ԵՎՐՈՊԱԿԱՆ ԱՆԿԱԽ ԱՄՍԱԳԻՐ
ՀՐԱՏԱՐԱԿՎՈՒՄ Է 1999թ. ՊՐԱՀԱՅՈՒՄ
15 նոյեմբերի, 2018
Կյանքը գնում է, ՕՐԵՐՆ են մնում     Život běží, DNY zůstávají.     Life passes, DAYS remain     Жизнь проходит, ДНИ остаются

Լեռնային Ղարաբաղի կարգավիճակը և անվտանգությունը մեր գլխավոր առաջնահերթություններն են. Զոհրաբ Մնացականյան

16 հոկտեմբերի, 2018 | 08:47

Զոհրաբ Մնացականյանը Լյուքսեմբուրգում մասնակցեց Արևելյան գործընկերությանն անդամակցող երկրների արտաքին գործերի նախարարների հանդիպմանը

 

Հոկտեմբերի 15-ին Լյուքսեմբուրգում ԱԳ նախարար Զոհրաբ Մնացականյանը մասնակցեց Արևելյան գործընկերությանն անդամակցող երկրների ԱԳ նախարարների հանդիպմանը, որին մասնակցում էին Եվրոպական Միության արտաքին գործերի և անվտանգության քաղաքականության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինին, Եվրոպական հանձնաժողովի հարևանության ևընդլայնման հարցերով հանձնակատար Յոհանես Հանը, ԵՄ անդամ պետությունների և ԱլԳ անդամակցող պետությւնների արտգործնախարարներ:

Հայաստանի արտաքին գերատեսչության ղեկավարը իր խոսքում մասնավորապես անդրադարձավ Արևելյան գործընկերության շրջանակներում համագործակցության հեռանկարներին, Հայաստանում տեղի ունեցած վերջին ներքաղաքական զարգացումներին և կառավարության ազգային զարգացման օրակարգի առաջնահերթություններին:

ԼՂ հիմնախնդրի կարգավորման առնչությամբ՝ նախարար Մնացականյանն ընդգծեց, որ Արցախի կարգավիճակը և անվտանգությունը Հայաստանի գլխավոր առաջնահերթություններն են։

Նա մասնավորապես ասել է. ,,Սա իմ առաջին մասնակցությունն է այս ձևաչափով և անմիջապես Ֆրանկոֆոնիայի միջազգային կազմակերպության գագաթաժողովից հետո, որն անցած շաբաթ Հայաստանում միավորել էր կազմակերպության 84 անդամ, դիտորդ և ասոցացված պետությունների պատվիրակություններին, որոնցից մոտ 40-ը ներկայացված էր պետության կամ կառավարության ղեկավարի կամ տեղակալի մակարդակով: Գագաթաժողովի երևանյան հռչակագրում ընդգծված են խաղաղության, համերաշխության, ժողովրդավարության և մարդու իրավունքների արժեքները, ինչպես նաև մեր ժողովուրդների, հատկապես երիտասարդության և կանանց, ընդհանուր հավատարմությունը կայուն զարգացմանը և շրջակա միջավայրի պահպանությանը: Ֆրանկոֆոնիայի նպատակները և վերջինիս «Ապրել միասին» կարգախոսը հետաքրքիր կերպով մեծապես նման են Արևելյան գործընկերության մեր նպատակներին։

2018թ.-ը Հայաստանի համար առանձնահատուկ տարի է: Այն արմատական ժողովրդավարական փոփոխության տարի է, որը դրսևորվեց խաղաղ Թավշյա հեղափոխությամբ, երբ հայաստանյան հասարակությունը վճռականորեն մերժեց անցյալի բացասական երևույթները և հաստատակամորեն ձեռնամուխ եղավ բարեփոխումների՝ ուղղված կոռուպցիայի դեմ պայքարին, արդարադատության համակարգի և օրենքի գերակայության ամրապնդմանը, մարդու իրավունքների և հիմնարար ազատությունների պաշտպանությանը, ինչպես նաև կայուն զարգացման խթանման նպատակով սոցիալ-տնտեսական կյանքում հավասար հնարավորությունների ապահովմանը: Թավշյա հեղափոխությունը ի ցույց դրեց Հայաստանի հասարակության, իր բոլոր շերտերի և ինստիտուտների քաղաքական հասունության և իրավագիտակցության նշանակալի բարձր մակարդակը: Առանձնահատուկ կարևոր է Հայաստանի երիտասարդության և կանաց ակնհայտ ակտիվ դերակատարությունը, ովքեր կանգնած էին հեղափոխության առաջնագծում: ՄԱԿ Գլխավոր քարտուղարը վերջերս հատուկ անդրադարձավ երիտասարդության դերակատարությանը հայաստանյան իրադարձություններում, որոնք բնութագրեց որպես խաղաղ իշխանափոխության ֆանտաստիկ օրինակ: Հայ հասարակության ամուր աջակցությունը Հայաստանի վարչապետին և կառավարությանը և՛ ոգեշնչող է, և՛ պարտավորեցնող:

Խաղաղ ժողովրդավարական փոփոխությունն Արևելյան գործընկերության շրջանակներում համագործակցության նոր ուղիներ է բացում: Հայաստանի նոր կառավարության հիմնական առաջնահերթություններից են հանդիսանում «20 արդյունք մինչև 2020» փաստաթղթում նախանշված թիրախները, մասնավորապես այնպիսի բնագավառներում, ինչպիսիք են տնտեսական զարգացման և շուկայական հնարավորությունների խթանումը, ինստիտուտների ամրապնդումն ու լավ կառավարումը, փոխկապվածության, էներգիայի խնայողության, շարժունակության և ժողովուրդների միջև կապերի խրախուսումն ու շրջակա միջավայրի պահպանությունը:

Անցած հինգ ամիսների ընթացքում Հայաստանի կառավարությունն առանձնահատուկ ուշադրություն է դարձրել օրենքի գերակայության, կոռուպցիայի դեմ պայքարի և ժողովրդավարական հաստատությունների ամրապնդման խթանման նպատակների վրա: Մինչ այժմ իրականացրած մեր գործողություններն արդեն ունեն շոշափելի արդյունքներ՝ արձանագրելով նաև մեր ջանքերի շարունակականության և կայունության հրամայականի հստակ գիտակցումը: Հավասարապես կարևոր է նաև մեր ազգային զարգացման օրակարգի խթանման առաջնահերթությունը:

Սեպտեմբեր ամսին Երևան քաղաքի ավագանու ընտրությունները ցուցադրեցին շարունակական հանրային աջակցությունն ու մանդատը՝ տրված կառավարության և վարչապետի քաղաքական հիմքը հանդիսացող ուժին։ Արտահերթ ընտրություններ անցկացնելու ժողովրդական պահանջը սահմանում է Հայաստանում ներկայիս քաղաքական իրադրությունը․ ընտրություններն ակնկալվում է անցկացնել 2018թ․ դեկտեմբերին։ Ինչպես ցույց տվեցին ավագանու ընտրությունները, իրապես ազատ և արդար ընդհանուր ընտրությունների անցկացումը հանդիսանում է այս կառավարության բացարձակ առաջնահերթությունն ու ամուր քաղաքական կամքը: Հայաստանի կառավարությունը ողջունում և գնահատում է Եվրամիության և անդամ պետությունների տեխնիկական և ֆինանսական աջակցությունն ընտրություններն անցկացնելու հարցում:

Կառավարությունը հավասարապես վճռական է իր զարգացման բարեփոխումների օրակարգի խթանման հարցում: Հայաստանի տնտեսության արդիականացումը, հատուկ շեշտադրում կատարելով տեղեկատվական և հեռահաղորդակցության տեխնոլոգիաների զարգացմանը, ստարտափերի աճի մեծացմանը, ՓՄՁ-ների աջակցությանը, նորարարական և ստեղծագործ կրթության խրախուսմանը, արտահայտում է մեր զարգացման օրակարգի բնույթն ու ուղղությունը: Այն նպատակ ունի խրախուսել ազգային տաղանդը՝ որպես խելացի զարգացման շարժիչ ուժ: Նորարարության համար նպաստավոր պայմանների ստեղծումը, ստեղծարար մտածողությունը, տեխնոլոգիաների օգտագործումը, երիտասարդների հմտությունների զարգացումը և ձեռներեցությունը այս կառավարության ռազմավարական առաջնահերթություններից են, որն ընդգրկում է ներքևից վերև դինամիկան և գործարարության ու ազդեցություն ունեցող ներդրումային նախաձեռնությունների հաջողված օրինակները, բարձրակարգ ստեղծարար կրթության և տեխնոլոգիական կենտրոնների տարածումը երկրով մեկ: Այս առնչությամբ մենք նպատակադրվել ենք խթանել ԵՄ և ԱլԳ տարբեր հարթակների միջև համագործակցությունը, այդ թվում Հորիզոն 2020-ը, Երազմուս + և մյուսները նման հարթակների շրջանակներում։ Հայաստան-ԵՄ Համապարփակ և ընդլայնված գործընկերության համաձայնագիրն իրապես Եվրամիության հետ բազմաշերտ համագործակցության կարևոր ձևաչափ է՝ ի աջակցություն մեր ազգային զարգացման օրակարգի։

Մենք ցանկանում ենք կառուցել առկա դրական համագործակցության փորձի վրա և աջակցել խելացի հանրային կառավարման առաջխաղացմանը։ Մինչ օրս, ԵՄ-ի աջակցությունը ներառում է Հայաստանի կառավարման ինստիտուտներում էլեկտրոնային փաստաթղթաշրջանառության համակարգի ներդրումը, ներառյալ հարկային հաշվետվությունների ներկայացման էլեկտրոնային համակարգը, քաղաքացիական կացության ակտերի էլեկտրոնային գրանցումը, մեքենաների գրանցման մեկ պատուհանի համակարգը, վարորդական իրավունք տրամադրելու ավտոմատացված համակարգը, առցանց էլեկտրոնային ոստիկանությունը, էլեկտրոնային վիզային համակարգը և առցանց բիզնեսի գրանցումը։

Հայաստանում տեղի ունեցած Թավշյա հեղափոխությունը խիստ ներհայաստանյան էր և ունի բացառապես ներքին բնույթ: Ե՛վ իր ծրագրում, և՛ իր բուն ռազմավարության իրականացման մեջ կառավարությունը հաստատակամորեն հավատարիմ է եղել արտաքին քաղաքականության շարունակականությանը ինչպես երկկողմ, այնպես էլ բազմակողմ մակարդակներում` ուղղված տարածաշրջանային և միջազգային խաղաղության, կայունության և փոխլրացնող համագործակցության խթանմանը: Հայաստանի արտաքին քաղաքականությունը խիստ հայաստանակենտրոն է:

Ես համամիտ եմ իմ գործընկեր Էլմարի հետ՝ Լեռնային Ղարաբաղի հիմնախնդրի հանդիպումների լավ դինամիկայի առնչությամբ: Անցած հինգ ամիսների ընթացքում արդեն երկու հանդիպում ունեցել ենք: Լավ հանդիպում է տեղի ունեցել Հայաստանի վարչապետի և Ադրբեջանի նախագահի միջև, որը նպաստել է դրական դինամիկային, և մենք նպատակադրված ենք ամրապնդել այն: Իհարկե, Հայաստանում շուտով՝ հավանաբար դեկտեմբեր ամսին, տեղի են ունենալու ընտրություններ: Միաժամանակ, հավասարապես կարևոր առաջնահերթություն է շարունակել ուշադրության կենտրոնում պահել խաղաղության համար նպաստավոր մթնոլորտի ձևավորումը և խթանումը, որը ներառում է բազմաթիվ բաղադրիչներ՝ վստահության ամրապնդման միջոցառումները, ներառյալ դրանց վերաբերյալ նախորդ համաձայնությունների իրականացումը, իրավիճակի սրման դեմ ռիսկերի նվազեցման միջոցները: Մենք պետք է կենտրոնանանք այս քայլերի վրա և իրական ջանքեր գործադրենք հակամարտության բոլոր կողմերի բնակչությանը խաղաղությանը նախապատրաստելու ուղղությամբ: Եվս մեկ շատ կարևոր առաջնահերթություն է ռազմատենչ հռետորաբանությունից և ատելության քարոզից ձեռնպահ մնալը:

Լեռնային Ղարաբաղի կարգավիճակը և անվտանգությունը մեր գլխավոր առաջնահերթություններն են։ Լեռնային Ղարաբաղը հակամարտության կողմ է՝ կարգավորման գործընթացում իր որոշիչ ձայնով, և պետք է առավել անմիջական ներգրավվածություն ունենա։ Եվ մենք, իհարկե, դրա մասին խոսում ենք։

Քանի որ շուտով լրանում է Արևելյան գործընկերության 10-ամյակը, մենք պետք է ուշադրություն դարձնենք անցյալի սխալները չկրկնելու վրա և պահպանենք նախաձեռնության էությունը․ առաջին հերթին մարդկանց գործընկերություն՝ ուղղված մեր երկրներում կյանքի բարելավմանը և մեր հասարակությունների մերձեցմանը։ Այս համատեքստում, ցանկանում եմ նաև ընդգծել մուտքի արտոնագրի ազատականացման գործընթացի շատ կարևոր առաջնահերթությունը, որը մենք առաջ են մղում ԵՄ երկրների հետ,,։

ՕՐԵՐ


Առնչվող նյութեր
1. «Մենք սպասում ենք Հայաստանի Հանրապետության պատմության մեջ լավագույն ընտրություններին». Պյոտր Սվիտալսկին:
2. Հայաստանի արտգործնախարարի և ԵՄ Եվրոպայի և Կենտրոնական Ասիայի հարցերով գործադիր տնօրենի հանդիպումը
3. Երեւանում ավարտվեց Ֆրանկոֆոնիայի 35-րդ նախարարական համաժողովը
4. Արտգործնախարար Զոհրաբ Մնացականյանի հանդիպումը Շվեյցարիայի հայ համայնքի ներկայացուցիչների հետ
5. Ծայրահեղականության, խտրականության և ատելության միտումները ցնցում են միջազգային օրակարգը. Զոհրաբ Մնացականայան
6. ԵԱՀԿ գլխավոր քարտուղարը Երեւանում
7. Զոհրաբ Մնացականյան-Անտոնիու Գուտերեշ հանդիպում Նյու Յորքում
8. Մնացականյան-Մամադյարով հանդիպում Բրյուսելում
9. Հայաստանն անվտանգ երկրների շարքում ընդգրկելու մասին մտադրություն է հայտնել Գերմանիայի ՆԳՆ պետքարտուղարը
10. Զոհրաբ Մնացականյանը հանդիպումները Բեռլինում. հայ-գերմանական նոր երկխոսություն

Մեկնաբանություն

Վերջին լուրեր
1.Նիդերլանդներ. Վերաքննիչ դատարանը անփոփոխ է թողնում թուրք ազգայնամոլ Իլհան Աշկինի դեմ վճիռը
2.Գարեգին Բ- Նիկոլ Փաշինյան հանդիպում Մայր Աթոռում
3.Ինֆորմատիկայի և ավտոմատացման պրոբլեմների ինստիտուտը շարունակում է ՏՏ ոլորտում հաջողություններ գրանցել…
4.Արման Նուռի անհատական մեծ ցուցահանդեսը Վենոզայում
5.Հայաստանի դպրոցներում կներդրվի Աշխարհատեղեկատվական համակարգը
6.Նախագահը ցանկալի է համարել ՅՈՒՆԵՍԿՕ-ի մասնակցությունը Գյումրիում պատմամշակութային արժեքների պահպանմանն ու վերականգնմանը
7.Լեհահայոց հոգևոր հովվությունը ներառվում է Ուկրաինայի հայոց թեմի առաջանորդի հոգևոր իրավասության ներքո
8.Յուրի Վարդանյանի հուղարկավորությունը Կոմիտասի պանթեոնում
9.«Մենք սպասում ենք Հայաստանի Հանրապետության պատմության մեջ լավագույն ընտրություններին». Պյոտր Սվիտալսկին:
10.Չեխական «Դոմեստիկ» ֆիլմը կցուցադրվի Երեւանում
Դիտել բոլորը
© ORER.CZ 2003-2012, ORER.EU 2012-2018
Մեջբերումներ անելիս հղումը OՐԵՐԻՆ պարտադիր է:
Կայքի նյութերի մասնակի կամ ամբողջական հեռուստա-ռադիոընթերցումն առանց հղման արգելվում է: