ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
17 նոյեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Մայր Աթոռ Սուրբ Էջմիածնում մեկնարկեց ՀԵՀԵՄ համահայկական երիտասարդական հավաքը

04 հուլիսի, 2018 | 12:12

Հուլիսի 4-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնում մեկնարկեց «Դեպի Հայրենիք, դեպի Սուրբ Էջմիածին» համահայկական երիտասարդական հավաքը` կազմակերպված Հայ Եկեղեցու Համաշխարհային Երիտասարդաց Միավորման (ՀԵՀԵՄ) կողմից:

Հուլիսի 4-ից 8-ը Ծաղկաձորում անցկացվելիք երիտասարդական հավաքին մասնակցելու է ավելի քան քսան երկիր ներկայացնող շուրջ 400 եկեղեցասեր երիտասարդ:
Հավաքն սկսվեց ուխտագնացությամբ դեպի Մայր Աթոռ Սուրբ Էջմիածին, ուր երիտասարդները հանդիպում ունեցան Գարեգին Բ Ամենայն Հայոց Կաթողիկոսի հետ: Նորին Սրբությանը դիմավորեցին Հայրապետական մաղթերգով:
Ուխտավորները հոգևոր դասի առաջնորդությամբ աղոթեցին: «Սուրբ Աստուած» և «Տէր, ողորմեա» շարականների երգեցողությունից և Ավետարանի ընթերցումից հետո Վեհափառ Հայրապետն աղոթք բարձրացրեց առ Աստված ուխտավոր հայորդիների և աշխարհասփյուռ հայության բարօրության, Հայրենիքի և Հայոց Եկեղեցու պայծառության և անսասանության համար:
Այնուհետև ՀԵՀԵՄ հոգևոր պատասխանատու, ԱՄՆ Հայոց Արևմտյան թեմի առաջնորդ Գերաշնորհ Տ. Հովնան արքեպիսկոպոս Տերտերյանը խոսք ուղղեց Նորին Սրբությանը` տեղեկացնելով, որ աշխարհով ցրված թեմական կառույցներից երիտասարդներն ուխտագնացության են եկել Հայրենիք և Մայր Աթոռ Սուրբ Էջմիածին` իրենց հոգիներում նորոգելու հայրենասիրության, եկեղեցասիրության և աստվածսիրության վեհ զգացումները, եկել են աղոթքով նորոգվելու և Վեհափառ Հայրապետի օրհնությամբ զորանալու և վերադառնալու իրենց բնակավայրեր:
Ապա ներկաներին իր պատգամը բերեց Նորին Սրբություն Գարեգին Բ Կաթողիկոսը` փառք և գոհություն բարձրացնելով առ Աստված, որ արժանացրել է երիտասարդությանն այս շնորհներին՝ հոգևոր առաջնորդների հետ ուխտի գալու և մեկտեղվելու Սուրբ Էջմիածնում, Միածնաէջ տաճարում հայցելու Երկնավորի օրհնությունները Հայոց աշխարհի և աշխարհասփյուռ մեր ժողովրդի համար:
Նորին Սրբությունը գոհունակությամբ ընդգծեց, որ երիտասարդության տարվա առիթով, Հայաստանի Առաջին Հանրապետության և մայիսյան հերոսամարտերի 100-ամյակի խորհրդի լույսի ներքո աշխարհասփյուռ տարբեր համայնքներում և թեմերում կազմակերպված զանազան հավաքներով, միջթեմական երիտասարդական հանդիպումներով ու միջոցառումներով անդրադարձ է կատարվել այն առաքելությանը, որին կոչված է հայ երիտասարդն ազգային-եկեղեցական կյանքում, ինչպես նաև ազգային կյանքը հուզող խնդիրներին, Եկեղեցու առջև ծառացած մարտահրավերներին:
Ուխտագնացությունը դեպի Մայր Աթոռ Սուրբ Էջմիածին և հայրենիք Ամենայն Հայոց Կաթողիկոսը երիտասարդական տարվա բարձրակետը նկատեց` նշելով. «Արդարև, ու՞ր, եթե ոչ հայրենիքում պիտի կազմակերպվեր հիմնական միջոցառումը. հայրենիք, ուր մեր պատմությունն է փառապանծ՝ մեր ժողովրդի իրագործումներով, քրտինքով ու արյամբ ձեռք բերված հաղթանակներով: Հայրենիք, որտեղ և ներկան է մեր ժողովրդի` իր բազում մարտահրավերներով ու խնդիրներով, որոնց լուծմանը կոչված ենք մենք մեր ժողովրդի յուրաքանչյուր զավակի և մեր Եկեղեցու հոգևոր սպասավորների հետ: Հայրենիքն է նաև մեր լուսավոր ապագան: Մեր հույսերը սերտորեն կապված են հայրենիքի հետ, և նրա ապագայի կերտման գործում յուրաքանչյուր անձ, յուրաքանչյուր հայորդի ունի իր սրբազան ու նվիրական պարտականությունը…»:
Վեհափառ Հայրապետը հաստատեց, որ հավաքի օրերին երիտասարդները պիտի շրջեն հայրենիքում, աղոթեն սրբազան տաճարներում ու վանքերում, այցելեն նվիրական և սրբազան վայրեր` Ծիծեռնակաբերդ, Օշական և Սարդարապատ, իրենց հայացքն ուղղեն դեպի Արցախ և Արարատ լեռը, շփվելով հայաստանաբնակ իրենց եղբայրների ու քույրերի հետ` պիտի հաղորդ դառնան երկրի առջև ծառացած մարտահրավերներին, ներշնչվեն հայրենիքի իրականությամբ, որ նոր հնարավորություններ է բացում մեր ժողովրդի առջև՝ կերտելու երազների իր հուսաբեր, լուսավոր երկիրը:
«…Այս ամենի մեջ, սիրելիներ, դուք պիտի անդրադառնաք ձեր կոչմանն ու առաքելությանը, ձեր դերակատարությանը: Երիտասարդներդ ներուժն եք ազգի, հզոր ու շարժիչ ուժը, և դուք պետք է այդ վստահությամբ հրաշագործեք մեր հայրենական, ազգային-եկեղեցական կյանքում: Դուք, որ համախմբված եք եկեղեցու կամարների ներքո, դուք, որ ձեր հոգին բացել եք Աստծուն, դուք, որ ձեր սրտների մեջ կրում եք Ավետարանի լույսը, Քրիստոսի պատվիրաններն ու պատգամները, ինչպես քիչ առաջ ընթերցված Ավետարանում ունկնդիր եղաք, պիտի դառնաք աղը ազգային մեր կյանքի, համ պիտի տանք մեր կյանքին՝ ձեր արժանավոր գործերով, ձեր նվիրյալ հավատքով, ձեր հոգուց ու շուրթերից առ Աստված բարձրացող մշտահունչ աղոթքներով: Ավետարանի խոսքի համաձայն՝ դուք պիտի լինեք լույսը կյանքի՝ ձեր ներուժով ու հավատքի զորությամբ», – ասաց Գարեգին Բ Ամենայն Հայոց Կաթողիկոսը` հայցելով, որ Տերն Իր շնորհները հեղի երիտասարդների և աշխարհասփյուռ հայ ժողովրդի կյանքից ներս, որպեսզի յուրաքանչյուրն ապրի ազգի, հայրենիքի և Սուրբ Եկեղեցու առջև պարտքի բարձր գիտակցությամբ:
Այս առիթով Նորին Սրբությունն իր գնահատանքը փոխանցեց ՀԵՀԵՄ հոգևոր պատասխանատու Հովնան արքեպիսկոպոսին, ով կառույցի հաստատման առաջին իսկ օրվանից սիրով, հանձնառությամբ և նախանձախնդրությամբ կատարեց իր պարտականությունները՝ պարբերաբար եկեղեցասեր երիտասարդների համախմբումներ կազմակերպելով ինչպես հայաստանյան, այնպես և սփյուռքյան թեմերում: Հայոց Հովվապետը նաև իր օրհնությունը բերեց թեմակալ բոլոր առաջնորդներին, ովքեր քաջալերում, խրախուսում և հովանավորում են եկեղեցասեր երիտասարդաց միությունների աշխատանքը:
Վերջում Ամենայն Հայոց Կաթողիկոսը մաղթեց, որ Աստված զորացնի հայոց երիտասարդությանը՝ իր առաքելությունը փառքով կատարելու և արժանի լինելու քաջ ու մեծագործ մեր հայրերի սրբազան գործին:
Վեհափառ Հայրապետի օրհնության խոսքից հետո երիտասարդներն երգեցին «Էջ Միածինն ի Հօրէ» շարականը:
Մայր Աթոռում երիտասարդները հոգևոր հովիվների և ՀԵՀԵՄ կենտրոնական գրասենյակի աշխատակիցների ուղեկցությամբ այցելեցին Մայր Տաճար, ծանոթացան թանգարաններում պահվող սրբություններին և պատմական եկեղեցական-ազգային արժեքներին:


Առնչվող նյութեր
1. Գարեգին Բ- Նիկոլ Փաշինյան հանդիպում Մայր Աթոռում
2. Մայր Աթոռ Սուրբ Էջմիածնում նշվեց Գարեգին Բ Ամենայն Հայոց Կաթողիկոսի օծման և գահակալության 19-րդ տարեդարձը
3. Մայր Աթոռ Ս. Էջմիածնում ավարտվեց Գերագույն հոգևոր խորհրդի ժողովը
4. Ամենայն Հայոց Կաթողիկոսն ընդունեց Կանադայի վարչապետին
5. Նիկոլ Փաշինյանն ու Ամենայն Հայոց կաթողիկոսը այցելել են Նյու Յորքի Մետրոպոլիտեն թանգարանում բացված «Արմենիա» խորագրով ցուցահանդես
6. Ամենայն Հայոց Կաթողիկոսը և ՀԲԸՄ նախագահը քննարկեցին հայրենական կյանքին և Սփյուռքին վերաբերող հարցեր
7. Գերմանիայի կանցլերն այցելեց Մայր Աթոռ Սուրբ Էջմիածին
8. Իտալիայի Հանրապետության նախագահն այցելեց Մայր Աթոռ Սուրբ Էջմիածին
9. Ժամանակն է համազգային զգօնութեան. ՌԱԿ հայտարարութիւնը եկեղեցւոյ տագնապի շուրջ
10. ՀՅԴն Իր Ամբողջական Զօրակցութիւնն Է Յայտնում Հայաստանեայց Առաքելական Սուրբ Եկեղեցուն

Մեկնաբանություն

Վերջին լուրեր
1.Արտավազդ Փելեշյանի «Իմ աշխարհը և դաշտի միասնական տեսությունը» նաև անգլերեն
2.Եվրամիությունը աջակցում է «Հայաստանում ընտրական գործընթացների աջակցություն» ծրագրին
3.Ստրասբուրգ. Հայաստանի մշտական ներկայացուցիչ Պարույր Հովհաննիսյանն ընտրվեց Եվրոպայի խորհրդի նախարարների կոմիտեի ենթախմբի նախագահ
4.Նիդերլանդներ. Վերաքննիչ դատարանը անփոփոխ է թողնում թուրք ազգայնամոլ Իլհան Աշկինի դեմ վճիռը
5.Գարեգին Բ- Նիկոլ Փաշինյան հանդիպում Մայր Աթոռում
6.Ինֆորմատիկայի և ավտոմատացման պրոբլեմների ինստիտուտը շարունակում է ՏՏ ոլորտում հաջողություններ գրանցել…
7.Արման Նուռի անհատական մեծ ցուցահանդեսը Վենոզայում
8.Հայաստանի դպրոցներում կներդրվի Աշխարհատեղեկատվական համակարգը
9.Նախագահը ցանկալի է համարել ՅՈՒՆԵՍԿՕ-ի մասնակցությունը Գյումրիում պատմամշակութային արժեքների պահպանմանն ու վերականգնմանը
10.Լեհահայոց հոգևոր հովվությունը ներառվում է Ուկրաինայի հայոց թեմի առաջանորդի հոգևոր իրավասության ներքո
Դիտել բոլորը
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: