար համայնքի անունով արտայայտուելու եւ որոշումներ տալու: Բանախօսը յոյս յայտնեց, որ նման ծրագիր մը թերեւս կարելի կ՚ըլլայ իրագործել Զուիցերիոյ մէջ, նկատի ունենալով մեր համայնքին փոքր թիւն ու այլ հանգամանքներ, եւ յաջողութեան պարագային, մեր համայնքը իբր օրինակ կրնայ ծառայել Սփիւռքի միւս համայնքներուն:

ardzagank1Օրուան երկրորդ բանախօս Արտուշ Եղիազարեան կեդրոնացաւ Հայաստան-Սփիւռք կապերուն վրայ: Ընդգծելով այն միտքը որ Սփիւռքը առանց Հայաստանի չի կրնար երկար գոյատեւել, ան խօսեցաւ Սփիւռքի մէջ ազգային քաղաքական մտածողութիւն զարգացնելու, ցեղասպանութեան զոհի հոգեբանութենէն դուրս գալով աւելի գործօն դեր ստանձնելու ինչպէս նաեւ՝ Հայաստանի մէջ աւելի լայն ներգրաւուածութիւն ունենալու անհրաժեշտութեան մասին: Աշխարհի հայութեան համար առաջնահերթ նկատելով Հայկական պետականութեան ու գերիշխանութեան ամրապնդումը, բանախօսը համառօտ կերպով բացատրեց, թէ ի՛նչ ձեւերով սփիւռքեան համայնքներու անդամներն ու կառոյցները կրնան հայրենիքի մէջ գործնական ներկայութիւն ունենալ եւ մասնակցիլ սոյն նպատակի իրագործման համար տարուող աշխատանքներուն:
Բանախօսութեան յաջորդեց պատշաճ հիւրասիրութիւն մը, որուն ընթացքին «Արձագանգ»-ի խմբագրութեան իրենց սրտի խօսքը փոխանցեցին համայնքի հոգեւոր հովիւ Հայր Գուսան Ալճանեան, Հայաստանի Հանրապետութեան դեսպանորդ Տիկին Յասմիկ Տոլմաջեանը եւ հիւրաբար Ժընեւ գտնուող՝ Պաթումի հայկական համայնքի մամլոյ քարտուղար եւ «Աղբիւր» ելեկտրոնային թերթի գլխաւոր խմբագիր Արթուր Օհաննէսեան:

Նոր Յառաջ 

Փարիզ

Հ.Գ. ՕՐԵՐ-ի խմբագրակազմը շնորհավորում է ,,Արձագանք,,ի գլխավոր խմբագիր Մարալ Սիմսար Թօմպազեանին եւ ողջ խմբագրակազմին հոբելյանի առիթով, մաղթում անխափան ընթացք եւ հետաքրքիր հրատարակություններ։


Առնչվող նյութեր
1. Արտգործնախարար Զոհրաբ Մնացականյանի հանդիպումը Շվեյցարիայի հայ համայնքի ներկայացուցիչների հետ
2. Շվեյցարահայությունը աջակցում է հայաստանյան շարժմանը
3. Հայոց ցեղասպանության 103-րդ տարելիցին նվիրված միջոցառումներ Շվեյցարիայում
4. Հասմիկ Տոլմաջյանը՝ Ֆրանսիայում Հայաստանի դեսպան
5. Ազնավուրը Ժնեւում մասնակցել է Հայաստանին նվիրված համերգին
6. Շվեյցարիայի Համադաշնության Ազգային խորհրդի նախագահ Դոմինիկ դը Բումանի պատվին կազմակերպված հանդիսություն Ժնևում
7. Ազնավուրի, Սերգեյ եւ Լուսինե Խաչատրյանների ելույթները Ժնեւի հանդիսությանը
8. Կոմիտաս Շվեյցարիա – Հայաստան բարեգործական կազմակերպության 20-ամյակին նվիրված միջոցառում Ժնևում
9. «Արիստոտելը Հայաստանում» խորագրով գիտաժողով Ժնևի համալսարանում
10. ՀԱՅԱՍՏԱՆԸ ՆԵՐԿԱՅԱՑՆՈՂ ՄՇԱԿՈՒԹԱՅԻՆ ՓԱՌԱՏՈՆ՝ ՇՎԵՅՑԱՐԱԿԱՆ ԴՊՐՈՑՈՒՄ

Մեկնաբանություն

© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: